कानुनी कठिनाइ हटाउन प्रधानमन्त्रीलाई गैरआवासीय नेपालीकाे आग्रह
काठमाडौँ — प्रधानमन्त्री पुष्पकमल दाहाल र गैरआवासीय नेपाली संघका अध्यक्ष त्रयसहितको प्रतिनिधिमण्डलबीच भेटवार्ता भएको छ । भेटका क्रममा गैरआवासीय नेपाली संघकी कार्यकारी अध्यक्ष रबिना थापाले हालसम्म संघले गरिआएको काम र सरकारको तर्फबाट सम्बोधन गर्नुपर्ने नीतिगत र कानुनी सुधारबारे धारणा राखिन् ।
संघका अध्यक्ष बद्री केसीले नेपाल सरकारसहितको लगानी रहेको १० अर्बको लगानी कोष ‘एनआरएन नेपाल डेभलपमेन्ट फण्ड’लाई अघि बढाउन कानुनी र व्यवहारिक कठिनाइ रहेको भन्दै ती कठिनाइ सम्बोधन गर्न आग्रह गरे । विदेशमा रहेका बहुसंख्यक नेपालीलाई सामाजिक सुरक्षा कोषमा जोड्नुपर्ने, विदेशमा कामका शिलशिलामा अंगभंग भएका नेपालीलाई स्वदेश फिर्ता गरी परिवारलाई आर्थिक सहायता गर्नुपर्ने माग अध्यक्ष केसीले राखेका थिए ।
यस्तै, संघका अध्यक्ष कुल आचार्यले संघले उठाएको गैरआवासीय नेपाली नागरिकताको मुद्दालाई तत्काल सम्बोधन गर्न अनुरोध गरे। ‘एक पटकको नेपाली सदैव नेपाली’ हुने भन्दै अध्यक्ष आचार्यले विविध कारण अन्योलमा परेको नागरिकताको विषयलाई यथाशक्य छिटो टुंगो लगाउन आग्रह गरे ।
जवाफमा प्रधानमन्त्री दाहालले विदेशमा रहेका नेपालीको मन जित्नेगरी काम गर्ने प्रतिबद्धता व्यक्त गरे । विद्यमान कतिपय कानुनी प्रावधानले सिर्जना गरेका अप्ठ्यारालाई नेपाल सरकारले क्रमशः सच्याउँदै आएको र अबको दिनमा पनि पन्छाउने प्रयास आफ्नो तर्फबाट जारी रहने दाहालले बताए ।