बेलायती महारानीको अन्त्येष्टिमा सहभागी हुन लन्डन आइपुगे मन्त्री खड्का- प्रवास - कान्तिपुर समाचार
कान्तिपुर वेबसाईट
AdvertisementAdvertisement

बेलायती महारानीको अन्त्येष्टिमा सहभागी हुन लन्डन आइपुगे मन्त्री खड्का

नवीन पोखरेल

लन्डन — संयुक्त अधिराज्य (यूके) की महारानी एलिजाबेथ द्वितीयको राजकीय अन्त्येष्टिमा सहभागी हुन परराष्ट्रमन्त्री नारायण खड्का शनिबार राति लन्डन आइपुगेका छन् । मन्त्री खड्का बेलायत सरकारको निम्तोमा लन्डन आएका हुन् । 

राति करिब सवा ११ बजे विमानस्थलमा उत्रिएका मन्त्री खड्कालाई बेलायती विदेशमन्त्रीका विशेष प्रतिनिधि, लन्डनस्थित नेपालका राजदूत ज्ञानचन्द्र आचार्य, दूतावासकी उपनियोग प्रमुख रोशन खनाललगायत कांग्रेसका कार्यकर्ताले स्वागत गरेका थिए ।

लन्डनमा रहँदा मन्त्री खड्काले महारानीलाई श्रद्धाञ्जली अर्पण गर्न राजकीय अन्त्येष्टिमा सहभागी हुनुका साथै ल्यान्कास्टर हाउसमा शोक पुस्तिकामा हस्ताक्षर गर्ने कार्यक्रम रहेको दूतावासले जनाएको छ ।

यसैगरी मन्त्री खड्का बकिङ्गम दरबारमा राजाको स्वागत समारोह तथा त्यहाँका विदेश मामिला मन्त्रीले आयोजना गर्ने स्वागत समारोहमा समेत सहभागी हुने कार्यक्रम छ ।

मन्त्री खड्का आगामी २१ सेप्टेम्बर (असोज ५ गते) स्वदेश फर्कने कार्यक्रम रहेको दूतावासले जनाएको छ ।

बेलायतकी दिवंगत महारानीको अन्त्येष्टिमा सहभागी हुन विश्वका नेताहरू लन्डन आउने क्रम जारी रहेको छ । विश्वभरबाट ५ सयभन्दा बढी राष्ट्रप्रमुख वा सरकारी प्रतिनिधि अन्त्येष्टिमा सहभागी हुने अपेक्षा गरिएको छ । विभिन्न देशबाट आएका पाहुनाहरू बेलायतका नयाँ राजा चार्ल्सद्वारा आयोजित स्वागत समारोहमा पनि सहभागी हुनेछन् ।

महारानी एलिजाबेथ द्वितीयको सेप्टेम्बर ८ मा निधन भएको थियो । बेलायत सरकारले यही सेप्टेम्बर १९ सोमबार लन्डनमा भव्य समारोहका साथ एलिजाबेथको अन्त्येष्टि गर्ने तयारी गरेको छ ।

प्रकाशित : आश्विन २, २०७९ ०७:५०
प्रतिक्रिया
पठाउनुहोस्

लुम्बिनीमा प्रदेशस्तरीय छनोट प्रतियोगिता आजदेखि

सन्जु पौडेल

तिलोत्तमा — प्रदेश खेलकुद परिषद् लुम्बिनीको आयोजनामा आइतबारदेखि प्रदेशस्तरीय विभिन्न विधामा छनोट प्रतियोगिता हुने भएको छ । १३ गतेसम्म हुने भनिएको प्रदेशस्तरीय छनोट प्रतियोगिताको समय तालिका भने परिवर्तन भएको छ ।

लगातारको झरिसँगै राष्ट्रिय खेलकुद परिषद्को असोज १० गतेभित्र सक्नुपर्ने नयाँ निर्देशन अनुसार तालिका परिवर्तन गरिएको प्रदेश खेलकुद परिषद् लुम्बिनीका सदस्य सचिव जयप्रकाश भट्टराईले बताए ।

रुपन्देही, नवलपरासी, कपिलवस्तु, दाङ, नेपालगन्ज, बर्दिया र रोल्पामा आयोजना गर्ने भनिएको प्रतियोगितामा हेरफेर गरिएको उनले बताए । रोल्पामा ११ र १२ गते हुने भनिएको आरटिएफ तेक्वान्दो खेल रुपन्देहीमा असोज ४ र ५ गते सारिएको उनले बताए । यसैगरी रग्बी खेल गुलरिया, बर्दियामा आयोजनाको तयारी भएकोमा परिवर्तन गरी बाँकेमा असोज ११ गते गरिने उनले बताए । अन्य खेलहरु भने तोकिएको स्थान र समयमा हुने उनले बताए ।

प्रतियागिताको उद्घाटन आइतबार बुटवल एन्फा एकेडेमीमा हुनेछ । प्रतियोगिता अन्तरगत पुरुष र महिला फुटबल, महिला भलिबल खेल बुटवल एन्फा एकेडेमीमा असोज २ देखि ४ गतेसम्म, बुद्धिचाल बुटवलमा २ र ३ गते, तेक्वान्दो, ब्याडमिन्टन खेलहरु भैरहवामा पुरुष/महिला कबड्डी, लनटेनिस, शारीरिक सुगठन, आर्चरी खेल रुपन्देहीमा असोज २ देखि ३ गते हुने छ । यसैगरी पुरुष भलिबल नवलपरासी तथा सितोरिया कराते कपिलवस्तुमा ४ र ५ गते हुनेछ ।

एथ्लेटिक्स खेल बेलझुन्डी, दाङमा, फुलकन्टयाक्ट कराते, टेबलटेनिस, ह्यान्डबल तुल्सीपुर दाङमा असोज ६ र ७ गते हुनेछ । यसैगरी बास्केटबल, बक्सिङ, भारोत्तलन, कुस्ती, उसु, जुडो, सुटिङ, पौडी, जिम्न्यास्टिक, पुरुष र महिला हक्की, साइक्लिङ खेलहरु नेपालगन्ज, बाँकेमा असोज ८, ९ र १० गते हुनेछ ।

त्यस्तै, सेप्राक्ता ताराताल बर्दियामा १० गते, पुरुषरमहिला खोखो भुरिगाउँ बर्दियामा १० र ११ गते हुने भएको छ ।

प्रतियोगितामा १२ जिल्लाका २ हजार ६ सय ५२ जना खेलाडीहरु, २ सय अफिसियल र ३ सय स्वयंसेवकहरुको सहभागिता रहने छ ।

प्रकाशित : आश्विन २, २०७९ ०७:४८
पूरा पढ्नुहोस्
प्रतिक्रिया
पठाउनुहोस्
×