बेइजिङमा सुन्दर नेपालको चित्रण

लक्ष्मी लम्साल

बेइजिङ — नेपाल भ्रमण वर्ष २०२० को पूर्वसन्ध्यामा चीनको राजधानी बेइजिङस्थित प्रमुख पर्यटकीय गन्तव्य समर प्यालेस (गृष्म प्रासाद)मा बिहीबारदेखि २ साता लामो ‘सुन्दर नेपाल’ विषयक फोटो प्रदर्शनी सुरु भएको छ।

नेपालका प्राकृतिक तथा सांस्कृतिक सौन्दर्य झल्किने करिब ६० वटा फोटोहरु आसन्न भ्रमण वर्षलाई लक्षित गरेर प्रदर्शन गरिएको बेइजिङस्थित नेपाली दूतावासका मिसन उपप्रमुख सुशील कुमार लम्सालले बताए।


प्रदर्शनीस्थल सन् १६४४ देखि १९११ सम्म तत्कालीन छिङ् राजवंशकालमा गृष्म ऋतुमा राजपरिवारले विश्राम गर्ने दरबारलाई रोजिएको छ। लम्सालले भने, ‘प्रत्येक दिन हजारौँ चिनियाँ तथा अन्य देशका पर्यटकले भ्रमण गर्ने गृष्म दरबारको खुन्मिङ तालको किनारैकिनार राखिएको छ।’


नेपालको परम्परा एवं कलासंस्कृति, जनजीवन, प्राकृतिक छटा र अनुपम धरोहर झल्काउने तस्बिरहरुले नेपाल भ्रमणअघि चिनियाँ पर्यटकमाझ नेपाललाई अझ राम्रोसँग चिनाउन सघाउने उनले बताए।


नेपालको प्राकृतिक, सांस्कृतिक तथा ऐतिहासिक सम्पदाबारे उजागर गर्नका लागि प्रदर्शनीमा कुमारी, पोखरा, हिमाल, तरेली परेका पहाड, ताल, काठमाडौँ उपत्यकाका दरबार परिसर, वन्यजन्तु, साहसिक खेल, चराचुरुङ्गी, नेपाली खाना आदि फोटोहरु राखिएको छ।


नेपाली दूतावाससँग फोटो प्रदर्शनीको लागि समन्वय गरेको वैदेशिक मित्रताका लागि बेइजिङ जनसंघका उपाध्यक्ष सु पनशङले फोटो प्रदर्शनीबाट चिनियाँ जनताले नेपालबारे धेरै कुरा थाहा पाउनसक्ने बताए। उनले भने, ‘प्रदर्शनीले नेपालबारेको चिनियाँ बुझाईलाई थप फराकिलो बनाउनेछ।’


बेइजिङका प्रमुख पर्यटकीय स्थलहरूमा ग्रेटवाल, थ्यानआनमन जत्तिकै समर प्यालेस पनि लोकप्रिय गन्तव्य मानिन्छ। फोटो प्रदर्शनी आगामी नोभेम्बर ७ तारिखसम्म चल्नेछ।

प्रकाशित : कार्तिक ७, २०७६ १६:१२
ADVERTISEMENT
प्रतिक्रिया
पठाउनुहोस्

स्वी छिङलाई पछ्याउन हतारिए चिनियाँँ

लक्ष्मी लम्साल

(बेजिङ) — नेपाल भ्रमण वर्ष २०२० का लागि चिनियाँ सद्भावना दूत नियुक्त भएपछि अभिनेत्री स्वी छिङलाई पछ्याउन हजारौं चिनियाँ हतारिएका छन् । उनीहरूको यो हतारो चिनियाँ ट्वीटर मानिने ‘वैपो’ मा देखिएको छ । 

सामाजिक सञ्जालमा उनले फोटोसहित आफ्नो प्रतिक्रिया लेखेकी थिइन् । केही घण्टामै लाखौं शुभेच्छुकहरूले उनीप्रति सद्भाव र गौरव लागेको भन्दै नेपाल यात्राका लागि व्यग्र प्रतीक्षा गरिरहेको उल्लेख गरेका छन् । चिनियाँ रंगमञ्चमा निकै लोकप्रिय यी अभिनेत्रीका लाखौं प्रशंसक छन् । उनको यो नियुक्तिप्रति सौन्दर्य देवी, चिनियाँकी गौरव, रहस्यमयी सुन्दरी, अद्भूत प्रतिभाशालीजस्ता विशेषण प्रयोग गरेर धेरै वैपो प्रयोगकर्ताहरूले प्रशंसा गरेका छन् ।

चिनियाँ समयअनुसार आइतबार दिउँसो सवा १ बजेतिर उनले नेपाल र चीनबीचको मित्रता युगौंदेखि पुरानो रहेको उल्लेख गर्दै एउटा स्टाटस वैपोमा पोस्ट गरेकी थिइन् । उनले लेखिन्, ‘नेपाल र चीनबीचको युगौं पुरानो मित्रता छ । हिमालय क्षेत्र रहस्य र सौन्दर्यले भरिएको छ । नेपाल भ्रमण वर्ष २०२० को सद्भावना दूत बन्न पाएकामा अत्यन्त सम्मानित महसुस गरेकी छु ।’

अभिनेत्री स्वी छिङले पोस्ट गरेको केही घण्टामै हजारौंले रिट्वीट गरेका छन् भने उत्तिकै संख्यामा कमेन्ट र लाइकहरू देखिएका छन् । अधिकांश प्रयोगकर्ताले नेपालको भ्रमण गर्न आतुर रहेको प्रतिक्रिया दिएका छन् भने कतिपयले मन्त्री योगेश भट्टराई र स्वी छिङ सँगसँगै भएको तस्बिर पोस्ट गर्दै ‘राम्रो’ देखिएको टिप्पणी लेखेका छन् ।

युआन अर नाम गरेकी वैपो प्रयोगकर्ताले भ्रमण गर्न मन पराउने अभिनेत्रीका लागि पर्यटन दूत बन्नु निकै सान्दर्भिक अवसर भएको उल्लेख गरेकी छन् । अधिकांश प्रयोगकर्ताले जस्तै उनले स्वीलाई चिनियाँ गौरवको संज्ञा दिएकी छिन् । स्याउ चिङ नाम गरेकी वैपो प्रयोगकर्ता लेख्छिन्, ‘समय भएमा नेपाल यात्राको ‘ब्लग’ पोस्ट गर्नुहोस्, हामी पनि हेरौं, नेपाल कस्तो छ ?’

‘रहस्यले भरिएको देश नेपाल’, अर्का प्रयोगकर्ता समरले लेखेकी छन्, ‘मेरो नयाँ यात्राको पवित्र गन्तव्य ।’ आफ्नो विदेश यात्राको एउटा गन्तव्य थपिएको भन्दै उनले स्वीबाट प्रभावित भएको जनाउ दिएकी छन् ।

नेपालकी दुलही भन्दै जेडवाईडब्लू एलडी नाम गरेका प्रयोगकर्ताले नेपालको प्राकृतिक दृश्यको भ्रमण पर्खिरहेको प्रतिक्रिया लेखेका छन् । त्यस्तै स्याउ याथौ थोङले लेखेकी छन्, ‘रहस्यमयी तथा विशेष नेपाल, रहस्यमयी तथा विशेष तिमी ।’

यो पोस्ट सार्वजनिक हुँदासम्म स्वी छिङका वैपो फलोअरको संख्या १ करोड ६८ लाख ५५ हजारभन्दा बढी पुगेको छ । शनिबार काठमाडौंमा आयोजित एक कार्यक्रमकाबीच चिनियाँ तथा हलिउड अभिनेत्री स्वीलाई नेपाल भ्रमण वर्ष सद्भावना दूत घोषणा गरिएको थियो ।

सन् १९६९ मा बेइजिङमा जन्मिएकी स्वी छिङले ‘पियान्चौ पियान्छाङ (लाइफ अन अ स्ट्रिङ)’ नामक चलचित्रबाट डेब्यु गरेकी थिइन् । हलिवुड तथा चिनियाँ चलचित्र दुनियाँमा निरन्तर सक्रिय स्वीको पछिल्लो उपलब्धि ‘गुड अगेन्स्ट एभिल’ नाम चलचित्र गत वर्ष ५५औं ताइवान गोल्डेन हर्स अवार्डमा छानिनु थियो । यसबाहेक उनीद्वारा अभिनित नाटक, टेलिचलचित्रलगायत कलाकर्म राष्ट्रिय तथा अन्तर्राष्ट्रिय पुरस्कारका लागि छानिएका थिए ।

प्रकाशित : कार्तिक ४, २०७६ ११:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×