कान्तिपुर वेबसाईट
AdvertisementAdvertisement

बेलायतका नेपाली विद्यार्थीलाई राहत

नविन पोखरेल

लन्डन — कोभिड–१९ का कारण समस्यामा परेका बेलायतका विभिन्न विश्वविद्यालयमा अध्ययनरत नेपाली विद्यार्थीलाई राहत वितरण गरिएको छ । बेलायती विश्वविद्यालयका ‘नेपलिज सोसाइटी’ आबद्ध विद्यार्थीहरूको संगठन मर्जिङ नेपसक्सले आर्थिक सहयोग तथा खाद्यान्न वितरण सुरु गरेको हो ।

नेपसक्सका अध्यक्ष पवन कँडेलले ८३ जनालाई जनही ८० पाउन्ड र १९ जनालाई खाद्य सामग्री प्रदान गरिएको जानकारी दिए । उनका अनुसार ३ सय २ विद्यार्थीलाई सहयोगको आवश्यकता देखिएकाले दोस्रो चरणमा पनि राहत बाँड्ने संस्थाको योजना छ । शारीरिक तथा मानसिक स्वास्थ्य समस्या भोगेका ७ विद्यार्थीलाई चिकित्सकको परामर्श उपलब्ध गराउन पनि संस्थाले तयारी गरेको छ ।

संस्थाले नेपाली समुदायबाट करिब १२ हजार पाउन्ड संकलन गरिसकेको छ । बेलायतमा नेपाली विद्यार्थी अलपत्र परेको खबर सार्वजनिक भएपछि लन्डनस्थित नेपाली दूतावासले उनीहरूसँग सम्पर्क र सहयोगका लागि समन्वय गर्न युवा तथा विद्यार्थी सहयोग समिति गठन गरेको थिको । उक्त समितिमा नेपसक्सका अध्यक्ष कँडेल संयोजक छन् ।

नेपसक्सले दूतावासको निर्देशनबमोजिम समस्यामा परेका विद्यार्थीको विवरण अद्यावद्यिक, आर्थिक संकलन र प्राथमिकता निर्धारण गरिरहेको छ ।

उता, एनआरएनए यूकेले पनि अप्ठेरोमा परेका विद्यार्थी तथा भूतपूर्व गोर्खा परिवारलाई राहत तथा सहयोग वितरण सुरु गरेको छ ।

पहिलो चरणमा विभिन्न विश्वविद्यालयमा अध्ययनरत ३० विद्यार्थीलाई राहत तथा करिब ४ सय भूपू गोर्खा एवम् वृद्धवृद्धालाई अत्यावश्यक स्वास्थ्य सामग्री वितरण गरिएको संस्थाले जनाएको छ ।

अहिलेसम्म सम्पर्कमा आएका १ सय ६० विद्यार्थीमध्ये आवश्यकताका आधारमा थप विद्यार्थीलाई राहत बाँड्दै जाने योजना रहेको संस्थाका महासचिव फडिन्द्र भट्टराईले जनाए ।

त्यसै गरी, बेलायतमा कोरोना भाइरस संक्रमणबाट ज्यान गुमाउने तीन नेपालीका परिवारलाई पनि कुल १८ सय पाउन्ड आर्थिक सहयोग गरिएको छ ।

प्रकाशित : वैशाख १५, २०७७ ०९:२२
प्रतिक्रिया
पठाउनुहोस्

कोरोना प्रकोप : बेलायतमा थप तीन साता लकडाउन, मृतकको संख्या १३ हजार नाघ्यो

बेलायतमा रहेका १३ भूपू ब्रिटिस गोर्खाको कोरोनाबाट मृत्यु
नविन पोखरेल

लन्डन — बेलायतले कोरोना भाइरस (कोभिड- १९) संक्रमण नियन्त्रणका लागि लकडाउन ३ साताका लागि थप्‍ने निर्णय गरेको छ ।

विदेशमन्त्री डोमिनिक राबले बिहीबार प्रधानमन्त्री कार्यालय टेन डाउनिङ स्ट्रिटमा आयोजित दैनिक ‘कोरोनाबारे ब्रिफिङ’ का क्रममा ‘लकडाउन’ थपिएको घोषणा गरेका हुन् ।

कोभिड- १९ फैलन सुरु भएपछि गत २३ मार्चमा बेलायतमा पहिलो पटक लकडाउन गरिएको थियो । पहिलो ३ साताको लकडाउन समीक्षापछि संक्रमण अझै नियन्त्रणमा नआएकाले जनस्वास्थ्य र आर्थिक नोक्सानीबाट जोगाउन समयावधि बढाइएको सरकारले जनाएको छ ।

लकडाउन खुकुलो गर्दा अहिलेसम्मको बलिदानी र प्रगति व्यर्थ हुने जाने विदेशमन्त्री राबले बताए ।

दैनिक मृत्युदर घटेको अवस्थामा, बेलायतको राष्ट्रिय स्वास्थ्य सेवा (एनएचएस) ले संक्रमितको चाप धान्न सक्ने अवस्था, परीक्षण र व्यक्तिगत सुरक्षा उपकरण (पीपीई) मागको सहज आपूर्ति, कोरोना भाइरस पुनः फैलन नसक्ने अवस्थाको सुनिश्चिततापछि लकडाउन खुकुलो गर्न सकिने मन्त्री राबको भनाइ थियो ।

बेलायतमा कोभिड- १९ का कारण शुक्रबार बिहानसम्म अस्पतालमा मात्रै १३ हजार ७ सय ५९ जनाको मृत्यु भइसकेको छ । 'केयर होम'मा मर्नेको संख्या उपलब्ध छैन ।

लकडाउन अवधिमा अत्यावश्यक खाद्यान्‍न किनमेल, दैनिक व्यायाम, औषधि उपचार र अत्यावश्यक सेवामा काम गर्ने कर्मचारीबाहेक अरुलाई बाहिर निस्कन अनुमति छैन । सरकारको नियम पालना नगर्नेलाई दण्ड जरिवाना गर्न र भीडभाड हटाउन प्रहरीलाई अधिकार दिएको छ । अहिले व्यापार व्यवसाय, स्कुल, विश्वविद्यालय सबै बन्द छन् ।

१३ नेपालीको मृत्यु

कोरोना भाइरसका कारण बिहीबारसम्म १३ नेपालीको मृत्यु भइसकेको लन्डनस्थित नेपाली दूतावासले जनाएको छ । मृत्यु हुनेमा अधिकांश भूतपूर्व ब्रिटिस गोर्खा सैनिक छन् । दूतावासले सबैलाई सतर्क रहन र अत्यावश्यक काम बाहेक अरु बेला घरैमा बसेर संक्रमण नियन्त्रणमा सघाउन आग्रह गरेको छ ।

लन्डन बरो अफ बार्नेट काउन्सिलका उपमेयर लक्ष्य गुरुङले दिनदिनै भूतपूर्व गोर्खाहरूको निधन भइरहेको बताए । ‘गोर्खा वृद्धवृद्धामा यो समस्या झन् जटिल बन्दैछ,' पूर्वगोर्खा सैनिक गुरुङले भने, ‘हाम्रो काउन्सिलमा र्‍यापिड रेस्पोन्स टिमले अप्रेसन रुम खडा गरी काम गरिरहेको छ । स्वयंसेवकहरूले 'बार्नेट कम्युनिटी हब'मा बूढाबूढीलाई सहयोग गरिरहेकाले कोही नेपाली समस्यामा भए सम्पर्क गर्न अनुरोध छ ।’

बार्नेट काउन्सिलले ७० वर्ष काटेका करिब ४३ सय दीर्घरोगी वृद्धवृद्धालाई घरमै खाद्यान्न, औषधि पुर्‍याउने काम गरिरहेको पनि उनले जनाए । उक्त क्षेत्रमा बन्टोक नेपाली समाजले समेत स्वयंसेवक समूह खडा गरी संक्रमितको हेरचाह गरिरहेको छ ।

नेपाली दूतावास, एनआरएनए यूके, मर्जिङ नेपसक्सलगायत जातीय तथा सामाजिक संघसंस्थाले पनि प्रकोपका कारण समस्यामा परेका नेपालीलाई सहयोग गरिरहेका छन् ।

प्रकाशित : वैशाख ५, २०७७ ०६:४७
पूरा पढ्नुहोस्
प्रतिक्रिया
पठाउनुहोस्
×