अयोध्यायको राम मन्दिरमा धनुष राख्नेबारे निधि र रायबीच छलफल
नयाँ दिल्ली — भारतको अयोध्यायमा निर्माणाधीन राम मन्दिरमा जनकपुरधामको जानकी मन्दिर तथा मिथिलावासीको तर्फबाट धातुको धनुष राख्न श्रीराम जन्मभूमि तीर्थक्षेत्र सकारात्मक देखिएको छ ।
अयोध्याय भ्रमणमा रहेका नेपाली कांग्रेस नेता विलमेन्द्र निधिले राममन्दिरमा धनुष राख्न गरेको प्रस्तावलाई श्रीराम जन्मभूमि तीर्थ क्षेत्रका महामन्त्री चम्पत रायले आफ्नो कार्यसमितिमा छलफल गराउने आश्वासन दिएका छन् । उनले यो प्रस्ताव सबैले मान्नैपर्ने महत्वपूर्ण विषय भएको समेत बताए ।
व्यक्तिगतरुपमा आफू सहमत रहेको भन्दै रायले राम मन्दिर ट्रस्ट र निर्माण समिति बैठकमा प्रस्ताव राखेर निर्णय गर्न कोसिस गर्ने वचन दिएको निधिको सचिवालयले जनाएको छ । नेता निधि र महामन्त्री रायबीच शनिबार अयोध्यायमा छलफल भएको थियो । छलफलमा जानकी मन्दिरका महन्थ रामतपेश्वर दासलगायत जनकपुरवासी तथा राम मन्दिर ट्रस्टका सदस्य अनिल मिश्र लगायतको सहभागिता रहेको थियो ।
त्यस अवसरमा नेता निधिले महामन्त्री रायलाई नेपालमा निर्माण गरिएको धनुषको नक्सा हस्तान्तरण गरेका थिए ।
प्रकाशित : श्रावण १४, २०७९ २२:१५