साम्राज्ञी लन्डनमा
(लन्डन) — तेस्रो पटक लन्डन आइपुगेकी छन् अभिनेत्री साम्राज्ञी राज्य लक्ष्मी शाह । यसपटक उनको एउटै लक्ष्य छ लन्डन घुम्ने । ‘यसअघि जहिल्यै काम लिएर आएकाले राम्रोसँग घुम्न पाएकी थिइनँ,’ उनले सुनाइन्, ‘बेलायतमा मारुनीको केही सोबाहेक मज्जाले घुम्ने मुड बनाएकी छु ।’
यद्यपि, कुन लोकेसन जाने त्यो दिमागमा आइसकेको रहेनछ । देशबाहिर अस्ट्रेलिया, जापानपछि ‘मारुनी’ को सोका लागि उनी निर्मात्री पुनम क्षेत्री गौतमका साथ लन्डन आएकी हुन् । ‘बेलायतको नेपाली समुदाय ज्यादै सपोर्टिभ छ,’ उनको अनुभव छ, ‘नेपाली समुदायकै मायाले मारुनी बेलायतमा पनि देखाउने योजना बनेर यता आयौं ।’
साम्राज्ञीका फिल्म दर्जन पनि छैनन् । भुवन केसीको ‘ड्रिम्स’ बाट डेब्यु गरेकी उनीमाथि महँगी अभिनेत्रीको ट्याग छ । संख्यात्मक रूपमा थोरै फिल्म हुनुपछाडि उनी उत्कृष्ट मात्र रोज्छिन् वा डिमान्ड नै कम छ ? ‘म क्वान्टिटीभन्दा क्वालिटीमा विश्वास गर्छु,’ सुनाइन्, ‘फिल्म खेल्न विचार त गर्नुपर्छ । स्क्रिप्ट, टिम, ब्यानर, निर्देशक सबै पक्षमा सजग हुन जरुरी छ किनकि नेपाली फिल्म रुचाएर दर्शक हलसम्म आउन थालेको धेरै भएको छैन ।’ उनले फिल्ममा हास्य कुरा मात्र बढिरहेको बेला संवेदनशील विषयमा ‘मारुनी’ राम्रो बनेको बताइन् । बेलायतमा ‘मारुनी’ को पहिलो सो अल्डरसटमा सम्पन्न भइसकेको छ भने आगामी आइतबार उलविचमा प्रदर्शनको तयारी छ ।
प्रकाशित : फाल्गुन १४, २०७६ ०७:५१