बलिउडका पुनर्मिलन

कान्तिपुर संवाददाता

काठमाडौँ — अभिनेताद्वय अमिताभ बच्चन र शत्रुघ्न सिन्हाबीचको वैमनस्य बलिउडका लागि कुनै बेला नयाँ समाचार पटक्कै थिएन । ‘काला पत्थर’, ‘शान’ जस्ता फिल्ममा एकसाथ काम गरेका उनीहरू ‘दोस्ताना’ निर्माणताका एक–अर्काका वैरी बने । अमिताभले शत्रुघ्नसँग काम नगर्ने घोषणा गरिदिए । त्यसअघि पनि केही फिल्ममा उनीहरूले एक–अर्काको मुखै नहेरी छायांकन गरेका थिए ।

सन् १९८०/९० को दशकमा पानी बाराबार भएको तिनको सम्बन्ध सधंै तीतो रहेन । बिस्तारै उनीहरूले पुरानो शत्रुता बिर्सिए । सुरुवाती दिनमा झैं अहिले यी ‘दोस्ताना’ जोडी पुन: दोस्त भइसकेका छन् । शत्रुघ्नले आफ्नो बायोपिकमा अमिताभसँगको ‘कोल्ड वार’ बारे बेलीविस्तार लगाएका छन् । ‘त्यो बेला हामी जवान थियौं,’ पुस्तकमा भनिएको छ, ‘स्टारडमले मुग्ध थियौं । हामी साथी थियौं । त्यसैले झगडा गर्ने वा फरक मत राख्ने अधिकार हामीलाई थियो ।’
अभिनेत्री जया प्रदा र श्रीदेवी पनि एकताका दुश्मन बनिवरी पुन: साथीको साइनो गाँसेका जोडी हुन् । आफ्नो जमानाका यी टप हिरोइनबीच २५ वर्षसम्म बोलचाल भएन । फिल्म सेटमा क्यामेरा बन्द हुनासाथ उनीहरू आ–आफ्नो बाटो लाग्थे । राजेश खन्ना र जितेन्द्रले उनीहरूलाई मिलाउन अनेक उपाय अपनाए पनि उनीहरू मरेकाटे बोलेनन् । तर, जयाप्रदाका राजनीतिक मित्र अमर सिंहले आयोजना गरेको पार्टीमा भने दुईबीच बोलचाल भयो ।
निर्माता करण जौहर र काजोलको लडाइँ समाप्त गर्ने जस करणका जुम्ल्याहा सन्तानलाई दिनुपर्छ । उनले ‘सरोगेसी’ का माध्यमले जन्माएका ती बच्चाको तस्बिरमा काजोलले लाइक्स गरेपछि उनीहरूको विवाद अन्त्य भएको बुझियो । उनीहरू २५ वर्षदेखिका साथी थिए । तर, करणको ‘ए दिल है मुश्किल’ र काजोलका पति अजय देवगणको ‘शिवाय’ बीचको बक्स–अफिस भिडन्तले करण–काजोल दुश्मन बन्न पुगे । तर, दुश्मनी लामो रहेन ।
सन् १९९५ को ‘करण अर्जुन’ मा स्क्रिन सेयर गरेका सलमान र शाहरूख खानको सम्बन्ध २००८ मा आएर नराम्ररी बिग्रियो । कट्रिना कैफको बर्थडे पार्टीमा झगडा गरेका उनीहरू करिब चार वर्ष एक–अर्कासँग रिसाए । पछिल्लो समय उनीहरूको ब्रोमान्स फेरि सुचारु भएको छ । दुवै एकसाथ देखिनु सामान्य भइसक्यो भने एक–अर्काका फिल्मको प्रमोसनमा समेत उनीहरू व्यस्त हुन थालेका छन् ।
अस्तिसम्म ‘भाइ–भतिजावाद काण्ड’ लाई लिएर भनाभन गरिरहेका करण जौहर र कंगना रनावत अहिले आफूहरूबीच केही पनि नभएझैं गर्न थालेका छन् । उनीहरू एउटा रियालिटी सोको स्पेसल एपिसोडका लागि एकसाथ छायांकनमा गएको खबर हालै सार्वजनिक भयो । कंगनाले करणकै कार्यक्रममा उनले भाइ–भतिजवादलाई प्रश्रय दिएको बताएपछि उनीहरूको सम्बन्ध आगोको फिलिङगो बनेको थियो । निकै समय त्यसले माहोल ततायो ।
जुही चावला र आमिर खान पनि ‘दोस्त टन्र्ड दुश्मन’ हुँदै पुन: दोस्त बनेका जोडी हुन् । खासमा उनीहरू कट्टर दुश्मनचाहिँ कहिल्यै थिएनन् । आमिरको प्रांकले हैरान भएपछि जुही सुटिङमा गइनन् । उनी सुटिङमा नआएपछि आमिर रिसाए । अनि दुईबीचको बोलचाल यत्तिकैमा टुंगियो । ‘पाँच–छ वर्ष बोलेनौं’, जुहीले एउटा अन्तर्वार्तामा भनेकी छन्, ‘एक दिन म आफैं बोल्न गएँ । आमिरलाई लागेछ म पो रिसाएँ । ऊ त कहिल्यै रिसाएकै थिएन रे ।’

प्रकाशित : माघ १, २०७४ ०८:२२
प्रतिक्रिया
पठाउनुहोस्

पहिरन लोक्ता र अल्लो 

कान्तिपुर संवाददाता

काठमाडौँ — हातले बुनेका पहिरनमा मौलिकता हुन्छ नै, त्यसमा पनि धेरै समय र रचनात्मक सीप झल्किने भएकाले बजारमा पाइने सामग्रीभन्दा एकदमै फरक र महँगा पनि हुन्छन् । म्याग्दीकी शान्ति थापा मगरले ऊनका थुप्रै पहिरन आफ्नै हातले सिर्जना गरेकी छन् ।

शान्ति थापा मगर

उनी कहिल्यै बजारको नक्कल गर्दिनन् । आफैं कल्पना गर्छिन् र कल्पनामा आउने डिजाइनलाई मूर्त रूप दिन्छिन् ।
‘यसरी बुनेका पहिरन टिकाउसँगै सुन्दर पनि देखिन्छन्,’ दरबारमार्गस्थित होटल अन्नपूर्णमा भेटिएकी उनले भनिन्, ‘र, डिजाइन अरूसँग मेल नखाने हुनाले युनिक हुन्छ ।’
उनीलगायत थुप्रै हस्तकला सिर्जना गर्ने ग्रामीण समूह यतिबेला राजधानीमा प्रदर्शन गर्न आएका छन् । गरिबी निवारण कोषले होटल अन्नपूर्णमा गरेको तीन दिने ‘दक्षिण एसियाली हस्तकला महोत्सव’ मा विभिन्न ७ जिल्लाका हस्तकला समूहले भाग लिएका थिए भने भारत र पाकिस्तानका हस्तकला स्टल पनि थिए । कोषद्वारा सञ्चालित ‘द्वन्द्व प्रभावितहरूका लागि बजार निर्माण परियोजना’ अन्तर्गत प्रदर्शनी गरिएको हो ।
आइतबार सकिएको प्रदर्शनीमा बाँस, अल्लो, लोक्ता, ढाका लगायतले बनाइएका पहिरनदेखि घर सजावटका सामग्रीहरू प्रदर्शनीमा राखिएका थिए । यस्ता प्रदर्शनीले सीप सिकाइको ज्ञानलाई फराकिलो पार्ने र अनुभव आदानप्रदान हुने म्याग्दीकी शान्तिले बताइन् । उनले सीप सिक्नुअघिको फुर्सदको समय त्यत्तिकै खेर गएको बताउँदै हस्तकलामा सक्रिय भएपछि आफू बढी सिर्जनशील भएको महसुस गरेको सुनाइन् । ‘नयाँनयाँ बुट्टा बुन्न मन लाग्छ,’ उनी भन्छिन्, ‘घरको काम छिटो सकाएर बुन्नतिरै लाग्छु ।’
महोत्सवको पहिलो दिन सांगीतिक कार्यक्रमसँगै फेसन सो पनि गरिएको थियो । अल्लो, उलन, ढाकाजस्ता मौलिक सामग्रीले बनाएका पहिरन मोडलहरूले लगाएका थिए । उनीहरू क्रमश: र्‍याम्पमा देखिँदा नेपालीपन र सीपको सौन्दर्य प्रशस्तै झल्किएको महसुस हुन्थ्यो । जाडो मौसममा अल्लो र ढाकाको पहिरन अत्यन्त प्रभावकारी हुने हुँदा फेसन सोमा मोडलहरूले यस्तो डिजाइनलाई महत्त्व दिएका थिए । भारत र पाकिस्तानबाट आएका हस्तकला समूहका सिर्जना पनि रोचक थिए । उनीहरूले हातैले बुट्टाकुँदेका पहिरन प्रदर्शनमा राखेका थिए । भारतबाटस्टल राख्न आएका घनश्याम भट्टले ‘बाहुन बुटी’ नामक सारी प्रदर्शनमा राखेका थिए । यो हेर्दा रोचक र सिर्जनशील देखिन्थ्यो ।

प्रकाशित : माघ १, २०७४ ०८:२१
पूरा पढ्नुहोस्
प्रतिक्रिया
पठाउनुहोस्