अस्ट्रेलियामा होलीको उमंग [तस्बिरहरू]

काठमाडौँ — रंगहरूको पर्वको रुपमा चिनिने होली यस वर्ष अस्ट्रेलियामा रहेका नेपालीले पनि उल्लासका साथ मनाएका छन् । सिड्नी, एडिलेड, मेलबर्न, तास्मानिया लगायत विभिन्न राज्य तथा सहरमा रहेका नेपालीले होलीलाई विशेष उल्लासका साथ मनाएका छन् ।

नेपालीको कलासंस्कृति, परम्परा तथा पहिचानलाई चिनाउने उद्देश्यले आइतबार आयोजना गरिएको रंगको पर्वमा यस वर्ष नेपालीसँगै अस्ट्रेलियालीले समेत उत्साह र चासोका साथ सहभागिता जनाएका थिए । विभिन्न राज्यमा आयोजना गरिएको होली पर्व विभिन्न रंग एकआपसमा दलेर मनाइएको थियो भने नेपाली खानाका परिकार तथा नृत्य र संगीतले अलग रौनक थपेको थियो ।

दक्षिण अस्ट्रेलियामा एडिलेड नेपालले आयोजना गरेको कार्यक्रममा नेपालबाट आएका कलाकारले महोत्सवमा उर्जा थपिदिएका थिए । दिउँसोदेखि चलेको र झण्डै २ हजार सहभागी रहेको पर्व साँझसम्म चलेको थियो । कार्यक्रममा दक्षिण अस्ट्रेलियाका सांसदले समेत रंग दलेर होलीको शुभकामना दिएका थिए ।

पर्वमा रंगहरुका साथै नेपाली मम:, सेलरोटी, चटपटे लगायत खानेकुराले सहभागीलाई नेपालको झल्को दिलाएको थियो । कार्यक्रममा युवा मात्र नभएर नेपालबाट आएका अभिभावक, बालबालिकाले समेत उत्तिकै मनोरञ्जन लिएका थिए । ‘हाम्रो मुख्य उद्देश्य नै हाम्रो संस्कृति र परम्परालाई यहाँ प्रवर्द्धन गर्ने र आफ्नो पर्वलाई यहाँ हुर्किरहेको दोस्रो पुस्तालाई चिनाउने हो,’ आयोजक नेपाल एडिलेडका पुस्कर कोइरालाले कान्तिपुरसँग भने ।

पानी परिरहेको भए पनि सहभागीहरूले त्यसको कुनै वास्ता गरिरहेका थिएनन् । कार्यक्रममा गायिका एलिना चौहानले ‘धोकेबाज हौ तिमी’ बोलको गीत गाउँदा दर्शकहरूबाट वान्समोर पाएकी थिइन् । गायकहरु समीर आचार्य, निहारिका ज्ञवाली, सुदिन पोखरेल, विक्रम बरालले होलीको माहोललाई संगीतमय बनाइदिएका थिए । यसका साथै स्थानीय कलाकार तथा ब्याण्डले समेत कार्यक्रममा सांगीतिक रंग भरिदिएका थिए । कार्यक्रममा सहभागी हुन आएका अभिभावकहरु समेत विभिन्न रंगमा रंगिएर आधुनिक संगीतमा नाचिरहेका थिए ।