कोरियन एयरले आउँदो अगस्ट महिनादेखि नेपालमा नियमित उडान गर्ने- प्रवास - कान्तिपुर समाचार
कान्तिपुर वेबसाईट
AdvertisementAdvertisement

कोरियन एयरले आउँदो अगस्ट महिनादेखि नेपालमा नियमित उडान गर्ने

गोकुल थोकर

सोल, दक्षिण कोरिया — कोरियन एयरले अगस्ट महिनादेखि सोल-काठमाडौं नियमित उडान गर्ने भएको छ । प्रत्येक सोमबार र बुधबार उडान गर्ने एयरले जनाएको छ । कोरोना महामारीका कारण रोकिएको उडान दुई वर्ष पछि पुनः सुरु हुन लागेको हो ।

नियमित उडान भएसँगै लामो समयदेखि कोरिया आउन प्रतिक्षारत युवाहरु सहजै रोजगारका लागि यहाँ आउन पाउने छन् । साथै कोरियामा रहेका नेपालीले पनि अन्य एयर मार्फत नेपाल जान र कोरिया आउन ट्रान्जिटको झन्झटिलो व्यहोरिरहेका थिए । अब ट्रान्जिटको बाध्यता हट्ने छ । साथै उडान रद्द भइरहने समस्या पनि भोग्नु पर्ने छैन ।

चर्को कामदार अभाव खेपिरहेको कोरियाले कोरोना महामारी पछि सबै क्षेत्रको जनजीवनलाई सामान्य बनाउने नीति अपनाएको छ । सोही नीति अन्तर्गत कोरियाली राष्ट्रिय ध्वजावाहक कोरियन एयरले विभिन्न देशसँग रोकिएको उडानहरु नियमित गर्न लागेको हो । यसअघि नै धेरै देशसँग नियमित उडान गरे पनि नेपालमा भने अगस्ट महिनादेखि उडान गर्ने भएको हो ।

महामारी पछि कोरियन एयरले चार्टर उडानको मार्फत काठमाडौ उडान गर्दै आएको थियो । यसरी गरिएको उडानमा यात्रुहरुले एकतर्फी उडान गर्दा सस्तोमा १० लाख ९० हजार वन (१ लाख ९ हजार रुपैयाँ) दुई तर्फी उडान भर्ने यात्रुले १९ लाख वन (१ लाख ९० हजार ) तिर्दै आएका थिए । चर्को शुल्क तिरे पनि कहिले उडान रद्द हुने र कहिले उडान तालिका परिवर्तन भइरहने समस्या भोग्दै आएका थिए ।

कोरोना संक्रमणकाल भन्दा पहिले एकातर्फी उडानका लागि ६ लाख ८० हजार वन (६८ हजार रुपैया) दुई तर्फी उडान गर्ने यात्रुले ८ लाख ६० हजार (८६ हजार रुपैया) मात्रै यात्रुले तिरे पनि इकोनोमी क्लासको टिकट पाइन्थ्यो ।

कोरियन एयरले नियमित उडान गर्ने भए शुल्क केही कम हुने भए पनि पहिलेकै शुल्क भन्दा बढि नै मूल्य तोकिएको छ । अगस्ट महिनाको लागि भनेर कोरियन एयरले एकतर्फी उडानका लागि ईकोनोमी क्सासको टिकट सबै भन्दा सस्तो ९ लाख वन (९० हजार) तोकेको छ भने दुई तर्फी उडानका लागि १६ लाख वन (१ लख ६० हजार) लाग्ने जनाएको छ ।

प्रकाशित : असार ८, २०७९ १६:१३
प्रतिक्रिया
पठाउनुहोस्

जनकपुरधाममा युवा वैज्ञानिक सम्मेलन

कान्तिपुर संवाददाता

काठमाडौँ — वैज्ञानिक सोचलाई जनतामाफ पुर्‍याउने उद्देश्यसहित मधेस प्रदेशको जनकपुरधाममा यही असार ९ र १० गते राष्ट्रिय युवा वैज्ञानिक सम्मेलन सुरु हुने भएको छ । सम्मेलनमा देशभरबाट १५० जना युवा वैज्ञानिकहरु भेला हुने आयोजक राष्ट्रिय युवा परिषद् नेपालले जनाएको छ ।

विद्यालयदेखि विश्वविद्यालयसम्म अध्ययन गर्ने अनुसन्धानकर्ता, विद्यार्थी र युवाहरुलाई अनुसन्धान विचार र परियोजनाहरु मार्फत देशमा विज्ञान, प्रविधि र नवप्रवर्तन गतिविधिहरुमा संलग्न गराउने हेतुले सम्मेलनको आयोजना गरिएको अनुसन्धानकर्ता टीकाराम भण्डारीले बताए । युवा वैज्ञानिकहरुलाई आविष्कार, उद्यमशिलताका लागि सशक्तिकरण गर्ने, मधेस प्रदेशका युवा वैज्ञानिकहरुको राष्ट्रिय आवश्यकता र आकांक्षा अनुसार अनुसन्धान र आविष्कारका सम्भावित क्षेत्रहरुको पहिचान गर्ने, देशका विभिन्न भाग र विषयका युवा वैज्ञानिकहरुबीच अन्तरक्रिया, मित्रता र एकतालाई बढावा दिने उनले बताए ।

विज्ञान सम्मेलनबाट मधेश प्रदेश सरकारको तर्जुमा र रणनीति निर्माणका लागि सम्बन्धित क्षेत्रमा मार्गदर्शनका रुपमा उपयोगी हुन सक्ने ठोस सिफारिसहरु पनि ल्याइने उनले जनाएका छन् ।

सम्मेलनमा कृषि र वन, जीवन र औषधि विज्ञान, कम्प्युटर र सूचना प्रविधि, इन्जिनियरिङ र रोबोटिक्स, ऊर्जा र वातावरण, न्यानो र उदयीमान प्रविधिहरु, पृथ्वी विज्ञान, परम्परागत प्रविधिहरु, विज्ञान र समाज सम्बन्धीका प्रस्तुतिहरु रहेका छन् । युवा वैज्ञानिकहरुले मौखिक, पोस्टर वा सामाग्री प्रदर्शन गर्ने छन् ।

यस्तै, विज्ञान तथा प्रविधिका विभिन्न क्षेत्रका विज्ञहरुसँग प्यानल छलफल पनि हुनेछ । यसअघि परिषद्ले प्रदेश नम्बर १ मा सम्मेलनको आयोजना गरेको थियो ।

प्रकाशित : असार ८, २०७९ १६:१२
पूरा पढ्नुहोस्
प्रतिक्रिया
पठाउनुहोस्
×