एनआरएनए अस्ट्रेलियामा नयाँ नेतृत्व- प्रवास - कान्तिपुर समाचार

एनआरएनए अस्ट्रेलियामा नयाँ नेतृत्व

नारायण खड्का

अस्ट्रेलिया — प्रवासी नेपालीहरुको संगठन एनआरएनए अस्ट्रेलियाको अध्यक्षमा नन्द गुरुङ निर्वाचित भएका छन् । शनिबार भएको निर्वाचनमा वर्तमान प्रवक्ता रहेका गुरुङले प्रतिद्वन्द्वी डा. ज्ञानेन्द्र रेग्मीलाई करिब ३ हजार मतान्तरले हराउँदै विजयी बनेका हुन् ।

निर्वाचन परिणामपछि दक्षिण अस्ट्रेलियामा अध्यक्ष निर्वाचित रेणुका लामा ।

हरेक दुई वर्षमा आयोजना गरिने एनआरएनए अस्ट्रेलियाको निर्वाचन यस वर्ष कोरोना भाइरसका कारण सरकारले केही राज्यमा लकडाउन घोषणा गरेकाले पूर्णरुपमा अनलाइनमार्फत आयोजना गरिएको थियो । १५ हजार ३ सय मतदाता रहेकोमा जम्मा १४ हजार २ सय १३ ले मत हालेका थिए । ८ आईसीसी सदस्यसहित ६ राज्य तथा दुई टेरिटोरीमा उपाध्यक्षसहितको कार्यसमितिका लागि निर्वाचन भएको थियो । निर्वाचन समितिका सचिव सुजित सिग्देलका अनुसार महासचिवमा राजु अधिकारी, सचिव सन्ध्या शाह, कोषाध्यक्ष अनिल पोखरेल, सहकोषाध्यक्ष राजकुमार नगरकोटी र युवा संयोजकमा बबिन मिश्र र सचिवमा क्षितिज बुढाथोकी निर्वाचित भएका छन् । महिलाको संगठन नारी निकुञ्जमा सिड्नीकी मोनी लिम्बुलाई पराजित गर्दै एडिलेडकी मञ्जु खड्का विजयी भएकी छिन् ।

न्युसाउथ वेल्समा वर्तमान संयोजक देव गुरुङ विजयी बनेका छन् भने सुकृति राज्यलक्ष्मी भट्ट, विनोद कुँवर, राकेश जोशी र भावना श्रेष्ठ क्रमश: सहसंयोजक, सचिव, सहसचिव र कोषाध्यक्षमा छानिएका छन् । त्यस्तै, अस्ट्रेलियन क्यापिटल टेरिटोरीको संयोजकमा अशोक बस्नेत, सहसंयोजक विक्रम सुवेदी, सचिव काशी भुसाल, सहसचिव सीता पौडेल सापकोटा र कोषाध्यक्षमा विशाल कँडेल चुनिएका छन् । नर्दन टेरीटोरीको संयोजक, सहसंयोजक, सचिव, सहसचिव र कोषाध्यक्षमा क्रमश: विष्णु चापागाईं, सञ्जिव गोर्खाली, शिवराम पौडेल, आकाश बिसी र विजय शर्मा छन् भने क्विन्सल्यान्डमा विनोदभक्त आचार्य, शम्भु घैसे, अतुल खड्का, श्यामकुमार बस्नेत र सन्तोष पौड्याल क्रमश: संयोजक, सहसंयोजक, सचिव, सहसचिव र कोषाध्यक्षका रुपमा निर्वाचित बनेका छन् ।

शनिबार नै घोषणा गरिएको नतिजा अनुसार दक्षिण अस्ट्रेलियाको संयोजक रेणुका लामा, सहसंयोजक सञ्जय पुरी, सचिव विनोद बानियाँ, सहसचिव शंकर भट्टराई र कोषाध्यक्ष विष्णु चापागाईं छन् । भिक्टोरियामा निर्वाचनअघि नै सर्वसम्मत रुपमा नेतृत्वको चयन गरिएको थियो । जसमा संयोजक, सहसंयोजक, सचिव, सहसचिव र कोषाध्यक्षमा क्रमश: हरि खड्का, नारायण कटुवाल, गणेश कँडेल, दीपक अधिकारी र हेमराज पौडेल छन् ।

यसैगरी पश्चिम अस्ट्रेलियामा समेत सर्वसम्मत गरिएको थियो जसमा दीपक बस्नेत, सुनिल श्रेष्ठ, प्रमेश केसी, गोपाल शर्मा र महेश लामा संयोजक, सहसंयोजक, सचिव, सहसचिव र कोषाध्यक्षमा चुनिएका छन् भने तास्मानियाको अध्यक्षमा राकेश शाक्य, सहसंयोजकमा जगदीश खड्का, सचिव लोकेन विष्ट, सहसचिव चन्द्रकृष्ण हाइजु र कोषाध्यक्षमा गणेश घिमिरे निर्वाचित बनेका छन् । नयाँ कार्यसमितिलाई केही समयपछि सामूहिक कार्यक्रमको आयोजना गरेर पद हस्तान्तरण गरिने बताइएको छ ।

प्रकाशित : श्रावण १७, २०७८ १०:५६
प्रतिक्रिया
पठाउनुहोस्

वाचा गरेअनुसार खोप उपलब्ध गराउन नसकेको भन्दै अस्ट्रेलियाका प्रधानमन्त्री मरिसनले मागे माफी

नारायण खड्का

अस्ट्रेलिया — अस्ट्रेलियाली प्रधानमन्त्री स्कट मरिसनले सरकारले वाचा गरेअनुसार समयमै कोरोना भाइरसविरुद्धको खोप आफ्ना नागरिकलाई दिन नसकेकोमा क्षमायाचना गरेका छन् । मरिसनले आफू उक्त कार्यमा पछि परेको भए पनि त्यसलाई सफल बनाउन लागिपरेको बताएका छन् । 

अस्ट्रेलियाका प्रधानमन्त्री स्कट मोरिसन तस्बिर : रोयटर्स

पछिल्लो केही सातादेखि कोरोना भाइरसको ‘डेल्टा भेरियन्ट’ को संक्रमणसँग अस्ट्रेलिया जुधिरहेको छ । अस्ट्रेलियाका तीन राज्य अहिले पूर्ण लकडाउनमा छन् । न्यु साउथ वेल्स, भिक्टोरिया र दक्षिण अस्ट्रेलियामा डेल्टा भेरियन्ट देखिएपछि लकडाउन घोषणा गरिएको छ । अहिले सरकारले करोडौं डलर बराबरको राहत कार्यक्रमसमेत घोषणा गरेको छ ।

प्रधानमन्त्री मरिसनले आफूले जनतालाई वाचा गरेको समयमा खोप उपलब्ध गराउन नसकेकोमा जिम्मेवारी लिँदै बिहीबार माफी मागेका हुन् । उनले आफूले घोषणा गरेको खोप कार्यक्रमलाई अझ प्रभावकारी बनाउनका लागि अन्य फार्मेसीलाई समेत आफ्नो कार्यक्रममा समावेश गराइने बताए ।

‘म वास्तवमै तपाईंहरुसँग क्षमा चाहन्छु किनकी हामीले पहिले घोषणा गरेको खोप कार्यक्रमलाई पूरा गर्न सकेनौं,’ प्रधानमन्त्री मरिसनले बिहीबार आयोजना गरिएको पत्रकार सम्मेलनमा भने । उनले बुधबारमात्र आफ्नो कार्यक्रम सोचेको समयभन्दा २ महिना पछि सरेको बताएका थिए । मरिसनले सरकारले यही अक्टोबरसम्ममा योग्य सबै नागरिकलाई पहिलो खेपको खोप लगाइने बताएका थिए । तर उक्त कार्यक्रम यस वर्षको अन्त्यसम्ममा पूरा गर्ने नयाँ लक्ष्य लिइएको छ ।

अस्ट्रेलियाका विपक्षी दललगायतले सरकार आफ्ना नागरिकलाई खोप दिलाउने मामिलामा ढिला भएको आरोप लगाउँदै आएका छन् । यसका साथै उनलाई खोप कार्यक्रमलाई सोचेजति सफलता दिन नसकेकोमा जिम्मेवारी लिनसमेत दबाब परेको थियो । जसका कारण प्रधानमन्त्री मरिसनले बिहीबार उक्त ढिलाइका लागि जिम्मेवारी लिँदै माफी मागेका हुन् ।

अस्ट्रेलियाले आफ्नै देशमा उत्पादित एस्ट्राजेनेका खोपको राम्रो सदुपयोग गरेर सबै नागरिकलाई समयमै खोप लगाइसक्ने योजना बनाएको भए पनि उक्त खोपका कारण स्वास्थ्य समस्या देखिएपछि सो खोप लगाउने उमेरको सुझावमा फेरबदल गरेको थियो । जसका कारण समेत सरकारले आफूले तोकेको समयमा आफ्ना नागरिकलाई खोप लगाउन नभ्याएको समाचारमा जनाइएको छ । यसका साथै अहिलेसम्म भाइजर भ्याक्सिनले मात्र अनुमति पाएको र उक्त भ्याक्सिनको आपूर्तिमा केही समस्या देखिएकाले समेत अस्ट्रेलियाले आफ्नो खोपको लक्ष्य प्राप्त गर्न नसकेको विश्लेषण गरिएको छ । तर पनि अहिलेसम्म करिब आधा नागरिकले पहिलो डोज खोप लगाइसकेको अवस्थामा समेत विपक्षीलगायतले खोप कार्यक्रमका लक्ष्यका बारेमा प्रश्न उठाएपछि प्रधानमन्त्री मरिसनले माफी मागेका हुन् ।

अस्ट्रेलियामा बिहीबार मात्र करिब १ सय ५० नयाँ कोरोना भाइरसको संक्रमण देखिएको स्थानीय सञ्चारमाध्यमले जनाएका छन् । जसमध्ये सबैभन्दा धेरै न्यु साउथ वेल्समा १ सय २४ सय भिक्टोरियामा २८ वटा छन् ।

नयाँ संक्रमणसँगै ६ राज्य तथा टेरिटोरी रहेको अस्ट्रेलियाका विभिन्न राज्य तथा टेरिटोरीले आन्तरिक सीमामा आवातजावतलाई बन्द गर्नुका साथै सुरक्षा संयन्त्रलाई समेत बढाएका छन् । यसको प्रत्यक्ष प्रभाव प्रवासी नेपालीको निर्वाचनमा समेत परेको छ । यसैका कारण निर्वाचन पहिलो पटक पूर्ण रुपमा अनलाइन गरिने निर्वाचन समितिका सुजित सिग्देलले बताएका छन् ।

प्रकाशित : श्रावण ७, २०७८ १४:१३
पूरा पढ्नुहोस्
प्रतिक्रिया
पठाउनुहोस्
×