पश्‍चिम अस्ट्रेलियामा नेपाल महोत्सव- प्रवास - कान्तिपुर समाचार

पश्‍चिम अस्ट्रेलियामा नेपाल महोत्सव

नारायण खड्का

अस्ट्रेलिया — पश्चिम अस्ट्रेलियाको पर्यटकीय सहर पर्थमा नेपाल महोत्सव सम्पन्‍न भएको छ । नेपाली कलासंस्कृति, परम्परा र पर्यटन प्रवर्द्धन गर्नका लागि पर्थको मुख्य क्षेत्र फरेस्ट चेसमा ४ वर्षपछि आयोजना गरिएको थियो ।

महोत्सवमा विहानै सयौंको संख्यामा सहभागी नेपालीले सुरु गरेको प्रभातफेरिमा नेपालीमात्र नभएर अस्ट्रेलियालीका स्थानीय बासिन्दाले समेत सहभागिता जनाएका थिए । उनीहरुले महोत्सव, नेपालका बारेमा चासो र उत्साहमात्र ब्यक्त गरेनन् कि ताली बजाएर समेत स्वागत गरेका थिए । प्रभातफेरिलाई सुरक्षाकर्मीले स्कर्टिङ गर्दै सुरक्षा प्रदान गरेका थिए ।

नेपाली परम्परागत पोशाक, विभिन्न झाँकी, कलासंस्कृति झल्काउने पहिचान सहितको प्रभातफेरीले पश्चिम अस्ट्रेलियाको राजधानी पर्थलाई शनिबार सानो नेपालकै रुपमा परिवर्तन गरिदिएको थियो ।

प्रवासी नेपालीको संगठन एनआरएनएले गर्ने यस कार्यक्रमले नेपालमा पर्यटन प्रवर्द्धनमा टेवा पुर्‍याउने मात्र नभएर अस्ट्रेलियामा नेपालीको पहिचानलाई अझ सुदृढ र सबल बनाउन भूमिका खेलिरहेको आयोजकको भनाइ छ । आयोजक समितिका संयोजक दीपक बस्नेतले नेपाली दोस्रो पुस्ता बढिरहेका कारण कार्यक्रमले उनीहरुलाई आफ्नो कलासंस्कृति र परम्परालाई नजिकबाट चिन्‍न र बुझ्न यस्तो कार्यक्रमले सहयोग पुर्‍याउने सुनाए । कार्यक्रममा नेपालीमात्र नभएर उल्लेख्य रुपमा विदेशीको समेत सहभागिता रहेको थियो ।

यस महोत्सवलाई सफल बनाउन यहाँका सबै नेपाली समुदाय मात्र नभएर काउन्सिल, स्थानीय सरकार अस्ट्रेलियाली नेताहरुकै महत्वपूर्ण साथ रहेको आयोजक संस्थाका डेपुटी युथ कोअर्डिनेटर उत्तम अधिकारीले सुनाए । कार्यक्रममा नेपाली खाना, व्यवसायका साथै नेपाली पर्यटकीय जानकारीसहितका स्टलहरु राखिएका थिए । कार्यक्रममा पश्चिम अस्ट्रेलियाका डेपुटी प्रिमियर, अस्ट्रेलियाका लागि नेपाली राजदूत, पर्थका मेयर, एनआरएनएका प्रतिनिधिका साथै विभिन्‍न संघसंस्था तथा राजनीतिक दलका प्रतिनिधिहरुको सहभागिता रहेको थियो ।

महोत्सव सफल बनाउन स्थानीय काउन्सिल र राज्य सरकारले समेत प्रवर्द्धन र प्रचारप्रसारमा सहयोग पुर्‍याएको थियो । करिब एक महिना अघिदेखि नै सहरको मुख्य भागमा काउन्सिलले प्रचारप्रसारका लागि बोर्ड राखिदिएको थियो भने गाडीहरुमा समेत प्रचार सामाग्री राखेर सुरु गरिएको थियो ।

महोत्सवमा स्थानीय सांगितिक ब्याण्ड, कलाकारका साथै दीपक बज्राचार्य, रीदम ब्याण्ड र कलाकार सन्दीप क्षेत्रीले प्रस्तुति दिएका थिए ।

प्रकाशित : मंसिर ११, २०७९ १५:०४
प्रतिक्रिया
पठाउनुहोस्

रोल्पामा जिप दुर्घटना, ६ जना घाइते

काशीराम डाँगी

रोल्पा — रोल्पाको त्रिवेणी–६ धारमखोलास्थित बिरुवामा जिप दुर्घटना हुँदा ६ जना यात्रु घाइते भएका छन् । प्रहरीका अनुसार फलफूलका बिरुवा पुर्‍याएर फर्कने क्रममा उक्त जिप शनिबार दिउँसो दुर्घटनामा परेको हो ।


धारमखोला माथिका गाउँमा बिरुवा वितरण गरेर लिङदुङतर्फ फर्कँदै गरेको अवस्थामा लु १ च ३३७० नम्बरको पिकअप गाडी धारमखोलामा मोड्ने क्रममा सडकबाट करिब १० मिटरभन्दा तल खसेको थियो । जिप खस्दा चालकसहित दुई पुरुष र चार युवती घाइते भएका थिए । घाइतेलाई उपचारका लागि दाङस्थित अस्पतालमा पुर्‍याइएको प्रहरीले जनाएको छ ।

दुर्घटना लगत्तै उद्धारका लागि जुगारको नेर्पास्थित प्रहरी चौकीबाट प्रहरी र स्थानीय खटिएका थिए । चालक त्रिवेणी–४ पुनगाउँका २८ वर्षीय कमल परियारको ढाडमा भित्री चोट लागेको छ । अन्यलाई टाउको, अनुहार, निधारमा चोट लागेको छ ।

जिपमा सवार भएका अवस्थामा घाइते भएकामा रोल्पा नगरपालिका–१० धवाङकी १८ वर्षीया श्यामकली सुनार, प्युठान नौबहिनी गाउँपालिका–८ की २३ वर्षीया सुशीला भण्डारी, प्युठान नौबहिनी–३ खवाङकी २२ वर्षीया बालिका पुन मगर, प्युठान नौबहिनी–८ की २१ वर्षीया बिमला भण्डारी र कैलाली टीकापुर नगरपालिका–१ का २४ वर्षीय नरेशराज गिरी छन् ।

उक्त जिपमा विभिन्न ठेगाना भएका किशोरीहरु किन सवार थिए भन्नेबारेमा प्रहरीले अनुसन्धान गरिरहेको छ । रोल्पामा प्रमुख जिल्ला अधिकारी नवराज सापकोटाले उक्त घटनाबारे गम्भीर रुपमा अध्ययन गर्न प्रहरीलाई निर्देशन दिइएको बताए ।

प्रकाशित : मंसिर ११, २०७९ १४:५४
पूरा पढ्नुहोस्
प्रतिक्रिया
पठाउनुहोस्
×