बेलायतको रसमोर काउन्सिलमा पूर्वगोर्खा धनबहादुर विजयी
लन्डन — उत्पीडितहरुको पक्षमा सक्रिय भूतपूर्व गोर्खा धनबहादुर सार्की काउन्सिलरमा विजयी भएका छन् । विगत दुई दशकदेखि बेलायतमा बसोबास गरिरहेका भूतपूर्व गोर्खा, समाजसेवी तथा व्यवसायी सार्कीले नेपालीहरुको उल्लेख्य बसोबास भएको रसमोरको वेलिङटन वार्डबाट काउन्सिलर जितेका हुन् ।
यसअघि कञ्जरभेटिभ पार्टीले जितेको उक्त क्षेत्रमा पहिलोपटक लेबर पार्टीबाट चुनावी प्रतिस्पर्धामा उत्रिएका उनी विजयी भए ।
सार्कीले ६ सय ५२ मत प्राप्त गर्दा उनका निकटतम प्रतिस्पर्धी कञ्जरभेटिभ पार्टी उम्मेदवारले ४ सय १४ मत पाइन् ।
रसमोर बरो काउन्सिलमा लेबर पार्टीबाट काउन्सिलर उम्मेदवार बनेका उनी पहिलो नेपाली मूलका व्यक्ति हुन् । उनी विगत ५ वर्षदेखि लेबर पार्टीमा आबद्ध छन् ।
विजयी भएपछि सार्कीले आफ्नो वडाको विकास निर्माण र स्थानीय जनतालाई सेवा सुविधा प्रदान गर्न आफ्नो कार्यकाल खर्चने बताएका छन् । साथै नेपाली समुदायको हितमा लागिरहने उनको प्रतिबद्धता छ ।
सार्की नेपाली वेलफेयर सोसाइटी यूकेका अध्यक्ष पनि हुन् । कोभिड महामारीका बेला सातै प्रदेशका विपन्नलाई खाधान्न राहत वितरण गर्न भूमिका खेलेका सार्की हाल व्यवसाय पनि गर्छन् ।
उनी लामो समयदेखि एनआरएनए अभियानमा सामेल थिए । एनआरएनए यूके सदस्यमा भारी मतले निर्वाचित भएका उनी उपाध्यक्षमा भने पराजय भोगेका थिए ।
प्रकाशित : वैशाख २७, २०८० २१:४७
