पेरिसमा देउसीभैलो- प्रवास - कान्तिपुर समाचार

पेरिसमा देउसीभैलो

कान्तिपुर संवाददाता

पेरिस — हिन्दु नेपालीहरूको प्रमुख पर्व तिहारको अवसरमा फ्रान्सको राजधानी पेरिसमा नेपालीहरूले देउसीभैलो खेलेका छन् । गोरखाली समाज फ्रान्सले शनिबार आयोजना गरेको देउसीभैलो नेपाली परम्परा अनुसार सामूहिक रुपमा खेलिएको हो ।

फ्रान्सको कानुन अनुसार राति अवेरसम्म हल्लाखल्ला, नाचगान गर्न नपाइने र स्थानीय नेपालीको घरघरमा पुगेर देउसीभैलो कार्यक्रम गर्न नसकिने हुँदा सामूहिक रुपमा एकै ठाउँमा भेला भएर मनाइएको गोरखाली समाजले जनाएको छ ।

नेपालीको आँगनमा ‘शुभ-दीपावली’ लेखिएका अक्षरहरू र देउसीभैलो भाकाले शनिबार दिउँसोदेखि नै धेरै नेपालीको ध्यान तानेको थियो । देउसीभैलोमा दोस्रो पुस्ताका नेपाली, बालबालिका, विभिन्न संघ संस्थाका प्रतिनिधि र अभिभावकहरूको सहभागिता थियो ।

आफ्ना सन्तती र यहीँ जन्मिएर हुर्केबढेका बालबालिकालाई नेपाली संस्कृति, पर्व र परम्परा सिकाउन पनि यस्तो देउसीभैलो कार्यक्रम गर्नुपर्ने गोरखाली समाजका अध्यक्ष रामेश्वर श्रेष्ठले बताए । 'नेपाली भन्नु नै हाम्रो चाडपर्व, संस्कृति, चाडवाड र परम्परा हो । आफू पनि रमाउनुपर्‍यो, हाम्रा केटाकेटीलाई पनि सिकाउनुपर्‍यो । त्यही नभए त के नेपाली भैइयो र ?' उनले भने ।

देउसीभैलो मार्फत् संकलित रकम छुट्टै बैंक खातामा राख्ने र आपतविपद्‍मा परेका नेपालीहरूको सहयोग र उद्धारमा खर्च गर्ने समाजका अध्यक्ष रामेश्वर श्रेष्ठले बताएका छन् । अन्य दिन नेपाली पर्वमा छुट्टी नपाइने हुनाले यहाँका नेपालीहरूले शनिबार र आइतबार आफ्ना पर्व मनाउने गरेका छन् ।

प्रकाशित : कार्तिक ६, २०७९ १४:५३
प्रतिक्रिया
पठाउनुहोस्

हुर्रा नाचको रौनक

भानुभक्त निरौला

सोलुखुम्बु — सोलुखुम्बुका मगर समुदायले लोपोन्मुख हुर्रा नाच नाच्‍न थालेका छन् । लोप भएको भाषा र संस्कृति जोगाउन स्थानीयले पहल थालेपछि समुदायमा सञ्चालन हुने कार्यक्रममा हुर्रा नाच देखिन थालेको हो । बिर्सिएको संस्कृति जोगाउन ४ वर्षअघि प्रशिक्षक ल्याएर हुर्रा नाच सिकाइएको थियो ।

‘नयाँ पुस्ताले चासो राखेर समुदायमा हुर्रा नाच्न थालेका छन्,’ सोलुदूधकुण्ड नगरपालिका १० का वडाध्यक्ष होमबहादुर मगरले कान्तिपुरसँग भने । मौलक नाचले आन्तरिक तथा बाह्य पर्यटकलाई पनि आकर्षित गर्ने गरेको छ ।

जिल्लाको टाप्टिङ, फतान्जे, केरूङ, तामाखानी, खरिखोला, वक्साखानीलगायतका गाउँमा मगर समुदायको बसोबास रहेको छ । यहाँका मगर समुदायले लोप भइसकेको मगर भाषा जोगाउन समेत पहल थालनी गरेका छन् ।

पछिल्लो समय मगर भाषा बोल्नेको संख्यामा समेत वृद्धि हुन थालेको स्थानीयले बताएका छन् ।

तस्बिरहरू : भानुभक्त निरौला

प्रकाशित : कार्तिक ६, २०७९ १४:३२
पूरा पढ्नुहोस्
प्रतिक्रिया
पठाउनुहोस्
×