जीएफसी कप सिम्रिक फुटबल क्लबलाई- प्रवास - कान्तिपुर समाचार

जीएफसी कप सिम्रिक फुटबल क्लबलाई

कान्तिपुर संवाददाता

अस्ट्रेलिया — अस्ट्रेलियाको ब्रिसबनमा आयोजना गरिएको जीएफसी कप स्थानीय सिम्रिक फुटबल क्लबले जितेको छ । कोरोना माहामारीबिच समेत आयोजना गरिएको उक्त प्रतियोगितामा विभिन्न स्थानका १२ क्लबले सहभागिता जनाएका थिए ।

ब्रिसबनमा रहेका नेपाली फुटबल क्लबबीच आयोजना गरिएको प्रतियोगितामा विभिन्न ३ समूहमा प्रतिस्पर्धा गराइएको थियो । जित हासिल गरेको सिम्रिक क्लबले प्रतियोगितामा कुनै हार ब्योहोरेन । क्लबले उपाधिसँगै ३ हजार डलर र कप जितेको हो ।

यहाँस्थित गोर्खा फुटबल क्लबले आयोजना गरेको प्रतियोगितामा उपविजेता फरेभर योङ फुटबल क्लबले १ हजार डलर र ट्रफी हात पारेको थियो । प्रतियोगितामा बेस्ट गोलकिपर विजेता क्लबका शैलेन्द्र बस्नेत बनेका थिए भने फाइनल प्रतियोगिताको प्लेयर अफ द म्याच नरेन्द्र रावलले पाए । प्रतियोगिताको प्लेयर अफ द टुर्नामेन्ट फरेभर योङ फुटबल क्लबका रोशन न्यौपानेले हात पारे ।

आयोजकले ब्रिसबनमा रहेका नेपाली फुटबल खेलाडीलाई स्थान दिन र नयाँ प्रतिभालाई अघि आउन प्रेरित गर्ने उद्देश्यका साथ प्रतियोगिता आयोजना गरिएको जनाएको छ । प्रतियोगितामा स्थानीयका साथै नेपाली दर्शकको राम्रो सहभागिता रहेको थियो ।

प्रकाशित : आश्विन ६, २०७८ १६:२०
प्रतिक्रिया
पठाउनुहोस्

अस्ट्रेलियाको भिक्टोरियामा अहिलेसम्मकै ठूलो भूकम्प

नारायण खड्का

अस्ट्रेलिया — अस्ट्रेलियाको भिक्टोरियास्थित मेलबर्नमा बुधबार ५ दशमलव ९ रेक्टर स्केलको भूकम्प गएको छ । करिब २ सय किलोमिटर टाढा इपिसेन्टर रहेको उक्त भूकम्पबाट कुनै मानवीय क्षति नभएको अधिकारीहरूले जनाएका छन् ।

बुधबार बिहान करिब ९.१५ तिर गएको अहिलेसम्मकै ठूलो भएको समाचारमा जनाइएको छ । जियोसाइन्स अस्ट्रेलियाले जनाए अनुसार उक्त भूकम्प ५ दशमलव ९ म्याग्नेच्युटको रहेको मापन गरिएको छ । भूकम्पका कारण कुनै मानवीय क्षति नभएपनि दर्जनौं भवनमा भने क्षति पुगेको छ ।

पहिलो भूकम्पपछि मेलबर्नका नागरिकले थप ६ वटा पराकम्पको महसुस गरेका छन् । भिक्टोरियाका आपतकालीन सेवाका प्रमुख अफिसर टीम विबुसले भूकम्पका कारण घरमा सामान्य क्षति पुगेको भन्दै करिब १ सयवटा सहयोगका लागि अनुरोध आएको बताएका छन् ।

उनले अहिलेसम्म कसैलाई पनि चोटपटक लागेको खबर नआएको तर मेलबर्न सहर तथा इपिसेन्टर रहेको म्यान्सफिल्डका केही भवनमा क्षति पुगेको जनाएका छन् ।

भूकम्पको कम्पन छिमेकी राज्य एडिलेड, क्यानबेरा, उत्तरी तास्मानियासम्म महसुस गरिएको समाचारमा जनाइएको छ । अमेरिका भ्रमणमा रहेका प्रधानमन्त्री स्कट मरिसनले सरकारले तदारुकताका साथ हरेक सहयोग पुर्‍याउने बताएका छन् ।

प्रकाशित : आश्विन ६, २०७८ १६:११
पूरा पढ्नुहोस्
प्रतिक्रिया
पठाउनुहोस्
×