सिड्नीमा एक नेपालीको मृत्यु, हत्याको आशंकामा श्रीमती प्रहरी नियन्त्रणमा

प्रहरीले जारी गरेको सूचना अनुसार घटना शनिबार राति साढे सात बजे भएको थियो । श्रीमान श्रीमती नै घाइते भएपछि स्थानीय वेस्टमिड अस्पताल लगिएको भएपनि गौतमको मृत्यु भएको थियो । घाइते श्रीमतीलाई उपचारपछि प्रहरीले घरेलु हिंसा अन्तर्गतको हत्या आरोपमा पक्राउ गरेको उल्लेख गरिएको छ । उनको जमानत समेत अस्वीकार भएको छ भने आइतबार स्थानीय पारामाटा अदालतमा प्रस्तुत गरिने प्रहरीले जनाएको छ । कम्बरल्याण्ड प्रहरीले घटनाको अनुसन्धान गरिरहेको जनाइएको छ ।

स्थानीय वेस्ट युनाइटेड क्रिकेट क्लबका खेलाडी समेत रहेका गौतम मिलनसार र सबै साथीभाईहरुसँग मिल्ने व्यवहारको रहेको नेप्लिज क्रिकेट एसोसिएसन अस्ट्रेलियाका पूर्व अध्यक्ष रुपक चुडालले बताए । केही वर्षअघि नेपाली क्रिकेट एसोसिएसनबाट ‘इमर्जिङ युथ प्लेयर’ को उपाधि समेत पाएका थिए । करिब ४ बर्षदेखि ब्रिसबनबाट बसाई सरेर सिड्नी आएका उनको आफ्नै अटोमोबाईल्सको व्यवसाय रहेको थियो ।

घटनाका बारेमा क्यानबेरास्थित नेपाली दूतावासले औपचारिक जानकारी पाइनसकेको बताएको छ । सिड्नीमै रहेका अस्ट्रेलियाका लागि नेपाली राजदुत महेश दहालले अनौपचारिक रुपमा घटनाका बारेमा सुनेपनि अहिलेसम्म औपचारिक जानकारी नपाएको बताए ।