बेलायती प्रधानमन्त्रीलाई नेपाल भ्रमणको निम्तो- प्रवास - कान्तिपुर समाचार
कान्तिपुर वेबसाईट
AdvertisementAdvertisement

बेलायती प्रधानमन्त्रीलाई नेपाल भ्रमणको निम्तो

कान्तिपुर संवाददाता

लन्डन — गैरआवासीय नेपाली संघका अध्यक्ष कुल आचार्यले बेलायती प्रधानमन्त्री बोरिस जोन्सनलाई नेपाल भ्रमणको निम्तो दिएका छन् । आचार्यले जोन्सनको आसन्न दक्षिण एसिया भ्रमणका क्रममा नेपालमा पनि आउन आउन निम्तो दिएका हुन् । 

बेलायती प्रधानमन्त्री बोरिस जोन्सन । तस्बिर : रोयटर्स

नेपाल र बेलायतबीचको मित्रवत् सम्बन्ध विश्वमा उदाहरणीय रहेको भन्दै बेलायतमा नै व्यवसाय गरिरहेका आचार्यले गोर्खा सैनिकमार्फत सम्बन्ध अझ प्रगाढ बनेको बताए ।

भूकम्प जाँदा होस् या कोरोना महामारीजस्ता हरेक कठिनाइमा बेलायतले नेपाललाई गरिरहेको सहयोगप्रति धन्यवाद व्यक्त गर्दै नेपाल-बेलायत सम्बन्धलाई अझ उचाईमा पुर्‍याउनका लागि नेपालको छिमेकी देश भारत भ्रमण गर्दैगर्दा नेपालको पनि भम्रण गर्न उनले निम्तो दिएका हुन् ।

बेलायत नेपालको सबैभन्दा ठूलो विकास साझेदार रहेको र दुई देशबीच उच्च स्तरमा भेटवार्ता हुन सके एक-आपसमा चौतर्फी सहयोग र विकासका आयामहरू अघि बढ्ने आचार्यले बताएका छन् ।

नेपाल र बेलायतको २०० वर्षको इतिहासमा बेलायती राजपरिवारको नेपाल भ्रमण पटक-पटक भए पनि प्रधानमन्त्रीको भम्रण हालसम्म नभएको भन्दै दुई देशबीचको ऐतिहासिक सम्बन्धलाई थप सुदृढ बनाउनका लागि उनले जोन्सनलाई नेपाल भ्रमणको निम्ता दिएका हुन् ।


प्रकाशित : वैशाख ७, २०७९ १५:५०
प्रतिक्रिया
पठाउनुहोस्

वातावरण विश्‍वविद्यालय खोल्‍न माग

कान्तिपुर संवाददाता

काठमाडौँ — युवा वातावरणविद्हरूले नेपालमा वातावरण विश्वविद्यालय खोल्नुपर्ने माग अघि सारेका छन् । वातावरणीय मुद्दाहरू नेपालमा अझै पनि मूलधारको रुपमा उठ्न नसकेको भन्दै उनीहरूले विश्वविद्यालय खोलेर जानुपर्ने बताएका हुन् ।

राजधानीको स्कुल अफ इन्भारोन्मेन्टल साइन्स एन्ड म्यानेजमेन्ट‍(स्किम्स)मा आयोजित कार्यक्रममा वातावरणविद्हरूले नेपालको वातावरणीय समस्याहरू मूलधारमा आउन नसकेको, वातावरणीय शिक्षा अझ विशिष्टीकृत गर्नुपर्ने भन्दै विश्वविद्यालयको माग गरेका हुन् । स्किम्स आल्मुनी एसोसिसएसनका अध्यक्षसमेत रहेका वातावरणविद् पुरुषोत्तम महतले भने, 'हाम्रोमा वातावरणीय समस्या र मुद्दाहरूलाई हल्का रुपमा लिइयो । वातावरणीय शिक्षालाई पनि त्यति महत्त्व दिइएको छैन । अब वातावरण विश्वविद्यालय जरुरी भइसक्यो । ' कृषि र वन विश्वविद्यालयले गरेअनुसारकै वातावरण विश्वविद्यालय खोल्न सकिने उनले बताए ।

यस्तै, वातावरण क्षेत्रमा विकृति बढेको भन्दै 'वातावरण काउन्सिल'को आवश्यकता रहेको उनीहरुले औंल्याएका छन् ।

कार्यक्रममा वाग्मती प्रदेशका सांसद राजेन्द्र गुरुङले संवेदनशील क्षेत्र भए पनि वातावरणलाई बेवास्ता गरिएको बताए । 'वातावरणलाई राज्यले पनि पर्याप्त ध्यान दिएको छैन, ' प्रदेशको उद्योग, वन तथा वातावरण समितिको सदस्यसमेत रहेका सांसद गुरुङले भने, 'वातावरणका लागि भनेर पनि सरकारले बजेट सीमित गरेको छ । वातावरण समितिलाई पनि त्यति महत्त्व दिइएको छैन । ' उनले पनि वातावरणीय समस्या र मुद्दाहरुलाई सम्बोधन गर्न सरकारले कदम चाल्नुपर्ने बताए ।

कार्यक्रममा स्किम्स आल्मुनीले उत्कृष्ट विद्यार्थीहरूलाई सम्मान गरेको थियो ।

प्रकाशित : वैशाख ७, २०७९ १५:४३
पूरा पढ्नुहोस्
प्रतिक्रिया
पठाउनुहोस्
×