कोरियामा लगानी सम्मेलन

‘कोरियाली लगानीकर्ताहरु नेपालमा उचित लगानी गर्न चाहन्छन् । हामीले उचित वातावरण मिलाइदिनुपर्‍यो । यहाँका लगानीकर्तालाई हाम्रोमा भएका सम्भावनाका विषयमा पनि जानकारी गराउनुपर्‍यो ।’ गैरआवासीय नेपाली संघका अध्यक्ष दीपक पुनले भने ।

कार्यक्रममा आएका धेरै कोरियाली लगानीकर्ताहरू पूर्वाधार विकास, पर्यटन, कृषि र हाइड्रोपावर क्षेत्रमा लगानी गर्नका लागि इच्छुक रहेका छन् ।कार्यक्रमका प्रमुख अतिथि कोरिया नेपाल पार्लियमेन्टरी फ्रेन्डसिप ग्रुपका सभापति ली साङ हेनले नेपालमा लगानीका लागि प्रशस्त ठाउँ रहेको बताए । उनले नेपाल घुम्न जाँदा नेपालबारे बुझेको भन्दै कोरियाली लगानीकर्तालाई आफूले सक्ने क्षेत्रमा लगानी गर्न आग्रहसमेत गरे ।

कार्यक्रममा कोरियाका लागि नेपाली राजदूत ज्योती भण्डारी प्याकुरेलले नेपालमा कोरियालीहरूले अहिले पनि लगानी गरेर राम्रो गरिरहेको बताइन् । ‘नेपालका धेरै क्षेत्रमा लगानी गर्न सकिने ठाउँ छन् । नेपाल सरकारले लगानीमैत्री वातावरण बनाइरहेको छ । थप सुधार गर्न परे त्यो पनि गर्नेछ‚’ कोरियाली लगानीकर्तामाझ उनले भनिन्‚ ‘कोरिया विकसित देश भएकाले यहाँ भएको पुँजी र प्रविधि नेपाललाई चाहिएको छ । यसका लागि नेपाल सरकार लगानी सुरक्षाका निम्ति पनि तयार छ ।’

अहिले दक्षिण कोरियाली लगानीकर्ताहरुले नेपालमा कोरियाली ठूलो कम्पनीमध्ये एक दोसान कम्पनीले त्रिशुली १ हाईड्रोपावरका लागि काम गरिरहेको छ । काठमाडौँ तराई फास्ट ट्य्राकमा समेत योसिन इन्जिनियरिङ कर्पोरेसनले काम गरिरहेको छ । त्यस्तै घर निर्माणमा कोरियाली कम्पनी एसवाई ग्रुपले एसवाई प्यानल र अनलाइन मार्केटिङमा एसवाई बजार नामक एपमार्फत अनलाइन बजारको काम गरिरहेको छ ।