जापानका नेपालीलाई दाहालले भने- 'अहिले नै फर्केर आउनु भन्ने अवस्था छैन'- प्रवास - कान्तिपुर समाचार
कान्तिपुर वेबसाईट
AdvertisementAdvertisement

जापानका नेपालीलाई दाहालले भने- 'अहिले नै फर्केर आउनु भन्ने अवस्था छैन'

'नेपालको विकास यात्रामा तपाइँको सहभागिता चाहियो भनेर बोलाउने दिनको ब्यग्र प्रतिक्षामा छु'
कान्तिपुर संवाददाता

काठमाडौँ — नेकपा माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहालले कृषि क्षेत्रले नै नेपाललाई समृद्ध र आत्मनिर्भर बनाउने बताएका छन् । विद्युत र पर्यटनसँगै कृषि आर्थिक विकासको प्रमुख आधार भएको उनको भनाइ थियो ।

जापान भ्रमणमा रहेका नेता दाहालले नेपाली समुदायसँग अन्तरक्रियाको क्रममा यस्तो बताएका हुन् । यस क्रममा उनले अहिलेको सरकारले पनि कृषि क्षेत्रलाई प्राथमिकता दिएको बताएका थिए ।

यस्तै नेपाल पर्यटनको अनन्त पर्यटन विकासको केन्द्र हुनसक्ने उनको भनाइ थियो । दाहालले भने, 'अहिले नेपाल सरकारको नीति कार्यक्रम बनाउँदै गर्दा र बजेटबाट पनि नेपाल कता लैजाने भनिरहँदा मेरो ध्यान कृषिको आधुनीकिकरण र यान्त्रिकरण तथा यसको औद्योगिक विकासमा मेरो ध्यान छ ।'

तर देशको विकासमा विदेशमा रहेका नेपालीको महत्त्वपूर्ण भूमिका हुने संकेत गर्दै उनले उनीहरूलाई नेपालमा फिर्ता बोलाउने अवस्था अहिले नै अझै नरहेको बताए ।

जापानमा रहेका नेपालीहरूलाई अहिले नै स्वदेश फर्किएर आउनु भन्ने अवस्था नरहेको भन्दै दाहालले केही समयपछि उनीहरूलाई स्वदेश फर्काउने योजना रहेको बताए । यसका लागि आफूहरूले नेपालमा राजनीतिक स्थायित्व र स्थिरताको वातावरण बनाउँदै गरेको दाहालले बताएका थिए ।

दाहालले बलियो राजनीतिक केन्द्र बनाएपछि आधिकारिक रुपमा विदेशमा रहेका नेपालीलाई फिर्ता बोलाउने दिनको ब्यग्र प्रतिक्षामा रहेको पनि बताएका थिए ।

'अझै मैले तपाइँहरूलाई ल आउनुहोस् नेपाल भन्ने अवस्था भएको छैन । तपाइँहरूलाई प्रष्ट रुपमा भन्नुपर्दा, राजनीतिक स्थायित्व र सुशासनको मोडालिटीलाई प्रोमोट गर्ने वातावरण बनाइसकेपछि र बलियो राजनीतिक केन्द्र बन्यो भन्ने सन्देश दिएर म फेरि तपाइँहरू समक्ष आउने छु र आधिकारिक रुपमा तपाइँहरूलाई अब तपाइँहरूको सबै तागत नेपालमा लगाउनु भन्ने छु । जो जहाँ भए पनि नेपालको विकास यात्रामा तपाइँको सहभागिता चाहियो भन्ने दिन आउँछ । म ब्यग्रतापूर्वक त्यो दिनको प्रतिक्षामा छु ।'

प्रकाशित : श्रावण २२, २०७९ १८:२२
प्रतिक्रिया
पठाउनुहोस्

मजदुरको पारिश्रमिक वृद्धिपछि अघि बढ्यो सुनकोसी मरिण डाइभर्सनको काम 

राजकुमार कार्की

सिन्धुली — मजदुरहरुको पारिश्रमिक वृद्धिपछि सुनकोसी–मरिण डाइभर्सनको काम अघि बढेको छ ।  सरकारी जिल्ला दररेट अनुसारको न्यूनतम पारिश्रमिक पाउनुपर्ने लगायतका माग राख्दै एक सातादेखि सुनकोसी मरिण डाइभर्सन बहुउद्देश्यीय आयोजनामा काार्यरत मजदुर आन्दोलित  थिए । ठेकेदार कम्पनीले मजदुरको न्यूनतम पारिश्रमिक दैनिक ३० रुपैयाँ बढाएपछि आन्दोलन स्थगित भएर आइतबारबाट काम सुरु भएको हो ।

सुनकोसी मरिण डाइभर्सनअन्तर्गत सुरुङ मार्गको ठेक्का लिएको चाइनिज कम्पनी चाइना ओभरसिज इन्जिनियरिङ (कोभ्याक)का जनसम्पर्क अधिकृत जनक विकका अनुसार अर्धदक्ष मजदुरले ८ घण्टा काम गरेबापत पाउँदै आएको ५८० रुपैंयाँमा ३० रुपैयाँ बढाएर ६१० कायम गरिएको छ । त्यस्तै दक्ष मजदुरको हकमा ७५० मा ३० बढाएर ७८० रुपैयाँ बनाइएपछि आन्दोलनरत पक्ष र ठेकेदार कम्पनीबीच सहमति भएको हो । जिल्ला दररेटमा भने अर्धदक्ष कामदारको ७५० र दक्षको एक हजार पारिश्रमिक छ ।

आन्दोलनरत मजदुरहरुले १० वटा माग राखेकोमा मुख्य पारिश्रमिक वृद्धि थियो । अन्य मागहरु कम्पनीले यसअघि नै सम्बोधन गरिसकेको जनसम्पर्क अधिकृत विकको दावी छ । कमलामाई नगरपालिका २ को कुसुमटारमा सुरुङ खन्नको लागि प्रवेश मार्गमा पाँचसय भन्दा बढि नेपाली मजदुरहरु कार्यरत छन् ।

आयोजना प्रमुख मित्र बरालका अनुसार ठेकेदार कम्पनी, आयोजना, स्थानीय प्रशासन र आन्दोलनरत पक्षबीच वार्ता भई सहमति भएसँगै काम अगाडि बढेको छ । ‘सुरुङ खन्नमा प्रयोग हुने टीबीएम मेसिनको प्लेटफर्म जडान भइरहेको छ,’ उनले भने, ‘अब दुई महिनाभित्रमा सुरुङ खन्ने कामको थालनी हुन्छ ।’ सुनकोसी नदीको पानी सुरुङबाट मरिणखोलामा खसाली तराईका खेतीयोग्य जमिनमा सिँचाइ सुविधा पुर्‍याउने र ३१ मेगावाट विद्युत् समेत उत्पादन गर्ने आयोजनाको उद्देश्य छ ।

सुनकोसी मरिण डाइभर्सन आयोजनाको सुरुङ निर्माणसँगै अन्य संरचनाको ठेक्का ११ अर्ब २९ करोड २७ लाख २६ हजार ३३४ रुपैयाँमा चाइना ओभरसिज कम्पनीलाई दिएको छ । आयोजना आर्थिक वर्ष २०८२/८३ सम्ममा सक्ने लक्ष्य छ । सुनकोसीमा १२ मिटर उचाइको बाँध निर्माण गरी नदीको पानी १३ दशमलव ३ किलोमिटर लामो सुरुङमार्फत प्रतिसेकेण्ड ६७ क्युसेक पानी कमलामाई नगरपालिका–२ कुसुमटारस्थित मरिणखोलामा खसालिने छ । बहुउद्देश्यीय आयोजनाको मुख्य उद्देश्य विद्युत उत्पादनसँगै तराईका बारा, रौतहट, धनुषा, महोत्तरी र सर्लाही जिल्लाका १ लाख २२ हजार हेक्टर जमिनमा सिँचाइ सुविधा पुर्‍याउने छ । आयोजना निर्माण गर्न कुल ४६ अर्ब १९ करोड रुपैयाँ लाग्ने अनुमान छ ।


प्रकाशित : श्रावण २२, २०७९ १८:१४
पूरा पढ्नुहोस्
प्रतिक्रिया
पठाउनुहोस्
x
×