'चीनको गरिबी निवारण अनुभव विश्वकै लागि अनुकरणीय'- प्रवास - कान्तिपुर समाचार

'चीनको गरिबी निवारण अनुभव विश्वकै लागि अनुकरणीय'

लक्ष्मी लम्साल

बेइजिङ — चीनका लागि नेपाली राजदूत महेन्द्रबहादुर पाण्डेले चीनको गरिबी निवारणको अनुभव विश्वकै लागि अनुकरणीय रहेको बताएका छन् ।

बुधबार बेइजिङमा चीनको गरिबी निवारण कोष अन्तर्गत नेपाल कार्यालय स्थापनाको पाचौं वार्षिकोत्सवका उपलक्ष्यमा आयोजित कार्यक्रममा पाण्डेले भने, ‘चीनले विगत ४ दशकको अवधिमा ८ सय मिलियन नागरिकलाई गरिबीमुक्त गर्दाको अनुभव सिक्न लायक छ ।’

कोभिड १९ महामारीका बीचमा पनि नेपालमा स्वच्छता तथा स्वास्थ्यका विभिन्न क्षेत्रमा कोषले देखाएको सक्रियताको प्रशंसा गर्दै पाण्डेले नजिकको छिमेकी भएको नाताले नेपालले बीआरआईबाट प्रचुर फाइदा लिनसक्ने बताए । चीनको साझा मानव भाग्य समुदाय निर्माणको अभियानमा नेपालको पनि समर्थन रहेको बताउँदै भिडियो सन्देश मार्फत् राजदूत पाण्डेले हिमालय पार बहुआयामिक सम्पर्क संजाल दुवै मुलुकको हितमा रहेको उल्लेख गरे ।

नेकपाकी नेतृ एवं पूर्वमन्त्री पम्फा भुसालले भिडियो सन्देश दिँदै समकालीन दुनियाँमा चीन मात्रै गरिबी निवारणमा नमूनायोग्य भएको बताइन् । चीनले जनताको जीवनस्तर उकास्न गरेको योगदान अतुल्य रहेको उनको भनाइ थियो । ‘नेपालमा शिक्षा, स्वास्थ्य र सीप विकास लगायतका क्षेत्रमा चीनको गरिबी निवारण कोष अन्तर्गत नेपाल कार्यालयले जुन ढंगको काम गरेको छ त्यो नेपालीले पनि सिक्नलायक छ,’ उनले भनिन् ।

नेपालमा १८ प्रतिशतभन्दा बढी गरिबीको रेखामुनि रहेको जनसंख्यालाई गरिबीमुक्त पार्न चीनको सहयोग अभूतपूर्व रहेको बताउँदै उनले अझै केही समय चिनियाँ सहयोग जरुरी रहने बताइन् । असल छिमेकी, मित्र र निःस्वार्थभावको सहयोगी भएकोमा उनले चीनप्रति कृतज्ञता प्रकट गरिन् ।

कार्यक्रममा कोषका लागि नेपाल कार्यालयकी प्रमुख चौ च छियाङले नेपाली बालबालिका तथा महिलाहरूका मुहारमा खुशी ल्याउने अभियानमा समर्थन गरेकोमा नेपाल सरकारप्रति आभार प्रकट गरिन् । उनले भनिन्, ‘नेपालीहरूको जीवनस्तर उकास्न र गरिबी निवारण गर्नका लागि कोषले आफ्नो तर्फबाट प्रयास गर्दै जानेछ ।’

कोषको नेपाल कार्यालयका लागि भिडियो सन्देश पठाएका अभिनेता राजेश हमालले गरिबी निवारणका साथै नेपालका विभिन्न ठाउँमा स्वास्थ्य, शिक्षा र स्वच्छताको क्षेत्रमा गरिरहेको चिनियाँ प्रयासको प्रशंसा गरे । भूकम्पपछिको पुनर्निर्माण र कोभिड महामारीका बेलामा स्वच्छताका लागि कोषले गरेको योगदान सम्झनयोग्य भएको उनले बताए ।

चिनियाँ गरिबी निवारण कोषको नेपाल कार्यालयले आपसी मित्रतालाई सबल पार्दै विपत्तिपछिका परियोजना पुनः निर्माणमा सघाइरहेको जनाएको छ । हाल कोषको अगुवाइमा ३ वटा विद्यालयको पुनर्निर्माण कार्य भइरहेको छ भने स्वास्थ्य तथा स्वच्छता सम्बन्धी कार्यक्रमहरू सञ्चालनमा छन् ।

प्रकाशित : मंसिर १७, २०७७ १७:१३
प्रतिक्रिया
पठाउनुहोस्

पौडेलप्रतिको दुर्व्यवहार र गिरफ्तारी सर्वसत्तावादको संकेत : देउवा

कान्तिपुर संवाददाता

काठमाडौँ — प्रमुख प्रतिपक्षी नेपाली कांग्रेसका सभापति शेरबहादुर देउवाले आफ्नो पार्टीका वरिष्ठ नेता रामचन्द्र पौडेलको गिरफ्तारीलाई आपत्तिजनक र निन्दनीय भनेका छन् । उनले एक विज्ञप्ति प्रकाशित गरी सरकारको यस्तो प्रवृतिविरुद्ध देशव्यापी प्रतिरोध गरिने पनि बताएका छन् । 

गृहजिल्ला तनहुँको दमौलीमा व्यास नगरपालिकाले आयोजना गरेको पुल उद्घाटन कार्यक्रममा सहभागी हुन पुगेका पौडेललाई निषेधाज्ञा उल्लंघन गरेको भन्दै प्रहरीले पक्राउ गरेको हो ।

'तनहुँ जिल्ला ब्यास नगरपालिकाको वडा नं १ र ११ जोड्ने बुल्दी खोलामा नेपाली कांग्रेसकै पालामा निर्माण सम्पन्न भएको पुल आज स्थानीय उपभोक्ता समितिले सर्वसम्मत रुपमा निर्णय गरेर निमन्त्रणा गरे पश्चात् उद्घाटन गर्न जाँदै गर्दा नेपाली कांग्रेसका नेता रामचन्द्र पौडेल माथि गरिएको दुर्व्यवहार र गिरफ्तारी अत्यन्तै आपत्तिजनक छ,' देउवा जारी गरेको विज्ञप्तिमा उल्लेख गरिएको छ ।

'सरकारको यो निन्दनीय ब्यवहारको भत्सर्ना गर्दै तत्काल उहाँलाई रिहा गर्न, अन्यथा उत्पन्न हुने परिस्थिति सामनाका लागि तयार बस्न म सरकारलाई चेतावनी दिन चाहन्छु,' विज्ञप्तिमा भनिएको छ, 'वर्तमान सरकारको अधिनायकवादी आकांक्षाको जगमा भएको यो घटना प्रति कडा विरोध प्रकट गर्दै अधिनायकवादी अभिस्टलाई पूरा हुन नदिन नेपाली कांग्रेस एक ढिक्का भएर शसक्त प्रतिरोध गर्ने चेतावनी दिन चाहन्छु ।'

यस्तै नेताहरु शेखर कोइराला, गगन थापालगायतले पनि सामाजिक संजालमा गिरफ्तारीको विरोध गरेका छन् । 'नेका वरिष्ठ नेता रामचन्द्र पौडेलको गरिफ्तारी र प्रहरी हस्तक्षेप स्थानीय प्रशासनको एकल निर्णय र परिस्थितिजन्य प्रतिक्रिया हुनै सक्दैन, होइन । यो नियोजित हो, राजनीतिक प्रतिशोध हो, शक्ति उन्माद हो । यसले यो सरकारको चरित्रलाई उदांगो बनाएको छ' गगनले ट्विटरमा लेखेका छन् । उनले यो प्रधानमन्त्री केपी ओलीका लागि निकै महंगो पर्ने पनि बताएका छन् ।

प्रकाशित : मंसिर १७, २०७७ १७:१०
पूरा पढ्नुहोस्
प्रतिक्रिया
पठाउनुहोस्
×