पोर्चुगलमा लमजुङका व्यवसायी गुरुङको निधन- प्रवास - कान्तिपुर समाचार
कान्तिपुर वेबसाईट
AdvertisementAdvertisement

पोर्चुगलमा लमजुङका व्यवसायी गुरुङको निधन

आश गुरुङ

लमजुङ — पोर्चुगलमा रहेर व्यवसाय गर्दै आएका एक जना लमजुङका व्यवसायीको निधन भएको छ । लमजुङको दोर्दी गाउँपालिका–९ हिलेटक्सारका ४३ वर्षीय भक्तराज गुरुङको निधन भएको त्यहाँस्थित नेपालीले बताएका छन् ।

पोर्चुगलमा ५ वर्षदेखि रेष्टुरेन्ट सञ्चालन गर्दै आएका गुरुङको शनिबार निधन भएको व्यावसायिक साझेदार एवं लमजुङ समाज पोर्चुगलका निवर्तमान अध्यक्ष लोकेन्द्र गुरुङले बताए । उनका अनुसार शुक्रबार राति अबेरसम्म काइसोद्रेस्थित रेष्टुरेन्टमा काम गरेर घर फर्किने क्रममा गुरुङको एक्कासि टाउको दु:खेको जानकारी पाएपछि परिवार, साथीभाइ साथै आपतकालीन सेवाका डाक्टरको सहयोगमा उपचारको लागि अस्पताल पुर्‍याइएको थियो ।

तत्काल एम्बुलेन्स बोलाएर उपचारको लागि मार्टिममुनिजस्थित साओजोसे अस्पतालमा लगिएको र उपचारका क्रममा उनको निधन भएको पारिवारिक स्रोतले जनाएको छ । ‘रेष्टुरेन्टबाट घर फर्किने क्रममा उहाँको टाउको बेस्सरी दु:खेको खबर आयो । आपतकालीन डाक्टरको टिमले उपचार गर्दा नसकेपछि एम्बुलेन्स बोलाएर अस्पताल पुर्‍यायौं,’ गुरुङले भने, ‘अस्पतालमा पनि उपचार सम्भव भएन । त्यसपछि ज्यान गयो ।’ पारिवारिक स्रोतका अनुसार गुरुङ उच्च रक्तचापका बिरामी थिए ।

परिवारका साथ विगत ९ वर्षदेखि पोर्चुगलमा बस्दै आएका भक्तराजको निधनले लमजुङ समाज पोर्चुगल स्तब्ध भएको समाजका अध्यक्ष गम्भीरजंग गुरुङले बताए । उनको निधनले समाज मर्माहत भएको उनले बताए । उनका अनुसार भक्तराजको शवलाई जन्मभूमि नेपाल (लमजुङ) पठाउने तयारी गरिएको र यसका लागि आर्थिक सहयोग गरिदिन लमजुङ समाज पोर्चुगलले सबैमा आग्रह गरेको छ ।

प्रकाशित : मंसिर ११, २०७९ १०:२५
प्रतिक्रिया
पठाउनुहोस्

उदयपुर-१ को मतगणना रोकियो

डिल्लीराम खतिवडा

उदयपुर — उदयपुर निर्वाचन क्षेत्र नम्बर १ को मतगणना रोकिएको छ । गणनाको क्रममा पछिल्लोपटक खोलिएको १० वटा ब्यालेट बक्समा उदयपुर १ (२) प्रदेशसभाको १०० मतपत्र भेटिएकाले गणना रोकिएको हो । 

६३ हजार ८० मत गणना भइसकेपछि थप गणनाका लागि १० बक्स खोलिएको थियो । त्यसै क्रममा प्रदेश २ को सय मतपत्र भेटिएपछि दलहरूले गणना रोक्न माग गर्दै अवरुद्ध गरेका हुन् । साढे १० बजे सर्वदलीय बैठक बस्ने गरी हाललाई गणना रोकिएको प्रमुख निर्वाचन अधिकृत कृष्णप्रसाद सुवेदीले बताए ।

७६ हजार ७५६ मत खसएको यो क्षेत्रको ६३ हजार ८० मत गणना भइसकेको छ । गणना भइसकेकोमा कांग्रेसका नारायण खड्काले १ हजार ८२५ मतले अग्रता लिएका छन् । खड्काले २७ हजार ४८४ मत प्राप्त गरेका छन् भने एमालेकी मन्जुकुमारी चौधरीले २५ हजार ६५९ मत प्राप्त गरेको निर्वाचन अधिकृतको कार्यालयले जनाएको छ ।

प्रकाशित : मंसिर ११, २०७९ १०:१९
पूरा पढ्नुहोस्
प्रतिक्रिया
पठाउनुहोस्
×