कोरियाले सन् २०२२ मा नेपालीसहित ६६ हजार कामदार ल्याउने- प्रवास - कान्तिपुर समाचार

कोरियाले सन् २०२२ मा नेपालीसहित ६६ हजार कामदार ल्याउने

गोकुल थोकर

सोल — दक्षिण कोरियाले रोजगार अनुमति प्रणाली (ईपिएस) अन्तरगत सन् २०२२ मा ६६ हजार विदेशी कामदार भित्र्याउने भएको छ । शुक्रबार बसेको विदेशी कामदार कोटा निर्धारण समितिको बैठकले आगामी वर्षका लागि यो कोटा निर्धारण गरेको हो ।



कोरियाले नेपालसहित पाकिस्तात, श्रीलङ्का, बंगलादेश, भियतनाम, फिलिपिन्स, उज्बेकस्थान, कम्बोडियासहित १६ वटा देशबाट विदेशी कामदार ल्याउने गर्छ । सन् २०२२ को लागि उत्पादनमूलक क्षेत्रमा ४३ हजार, कृषि तथा पशुपालन क्षेत्रमा ९ हजार ९ सय ३० जना विदेशी कामदार कोरिया आउन पाउने छन् ।

माछापालन क्षेत्रमा ४ हजार ६ सय ४० जना तथा निर्माण क्षेत्रमा ३ हजार ९ सय ७० जना विदेशी कामदार कोरिया आउने छन् । त्यस्तै सेवा क्षेत्रमा २ सय ६० जना विदेशी कामदार भित्र्याउने निर्णय गरेको छ ।

उक्त कोटामध्ये कोरियाली भाषा पास गरेर बसेका नयाँ कामदारको रुपमा ४२ हजार ५ सय ३० जना र २३ हजार ४ सय ७० कमिटेड (प्रतिबद्ध कामदार) कामदारको रुपमा कोरिया आउन पाउने छन् ।

यस्तै एक वर्ष कुनै कम्पनीमा निरन्तर काम गरे कम्पनीले चाहेमा कमिटेड कामदारको रुपमा डाक्नसक्ने नियम रहेको छ । नेपालबाट कोरोना महामरीभन्दा पहिले बर्सेनि ५ हजारभन्दा बढी कामदार कोरिया आउने गरेका थिए ।

कृषि र उत्पादनमुलक क्षेत्रमा मात्रै आउने भए पनि नेपाली कामदारको संख्या उल्लेखनीय रहँदैआएको छ । महामरीका कारण लामो समयदेखि रोकिएको नयाँ तथा कमिटेड कामदार ल्याउने कार्य अहिले सुचारु भइरहे पनि यो वर्ष सिमित मात्र कामदार कोरिया आएका छन् ।

यो वर्ष ५२ हजार कामदार कोरिया ल्याउने योजना भए पनि कोरोना महामरीका कारण सम्भव नभएकोले सन् २०२२ का लागि विदेशी कामदारको कोटा बढाएर ६६ हजार पुर्‍याएको हो । गत वर्ष पनि ५६ हजार कोटा निर्धारण गरिएकोमा ३० हजार कामदार मात्रै कोरिया आएका थिए ।

यस्तै तत्कालको लागि कामदारको अभाव नहोस् भनेर जनवरी १ देखि अप्रिल १२ तारिखसम्म भिसा अवधि सकिन लागेका विदेशी कामदारहरूलाई थप १ वर्ष बस्न दिने निर्णय गरेको कोरियाली श्रम मन्त्रालयले जनाएको छ ।

प्रकाशित : मंसिर २५, २०७८ १६:४७
प्रतिक्रिया
पठाउनुहोस्

ईपीएस कामदार नोभेम्बर अन्तिम सातादेखि कोरिया आउन पाउने

गोकुल थोकर

सोल,दक्षिण कोरिया — दक्षिण कोरियाली सरकारले कोरोना महामारीका कारण २० महिनादेखि रोकिइरहेका रोजगार अनुमति प्रणाली (ईपीएस) अन्तर्गतका कामदारलाई नोभेम्बरको अन्तिम सातादेखि लैजाने भएको छ । यहाँको श्रम मन्त्रालयले शुक्रबार जारी गरेको नयाँ निर्णय अनुसार ईपीएसमार्फत कोरिया आउने १६ वटै देशबाट कामदार ल्याउन लागिएको हो  ।

लामो समयदेखि कोरियामा ईपीएस अन्तर्गत नयाँ कामदार आएका छैनन् । नेपाल लगायतका केही देशबाट कमिटेड कामदार नगन्य मात्रामा आएको भएपनि लामो समयदेखि विदेशी कामदार नआउँदा यहाँको कृषि र उत्पादनमूलक क्षेत्रमा कामदारको अभाव रहँदै आएको छ । प्रत्येक वर्ष ५० हजारभन्दा बढी ईपीएस प्रणाली अन्तर्गत नयाँ तथा कमिटेड कामदार आउने कोरियामा कोरोना संक्रमण बढेसँगै विदेशी कामदार ल्याउन रोकिएको थियो । नेपालबाट पनि प्रत्येक वर्ष ५ हजार भन्दा बढी कामदार कोरिया आउने गर्थे ।

कामदार अभावलाई कम गर्नका लागि कोरियाली सरकारले तीन महिनाको भिसा दिएको थियो । त्यस अवधिमा पनि कोरोना महामारीको कम नभएको भन्दै कोरियामा रहेका ईपीएस अन्तर्गतका भिसा सकिन लागेका कामदारलाई एक वर्षको विशेष भिसा पनि दिएको छ ।

केही सयम अघिदेखि कमिटेड कामदारहरु कोरिया आउन दिने नियम बनाएको भएपनि कोटा प्रणालीमा कामदार कोरिया आउन पाउँथे । कोरोना महामारीविरुद्ध राम्रा काम गरेका नेपाल लगायतका पाँच वटा देशबाट एक दिनमा १ सय र हप्तामा ६ सयभन्दा कम कामदारलाई कोरिया आउने अनुमति थियो । यसै नियमअनुसार कमिटेड नेपाली कामदार पनि कोरिया आइसकेका छन् ।

अहिले कोरियाली सरकारले कोरियामा रहेका ८० प्रतिशत जनताले कोरोनाविरुद्धको पहिलो खोप लगाइसकेको र ७५.५ प्रतिशतले खोपको पूरै मात्रा लगाएको जनाउँदै जनजीवन महामारी अघिकै अवस्थामा फर्काउन खुकुलो नियम ल्याएको छ । ‘लिभिङ बिथ कोभिड–१९’ भन्ने मूल नारासहित खुकुलो नियम लागू भएको छ ।

त्यस्तै यहाँ रहेका अधिकांश नेपालीले पनि कोरोनाविरुद्धको भ्याक्सिन लगाइसकेका छन् । कोरियाली सरकारले यही वर्षको अन्तिमसम्म कोरियामा रहेका सबै नागरिकलाई भ्याक्सिन लगाउने नीति बनाएपछि यहाँ रहेका नेपालीले पनि कोरोना विरुद्धको भ्याक्सिन लगाउन पाउने भएका हुन् ।

यहाँ ४० हजारभन्दा बढी नेपाली रहेका छन् । रोजगार अनुमति प्रणाली (ईपीएस) मार्फत काम गर्न आएका कामदार ३५ हजार भन्दा बढी रहेका छन् भने अध्ययन, व्यवसाय र अन्य पेशामा भएका नेपालीको संख्या ५ हजारभन्दा बढी छन् ।

कुनै शुल्क नलाग्ने भ्याक्सिन कोरियामा ९० दिनभन्दा बढी समय रहेका सबै विदेशीले पनि लगाउन सक्नेछन् । अहिले कोरियामा २० लाखभन्दा बढी विदेशी रहेका छन् ।

प्रकाशित : कार्तिक २०, २०७८ १३:१०
पूरा पढ्नुहोस्
प्रतिक्रिया
पठाउनुहोस्
×