बेइजिङमा सुन्दर नेपालको चित्रण

लक्ष्मी लम्साल

बेइजिङ — नेपाल भ्रमण वर्ष २०२० को पूर्वसन्ध्यामा चीनको राजधानी बेइजिङस्थित प्रमुख पर्यटकीय गन्तव्य समर प्यालेस (गृष्म प्रासाद)मा बिहीबारदेखि २ साता लामो ‘सुन्दर नेपाल’ विषयक फोटो प्रदर्शनी सुरु भएको छ।

नेपालका प्राकृतिक तथा सांस्कृतिक सौन्दर्य झल्किने करिब ६० वटा फोटोहरु आसन्न भ्रमण वर्षलाई लक्षित गरेर प्रदर्शन गरिएको बेइजिङस्थित नेपाली दूतावासका मिसन उपप्रमुख सुशील कुमार लम्सालले बताए।

प्रदर्शनीस्थल सन् १६४४ देखि १९११ सम्म तत्कालीन छिङ् राजवंशकालमा गृष्म ऋतुमा राजपरिवारले विश्राम गर्ने दरबारलाई रोजिएको छ। लम्सालले भने, ‘प्रत्येक दिन हजारौँ चिनियाँ तथा अन्य देशका पर्यटकले भ्रमण गर्ने गृष्म दरबारको खुन्मिङ तालको किनारैकिनार राखिएको छ।’

नेपालको परम्परा एवं कलासंस्कृति, जनजीवन, प्राकृतिक छटा र अनुपम धरोहर झल्काउने तस्बिरहरुले नेपाल भ्रमणअघि चिनियाँ पर्यटकमाझ नेपाललाई अझ राम्रोसँग चिनाउन सघाउने उनले बताए।

नेपालको प्राकृतिक, सांस्कृतिक तथा ऐतिहासिक सम्पदाबारे उजागर गर्नका लागि प्रदर्शनीमा कुमारी, पोखरा, हिमाल, तरेली परेका पहाड, ताल, काठमाडौँ उपत्यकाका दरबार परिसर, वन्यजन्तु, साहसिक खेल, चराचुरुङ्गी, नेपाली खाना आदि फोटोहरु राखिएको छ।

नेपाली दूतावाससँग फोटो प्रदर्शनीको लागि समन्वय गरेको वैदेशिक मित्रताका लागि बेइजिङ जनसंघका उपाध्यक्ष सु पनशङले फोटो प्रदर्शनीबाट चिनियाँ जनताले नेपालबारे धेरै कुरा थाहा पाउनसक्ने बताए। उनले भने, ‘प्रदर्शनीले नेपालबारेको चिनियाँ बुझाईलाई थप फराकिलो बनाउनेछ।’

बेइजिङका प्रमुख पर्यटकीय स्थलहरूमा ग्रेटवाल, थ्यानआनमन जत्तिकै समर प्यालेस पनि लोकप्रिय गन्तव्य मानिन्छ। फोटो प्रदर्शनी आगामी नोभेम्बर ७ तारिखसम्म चल्नेछ।

प्रकाशित : कार्तिक ७, २०७६ १६:१२
ADVERTISEMENT
प्रतिक्रिया
पठाउनुहोस्

लिफ्टले थिचेर मजदुरको मृत्यु

कान्तिपुर संवाददाता

दमक — लिफ्टले थिचेर झापाको दमकमा बिहिबार एक मजदुरको मृत्यु भएको छ । दमक–६ स्थित डिम्याक्स कम्प्लेक्सको निर्माणाधीन भवनको लिफ्टले थिचेर पाँचथर घर भइ दमक-८ मा बस्दै आएका ३० वर्षीय सन्तोष मगरको मृत्यु भएको इलाका प्रहरी कार्यालय दमकले जनाएको छ । 

प्रतिकात्मक तस्बिर ।

लिफ्ट मर्मत गर्ने क्रममा लिफ्ट अकस्मात चलेपछि ग्रिलको काम गरिरहेका मगरलाई लिफ्टले थिचेको थियो ।

बिहान ८.३० बजे सो दुर्घटनाबाट सख्त घाइते भएका मगरलाई दमकस्थित लाइफलाइन अस्पतालमा पुर्याइएको भएपनि उपचार हुन नसकेपछि धरानस्थित वीपी कोइराला स्वास्थ्य विज्ञान प्रतिष्ठान पठाइएको थियो ।

घाइतेको प्रतिष्ठानमा उपचारका क्रममा बिहान ११ बजे मृत्यु भएको दमकका डीएसपी विजयकुमार पण्डितले बताए ।

प्रकाशित : कार्तिक ७, २०७६ १५:४९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×