दूतावास नभएका देशमा सरकारी घुम्ती टोली खटाइने 

गैरआवासीय नेपाली संघको युरोप क्षेत्रका राष्ट्रिय समन्वय परिषद्हरुको फहलमा आइतबार आयोजित अन्तर्क्रिया कार्यत्रममा परराष्ट्रमन्त्री पौड्यालले दूतावास तथा कन्सुलर सेवा नभएका देशहरुमा सरकारले घुम्ती टोली खटाएर त्यहाँका नेपालीहरुले भोग्नुपरेको समस्या समाधानका लागि पहल गर्ने तयारी गरेको बताइन् ।

‘पोर्चुगलका धेरै कुराहरु सुन्यौं, धेरै नेपाली अलपत्र छन्, कागजपत्र नभएका भन्ने पनि सुन्नमा आएपछि सकेसम्म कन्सुलेट खोल्ने तयारी छ,’ उनले भनिन्, ‘तर सो कार्य तत्काल सम्भव छैन, त्यसमा आर्थिक पाटो पनि जोडिएको छ, अर्कोतर्फ मन्त्रिपरिषदबाट त्यसको निर्णय हुनुपर्छ, त्यसैले तत्काल समस्या समाधानका लागि २५ देखि १ महिनाभित्र एउटा सरकारी टोली पोर्चुगलमा राख्ने र त्यहाँका कागजपत्रविहीन तथा समस्याग्रस्त नेपालीलाई सहजीकरण गर्ने योजना बनाएका छौं ।’

आइतबार मात्रै यसमा निर्णय गरेर प्रक्रियाका लागि अर्थ मन्त्रालय र प्रधानमन्त्री कार्यालयमा पठाएको उनको भनाइ थियो । यसअघि गैरआवासीय नेपाली संघका अध्यक्ष त्रयसहितको प्रतिनिधि मण्डलले काठमाडौंस्थित परराष्ट्र मन्त्रालयमा पुगेर दूतावास तथा महावाणिज्यदूत नभएका देशमा तत्काल दूतावास स्थापना तथा महावाणिज्यदूत नियुक्त गर्न मन्त्री पौड्याललाई आग्रह गरेको थियो । यूरोपेली मुलुक माल्टामा दूतावास नहुँदा समस्या परेको भन्ने विषयमा मन्त्रालय जानकार रहेको भन्दै मन्त्री पौड्यालले माल्टाको समस्या समाधानमा सरकारले पहल गर्ने बताइन् ।