काठमाडौं — क्यानभास अघिल्तिर शून्य शून्य टोलाइरहेका बेला जेनी घलेको दिमागमा एउटा दृश्य आयो– सेल्फी खिच्ने पछिल्लो पुस्ताको लत । उनी आफैं पनि सेल्फीका प्रेमी हुन् ।

‘साथी भाइ भेट्यो त सेल्फी नहानी मनै मान्दैन,’ उनले भनिन्, ‘अनि यही बानीलाई चित्रमा किन नउतार्ने भन्ने लाग्यो ।’ दृश्य त उनले क्यानभासमा उतारिन् । तर, गम्भीर बहसको विषय उठाउँदै । सेल्फी कल्चरसँगै पछिल्लो पुस्ता कतै एक्लिँदै त गइरहेको छैन ? व्यंग्यात्मक प्रस्तुति भए पनि उनको चित्रले यतातिर सोच्न बाध्य बनाउँछ ।

जेनीले जस्तै यति बेला राजधानीमा युवा कलाकारले समसामयिक विषयवस्तुमाथि कलात्मक अभिव्यक्ति दिएका छन् । बबरमहलस्थित सिद्र्धाथ आर्ट ग्यालरी र नेपाल आर्ट काउन्सिलमा प्रदर्शनी जारी छ । ‘द सोलस अफ आर्ट’ शीर्षकमा गरिएको प्रदर्शनीमा चित्रसँगै प्रतिस्थापनकला पनि देख्न पाइन्छ । जेनीले ‘इचिङ’ माध्यमबाट सेल्फी दुनियाँ देखाएकी छन् ।

अनिल शाहीको प्रतिस्थापन कला साधारण तर गहकिलो लाग्छ । दराजका सिसा फुटेका छन् । त्यसभित्र चाहिँ ब्यानर, पोस्टर, खादा लगायत वस्तु राखेका छन् । बाटोमा जे देखे त्यही संकलन गरेर ल्याएको उनले बताए ।

सिसाचाहिँ किन फुटाएको ? ‘एना पनि त कुरूप हुन्छ नि,’ उनले दार्शनिक लाग्ने जवाफ दिए, ‘ऐनाको निश्चित रूप हुँदैन । जे अगाडि उभिन्छ आकृति बनाउँछ । यही भावलाई प्रस्ट्याउन चाहेको हुँ ।’

मुना बडेल चित्रको विषयवस्तु खोज्दै टाढा गइनन् । हजुर आमाले आफ्ना जवानीका दिन सम्झँदै कुनै बेला उनलाई सुनाएकी थिइन्– ‘बैंसमा म निकै राम्री थिएँ, अहिले पो बूढी भएँ ।’ यसैलाई उनले क्यानभासमा उतारेकी छन् ।

सन्ध्या सिलवालले चाहिँ नेपाली कागजमा कला पस्किएकी छन् । मिक्स मिडियाको माध्यम अपनाएकी उनले मानव जीवन चक्रलाई माकुरा र नवाजत शिशुको प्रतिबिम्बमा कलात्मक ढंगले उतारेकी छन् । जीवन सुवालले भूकम्पको प्रभाव कोरेका छन् ।

नेपाल आर्ट काउन्सिलमा चाहिँ ३१ जना कलाकारका सिर्जना छन् । कृष्णगोपाल श्रेष्ठले भूकम्पपछिको शून्य सहरको अवस्थालाई आवाजविहीन घण्टाको आकृतिमार्फत् अभिव्यक्त गरेका छन् । अर्को चित्रमा उनले भूकम्पले क्षति पुर्‍याएको सांस्कृतिक सम्पदाहरूलाई उतारेका छन् ।

अशुराम खाइजू, विजेन्द्र श्रेष्ठ, डंकनदास चौधरी, दिल्लीराज घिमिरे, गजेन्द्र श्रेष्ठ, गणेशकुमार जिसी, हरिप्रसाद वैद्य, कृष्ण लामा, कैलाश श्रेष्ठ, सुनीता महर्जन लगायतका चित्र प्रदर्शनीमा छन् । भूकम्पपीडित कलाकारलाई बंगलादेशका कलाकारले उपलब्ध गराएको आर्थिक सहयोगबाट यी चित्रहरू कोरिएका हुन् ।

काठमाडौं कन्टेम्प्ररी आर्टस् सेन्टर र बिन्दु स्पेस अफ आर्टिस्टले गरेको प्रदर्शनी मार्च २९ सम्म चल्नेछ ।