क्यान्सरपीडितको सहयोगार्थ कन्सर्ट
पाल्पा — माघको पारिलो मौसम अनि लोकगायिका देवी घर्ती र लोकगायक कुलेन्द्र विश्वकर्माको रमाइलो गीत । तानसेन टुँडिखेलमा दर्शकश्रोता कति रमाइरहेका थिए भन्ने कुरो उनीहरूको हाउभाउबाट प्रस्ट देखिन्थ्यो ।
गायकगायिका गाउँदै थिए :
चढ्दै आयो लाली जोबन
मनको बाँधले रोक्छु
तिमी मेरो हुन्छौ भने
तिम्रै सामु पोख्छु
उही खोलीमा पानी..........
देवीले केही दर्शकश्रोतालाई स्टेजमै बोलाएर आधा दर्जन गित गाइन् । कुलेन्द्रले पनि निकै मनोरञ्जन दिए ।
सांस्कृतिक कार्यक्रम मनोरञ्जनका लागि थिएन । बुटवल उपमहानगरपालिका शंकरनगरकी आठ महिने बालिका मिदिशा शर्मालाई ब्लड क्यान्सरको उपचारमा सहयोग जुटाउन गरिएको कन्सर्टमा कमल भट्टराईको समूहले विभिन्न दीर्घ रोग र तिनले पार्ने प्रभावबारे नाटक देखायो । स्थानीय कलाकारले समेत साथ दिए ।
करिअर ग्रुप नेपालका अध्यक्ष कृष्णप्रसाद भट्टराईले टिकट बिक्रीबाट संकलित रकम उनको परिवारलाई हस्तान्तरण गरिने बताए । एस आर इन्टरटेन्मेन्ट प्रालिको सहकार्यमा आयोजित कन्सर्टमा स्थानीय तथा कलाकारहरूबाटै पनि आर्थिक सहयोग जुटेको थियो । मिदिशाका बुबा मीनप्रसाद र आमा सावित्राले छोरीको जीवनरक्षाका लागि सहयोगको अपिल गरे ।
प्रकाशित : माघ ८, २०७४ ०७:५७