सामान्य कामदार सरह नै नेपाली सुरक्षा गार्ड मलेसिया जान पाउने, अरु कामदार सरह नै सुविधा पाउने

नेपाल र मलेसियाबीच पुत्राजयमा बिहीबार सम्पन्न संयुक्त कार्यदल समुहको बैठकमा यस्तो सहमति भएको हो । मलेसियाले नेपालबाट मात्रै सुरक्षा गार्ड लैजाने गरेको छ । मलेसियास्थित नेपाली दूतावासका अनुसार मलेसियामा झन्डै ४० हजार नेपाली कामदार कार्यरत छन् ।

‘अब मलेसियामा आउने सुरक्षा गार्डले पाउने न्युनतम तलब ११ सय रिंगेट पाउने भएको छ । मलेसियाको श्रम कानुनबाट पाउने सबै सुविधाहरु पाउनेछन्,’ मलेसियास्थित नेपाली राजदूत उदयराज पाण्डेले भने, ‘यसअघि सुरक्षा गार्डहरुले पाउने तलब निश्चित थिएन । जे पायो त्यही थियो । कुनै हिसाब थिएन ।’

पाण्डेले सुरक्षा गार्ड पनि शुन्य लागतमा आउने बाटो खुलेको बताए । कल्याणकारी कोष, बिमा, राहदानी र अभिमुखीकरण तालिको लागि कामदारले बढीमा ५०५ रिङगेट लाग्ने भएको छ ।