सेलिब्रिटी फेसन सो

कान्तिपुर संवाददाता

काठमाडौं — ‘डी सेलिब्रिटी रनवे २०१६’ मा फिल्म क्षेत्रका ४५ कलाकार र्‍याम्पमा देखा परे । होटल अन्नपूर्णमा उनीहरूले क्याटवाक मात्रै गरेनन्, र्‍याम्पमै नृत्यको केही स्टेप प्रस्तुत गरे ।

केहीले गीत पनि गाए । सामाजिक ध्येय भनिएको कार्यक्रममा कलाकर्मीले विशेषत: पार्टी वेयर प्रदर्शन गरे ।

पुनम इन्टरटेनमेन्ट र गौरी मल्लले गरेको फेसन सोको उद्घाटन अभिनेत्री भुवन चन्दले गरेकी थिइन् । कालो/सेतो रङको सारी–चोलीमा उनी अगाडि आएकी थिइन् । भुवनले नेतृत्व गरेको पहिलो सिक्वेन्समै चैत्यदेवी, वसुन्धरा भुसाल र शुभद्रा अधिकारीले रनवेमा पाइला चाले । दोस्रो चरणमा रेखा थापाले ‘बनेको छ छहराले...’ लगायत गीत गाइन् भने उनीपछि तुलसी घिमिरे आफ्नो सिग्नेचर स्टाइलमा देखा परे । कालो क्याप र खैरो ओभरकोट उनमा खुलेको थियो । 

भुवन केसी, कृष्ण मल्ल, विजय लामा, सरोज खनाल र निखिल उप्रेतीले सेरवानीका अनेक डिजाइन देखाए । लक्ष्मी गिरी, दीपाश्री निरौला, सञ्चिता लुइँटेल, रूपा रानालाई भने फेसनेबल लेहेंगामा उतारिएको थियो । 

तेस्रो सिक्वेन्समा गाउनमाथिको प्रयोग देख्न पाइयो । त्यसमा ऋचा शर्मा, केकी अधिकारी, बेनिशा हमाल, मलिना जोशी, सुषमा कार्की, आष्मा डीसी लगायतले पहिरन प्रदर्शन गरेका थिए । सोही सेरिजमा गौरव पहारी, आसिफ साह लगायतले कुर्ताका डिजाइन देखाए । 

दृष्टिविहीनहरूको फेसन सो ‘ब्लाइन्ड रनवे’ गर्न चन्दा संकलन गर्ने उद्देश्यले कार्यक्रम गरिएको पुनम इन्टरटेनमेन्टकी पुनम गौतमले बताइन् । ‘अहिलेसम्म २/३ लाख रुपैयाँसम्म जम्मा हुने लक्षण देखाएको छ,’ उनले भनिन्, ‘एक वर्षभित्र दृष्टिविहीन युवायुवतीलाई र्‍याम्पमा उतार्ने लक्ष्य लिएका छौं ।’ वल्र्ड फेसन परेडसँगको सहकार्यमा यो प्रोजेक्ट सञ्चालन गरिएको हो । फिल्म क्षेत्रका नयाँ र पुरानो पुस्तालाई एकै ठाउँ देख्दा दर्शक रमाएका थिए । फेसन डिजाइनरसमेत रहेकी पुनमले यही जमघट गराउन कार्यक्रम गर्ने जोस फुरेको अवगत गराइन् । ‘नयाँले अग्रजबाटै अगाडि बढ्न सिक्ने हो,’ उनले भनिन्, ‘दुई पुस्ताबीचको ग्याप मेटाउन यस्ता कार्यक्रम आवश्यक छन् भन्ने लाग्यो ।’ कार्यक्रममा सन्दिप क्षत्रीले कमेडी प्रस्तुत गरेका थिए । समग्र व्यवस्थापन पक्ष भने कमजोर थियो । 

प्रकाशित : पुस १७, २०७३ ०८:५२
प्रतिक्रिया
पठाउनुहोस्

पश्चिमको ‘ऐना’ पूर्वमा

प्रदीप मेन्याङ्बो

धरान — सुदूरपश्चिमको धरातलमा उभिएर लेखिएको कथा संग्रह ‘ऐना’ ले यसपटकको मदन पुरस्कार जित्यो । त्यही कृतिका लेखक रामलाल जोशी पश्चिमका कथामाथि छलफल चलाउन पूर्व आएका छन् ।

विमल स्मृति पुस्तकालय र क्यानभास साहित्य समाजले कथाकार जोशी र पूर्वका पाठकबीच दोहोरो संवाद चलाए । पूर्वका पाठक र समीक्षकको जिज्ञासालाई मेट्दै जोशीले भने, ‘लेखक कवि साहित्यकार स्वतन्त्र, दबाबमुक्त नभएसम्म समाजको वास्तविक ऐना लेख्न सकिन्न । मैले त्यही धर्म निभाएको छु । कथाहरूमा सुदूरपश्चिमाञ्चलको समाजको यथार्थ छाया देख्नु हुनेछ ।’ 

धनगढीमा बसेर स्थानीय लयमा कथा लेख्दै आएका जोशीले पहिलो कथासंग्रहमै मदन पुरस्कार पाएपछि थप जिम्मेवारी र पाठकको मायासँगै आत्म–दबाब सृजना भएको बताए । भने, ‘पुरस्कार प्राप्तिपछि परिष्कृत र परिपक्व हुनुपर्ने महसुस भएको छ ।’ सुरुमा कविता र गजल लेख्दै आएका जोशीले ०७० देखि मात्र कथा लेख्नु सुरु गरेका हुन् । उनले ०७२ चैतमा आफ्नै लगानीमा ‘ऐना’ को पहिलो र त्यसलगत्तै दोस्रो संस्करण प्रकाशित गरे । पछि बुकहिलबाट छापियो । प्रकाशक भूपेन्द्र खडकाले ‘ऐना’ हालसम्म २० हजारप्रति बिक्री भइसकेको जनाए । सुदूरपश्चिमाञ्चल साहित्य समाजका अध्यक्षसमेत रहेका जोशी कलेज पनि पढाउँछन् । 

४१ वसन्त पार गरेका जोशी लेखन प्रेरणाबारे पनि खुले । उनका बुवा हरिभक्त जोशी पनि लेख्थे । ‘तर म सात वर्षको हुँदा उहाँ बित्नुभयो । चार कक्षामा पढ्दा बुवाको डायरी फेला पारें । त्यसमा ‘विद्याकी रानी’ शीर्षकको कविता झ्याउरे छन्दमा थियो,’ उनले भने, ‘त्यही कविताबाट प्रभावित भएर लेख्न थालें ।’ उनको गजल कृति पनि प्रकाशित छ । त्यसपछि अर्को कविता र गजलसंग्रह निकाल्ने तयारी गर्दागर्दै एकैचोटि कथा लेखनमा हाम्फालेको उनले बताए । कथा नै लेख्नुपर्ने कारणबारे उनले भने, ‘मलाई किन किन कविताबाट भन्दा कथाबाट म बसेको समाजको यथार्थलाई चित्रण गर्न सहज लाग्यो ।’ कथामा सुदूरपश्चिमका दु:ख, समस्या मात्र देखाएको आरोप लगाइएको बारेको प्रश्नमा उनले ‘साहित्यमा कला र आनन्दका कुरा मात्र हुन नुहने’ प्रतिक्रिया दिए । उनले सुदूरपश्चिमको भाषा, जीवनशैली, सामाज, साहित्यलाई मूलधारमा प्रवेश गराउँदा पाठकले मन पराएको पाएको दाबी गरे । भने, ‘पाठकले कसरी लिन्छन् भनेर परीक्षण गर्नु पनि थियो । परीक्षणमा सफल पनि भइयो ।’

समालोचक प्रा.डा. भीम खतिवडाले राजनीतिले फुटाएका मनलाई साहित्यले मात्र जोड्ने बताए । उनले कथासंग्रहमाथि टिप्पणी गर्दै भने, ‘जोशीका कथाले समस्या देखाएको छ । अब कथाकारले समाधान पनि गर्ने उपाय र धारणा दिनु जरुरी छ ।’ चेवनश्रीले सहजीकरण गरेको संवादमा अर्का टिप्पणीकार राज माङ्लाकले जोशीका कथाहरूमा पश्चिम नेपाली समाजका विडम्बनाहरूलाई जस्ताको तस्तै चित्रण गरिएको बताए । धरानबाट सुरु संवाद धनकुटा, इटहरी, इनरुवा र झापासम्म पुग्ने प्रकाशक खड्काले जनाए ।

प्रकाशित : पुस १७, २०७३ ०८:५१
पूरा पढ्नुहोस्
प्रतिक्रिया
पठाउनुहोस्