लकडाउनबीच अस्ट्रेलियामा दसैंको उल्लास- प्रवास - कान्तिपुर समाचार

लकडाउनबीच अस्ट्रेलियामा दसैंको उल्लास

नारायण खड्का

अस्ट्रेलिया — कोरोनाका कारण अन्य वर्षजस्तै साथीभाईसँग रमाइलो गर्न नपाएपनि अस्ट्रेलियाका नेपालीले दसैं उल्लासका साथ मनाएका छन् । अहिलेपनि भिक्टोरिया लगायतका केही राज्यमा लकडाउन जारी रहेपनि नेपालीले आफ्नै परिवारसँग मात्र भएपनि दसैं मनाइरहेका छन् ।

नेपालीको जनसंख्या बढेसँगै अस्ट्रेलियामा दसैंतिहारको महत्त्व बढेको मात्र छैन कि स्थानीय तथा केन्द्रीय राजनीतीज्ञको नजरमा समेत यो पर्व पर्न थालेको छ । यसवर्षको दसैंको अस्ट्रेलियाका प्रतिपक्षी दलका लेबरका नेता एन्थोनी अल्बानिजमात्र नभएर भिक्टोरिया, दक्षिण अस्ट्रेलिया लगायतका राज्य प्रमुख, मन्त्री लगायतले समेत प्राथमिकताका साथ नेपालीलाई शुभकामना बाँडेका थिए ।

नेपालीले समेत परम्पारगत रुपमा मनाइदै आएको दसैंलाई मिलेसम्म आफ्ना मान्यजनको हातबाट टीका तथा जमरा थापेर दसैं मनाएका थिए । लकडाउनका घोषणा गरिएका राज्यका नेपालीले आफ्नै परिवारसँग दसैं मनाएका थिए भने अन्य राज्यमा रहेका नेपालीले आफन्त तथा ठूलाबडाको हातबाट टीका तथा जमरा थापेका थिए ।

पछिल्लो समयमा दोस्रो पुस्ताका नेपाली बालबालिका हुर्कन्दै जान थालेपछि यसलाई आफ्नो कलासंस्कृति दोस्रो पुस्तालाई हस्तान्तरण गर्ने अवसरका रुपमा समेत लिन थालिएको छ ।

आफ्ना बालबालिकालाई दसैंतिहार जस्ता पर्वको महत्त्व बुझाउने मात्र नभएर कसरी र किन मनाउने भनेर सिकाउन समेत थालिएको छ । झन त्यसमा नेपालबाट आएका अभिभावकले महत्वपूर्ण भूमिका खेलिरहेका छन् ।


प्रकाशित : आश्विन २९, २०७८ १९:०३
प्रतिक्रिया
पठाउनुहोस्

वडाध्यक्षले बाँडे २ वर्षको तलब वृद्धवृद्धा र असहायलाई

भवानी भट्ट

कञ्चनपुर — कञ्चनपुरको भीमदत्त नगरपालिका–१ का वडाध्यक्षले आफ्नो २ वर्षको तलबभत्ता वृद्धवृद्धा र असहायलाई वितरण गरेका छन् ।

वडाध्यक्ष आशिफ कुंवर (भुन्टु)ले यसै साता आफ्नो वडाभित्रका सबै वृद्धवृद्धा र अपांगता भएकाहरुलाई वडा कार्यालयबाटै तलब वापतको ३ लाख ९२ हजार रुपैयाँ वितरण गरेका हुन् ।

यस्तै ७० वर्ष पूरा भएर पनि नागरिकताका आधारमा सामाजिक सुरक्षा भत्ता पाउनबाट बञ्चित रहेकाहरुलाई पनि वडाध्यक्ष कुंवरले आर्थिक सहयोग गरेका हुन् ।

नागरिकतामा ७० वर्ष नपुगेका तर वास्तविक उमेर ७० पूरा भएका १५ जनालाई १५ सयका दरले र सामाजिक सुरक्षा भत्ता बुझ्ने १ सय २७ जनालाई ३ हजारका दरले दसैंको अवसरमा सोमबार रकम वितरण गरेका हुन् । यस्तै पूर्ण अपांग भएका २४ र दृष्टिविहीन २ गरी २६ जनालाई दुई/दुई हजार रकम वितरण गरेका हुन् ।

अध्यक्ष कुंवरले स्थानीय तहको निर्वाचका बेला मत माग्दा गरेको प्रतिवद्धता अनुसार नै तलब भत्ता वितरण गरेको बताएका छन् ।

उनले यसअघि पनि वृद्धवृद्धा र अपांगता भएकाहरुलाई आफ्नो तलब वितरण गरेका थिए । तर पछिल्लो पटक कोरोना संक्रमणका कारण दुई वर्षदेखि वितरण हुन नसकेको रकम अहिले एकैपटक वितरण गरिएको उनले बताए ।

प्रकाशित : आश्विन २९, २०७८ १८:२९
पूरा पढ्नुहोस्
प्रतिक्रिया
पठाउनुहोस्
×