भ्रमण वर्ष प्रवर्द्धन गर्न बेलायतमा पैदल यात्रा

कान्तिपुर संवाददाता

लण्डन — नेपाल भ्रमण वर्ष २०२० प्रवर्द्धन गर्ने उद्देश्यले वेल्सको ब्रेकनमा ३ दिने क्याम्पिङ र हाइक फर नेपाल (लामो दूरीको पैदल यात्रा) गरिएको छ।

पोखरेली मन्च यूके र वी विल राइज फाउन्डेसनको संयुक्त आयोजनामा अगस्ट २ देखि ४ तारिखसम्म आयोजित 'हाइक फर नेपाल' कार्यक्रमले संयुक्त अधिराज्यको वेल्सलाई नेपालमय बनायो ।

बेलायतभरबाट सहभागी हुन आएका विभिन्न उमेर समूहका करिब ३०० जना पैदल यात्रीहरुले वेल्सको लाङ्गघोर्स माउन्टेनमा ९ किलोमिटर लामो पैदल यात्रा उत्साहका साथ पूरा गरे। सहभागी ४ वर्षका बालकदेखि स्वदेशी/बिदेशी जेष्ठ नागरिकको पनि उपस्थिति थियो।

नेपाल सरकारले घोषणा गरेको 'नेपाल भ्रमण वर्ष २०२०' प्रवर्द्धन अभियानलाई सक्दो सहयोग गर्ने दायित्व संसारभर रहेका प्रवासी नेपालीहरुको पनि रहेको उल्लेख गर्दै हाइकिङ कार्यक्रमका प्रमुख संयोजक खुशीमान गुरुङले आगामी वर्षहरुमा पनि यसलाई निरन्तरता दिइने बताए ।

आयोजना स्थलमा नेपालको मानचित्र, शान्तिका अग्रदूत भगवान गौतम बुद्धको आकृति र भूकम्पले तहसनहस पारेको ३ करोड नेपालीको अमूल्य धरोहर धरहरा निर्माण गरी विश्व शान्तिका लागी दीप प्रज्वलन समेत गरिएको थियो । भूकम्पमा ज्यान गुमाउनेहरुको स्मृतिसँगै नेपालकै पहिचान बनेको उक्त धरहरा यथासक्य छिटो निर्माण सम्पन्न गरियोस् भन्ने सन्देश स्वरुप सोको प्रतिमूर्ति बनाइएको पोखरेली मञ्चका अध्यक्ष मानप्रसाद गुरुङले बताए। आयोजनास्थल नेपालमय बनाउन र सो सन्देश दिन करिब ६ मिटर (१८ फिट) अग्लो धरहरा गुरुङ आफैले निर्माण गरेका थिए।

कार्यक्रममा मुख्य अतिथि बेलायतका लागि नेपाली राजदूत डा. दुर्गाबहादुर सुबेदीले यस्ता कार्यक्रमले निरन्तरता पाइरहनु पर्ने उल्लेख गर्दै माउन्ट एभरेष्ट नामाकरण गर्ने सर जर्ज एभरेष्ट बेलायतकै भएकाले पनि दुई देशको सम्बन्ध थप गहिरो बनेको बताए ।

'नेपालका लागि सँगसँगै पाईला चालौं' भन्ने नाराका साथ भूकम्पपछि थलिएको नेपालको पर्यटन प्रर्वद्धन हेतु वि विल राइजको पहलमा हङकङबाट सुरु भएको हाइक फर नेपाल तेस्रोपटक बेलायतको वेल्समा आयोजना गरिएको हो ।

बिदेश बसे पनि हरेक नेपालीले आफ्नो देशका लागि केही गर्नुपर्छ भन्ने दायित्वबोध गराउने खालका यस्ता कार्यक्रम संसारभर आयोजना गर्न सकिने जनाउँदै हङकङबाट सहभागिता जनाउन आएका फाउण्डेसनका संस्थापक तुलसी गुरुङले सबैलाई आआफ्नो स्थानबाट मुलुकका लागी सकेको पहल गर्न अनुरोध गरे ।

आयोजक पोखरेली मञ्चका अध्यक्ष मानप्रसाद गुरुङले यस्ता कार्यक्रमले नेपालीहरुबीच सद्भाव, भातृत्व र सौर्हदता बढाउने मात्र नभएर नेपालप्रति चासो र चिन्तन जगाउने एवं पर्यटनको विकासमा पनि महत्वपूर्ण भूमिका खेल्ने जनाए ।

ब्यस्त बेलायती जीवनशैलीबाट केही दिन उम्किएर ३ दिने क्याम्पिङ र हाइकिङमा बेलायतभरबाट आएका सहभागीले भरपूर आनन्द उठाए। शहरको कोलाहलबाट टाढा शान्त, सुन्दर डाडाकाडांले घेरिएको ब्रेकनको लोङ्गघार्स चढ्दा अधिकांशले गाउँघरको तिर्सना मेटिएको बताए भने युवा र बालबालिकाले कम्तीमा वर्षको एक पटक स्वदेश जानुपर्छ भन्ने प्रेरणा मिलेको बताए ।

आयोजनास्थल सुन्दर शहर ब्रेकन र धम्पुसबीच गत फेब्रुअरीमा मितेरी साइनो पनि गाँसिएकोले ब्रेकनबासीको मनमा नेपालप्रति थप माया, सद्भाव र चासो बढेको छ।कार्यक्रममा ब्रेकनका मेयर काउन्सिलर एन माथिएज, धम्पूस र ब्रेकन ट्वीनिङ कमिटी यूकेका अध्यक्ष काउन्सिलर डेविड मेडिरिथ, गत मे १९ मा सर्वाेच्च शिखर सगरमाथाको सफल आरोहण गरेका क्याप्टेन गेथिन डेभिस लगायत थुप्रै स्थानीय र विदेशीहरु सहभागिता रहेकाे थियो ।

प्रकाशित : श्रावण २१, २०७६ १२:३०
प्रतिक्रिया
पठाउनुहोस्

गहना लुटेर दिदीबहिनीको हत्या प्रयास 

वसन्तप्रताप सिंह

बझाङ — १३ वर्षीया सुनिता ओली र २२ वर्षीया दिदी विमला केदारस्युँ गाउँपालिकाको झोता बजारबाट थलारा जाँदै थिए । माइती आएकी विमलालाई पुर्याउन साथमा सुनिता गएकी थिइन् । सोमबार साँझ ६ बजेतिर थलारा गाँउपालिकाको सँडिल निर पुग्दा दुई युवाले बाटो छेके । 

‘तपाइँहरुको घर कता हो ? कहाँ हिँडेको भनेर एउटाले सोध्दै थियो अर्कोले दिदीको टाउकोमा ढुङ्गाले बजार्यो । दिदी ठाउँको ठाउँ ढलिन्’ जिल्ला अस्पतालमा भेटिएकी घटनाको प्रत्यक्षदर्शी समेत रहेकी घाइते सुनिताले भनिन्, ‘सोध्ने मान्छेले मेरो घाँटी अठ्याएर टाउकोमा ढुङ्गाले जथाभावी हान्यो । म पनि ढले । मलाई उठाएर खोलातिर फाल्न खोजेको याद छ । त्यस पछि बेहोस भएछु ।’ होस खुल्दा सुनिताले आफूलाई अस्पतालको बेडमा पाइन् । आधा घाँटी रेटिएको अवस्थामा छेउको बेडमा दिदीलाई देखे पछि उनी फेरि बेहोस भइन् ।

माइतीबाट जाँदै गरी यी दिदीबहिनीको साथमा रहेका गरगहना, नगद र मोबाइल लुटेराले लुटिसकेको रहेछ । ढुङ्गाले टाउको फुटाएर खोलामा धकेले पछि सुनितालाई मरिसक्यो भन्ने ठानेका लुटेराहरुले विमलाको घाँटी टिनको पाताले आधा रेटेर छोडेको अवस्थामा स्थानीयले भेटाएका थिए ।

घाँटी रेटिएकी विमलाको अवस्था गम्भीर छ । उनीहरु दुवै जनालाई थप उपचारका लागि नेपालगञ्ज रिफर गरिएको जिल्ला अस्पतालका डाक्टर मिलन रावलले बताए । केदारस्युँकी विमलाको गत वैसाखमा मात्र थलारा गाउँपालिकामा विवाह भएको थियो ।

घाइते भएकी सुनिता ओली जिल्ला अस्पतालमा उपचारको क्रममा । तस्बिर : वसन्तप्रताप सिंह

यसरी दिनदहाडै लुटपाट र हत्या प्रयास भएको बझाङमा यो पहिलो घटना भएको जिल्ला प्रहरी कार्यालयले जनाएको छ । घटनामा संलग्न रहेकाहरुको पहिचान भैसकेको र उनीहरुको खोजी कार्य भइरहेको डिएसपी सूर्यबहादुर केसीले बताए । स्थानीयहरुका अनुसार लुटपाट र हत्या प्रयासमा संलग्न भएका व्यक्तिहरु थलारा गाउँपालिकाकै हुन ।

दिउँसै भएको यो घटनाका कारण थलारा गाउँपालिका भरी त्रास फैलिएको स्थानीयले बताएका छन् । यो घटनाका कारण यहाँका महिलाहरु एक्लै दुक्लै हिडडुल गर्न पनि डराइरहेको स्थानीय बाबु सिंहले बताए । उनले भने, ‘मानिसहरु मेलापात जान पनि डराइरहेका छन् । दिनदहाडै यस्तो घटना होला भनेर कसैले कल्पना नै गरेको थिएन । हिडडुल गर्न पनि डराउनु पर्ने अवस्था आएको छ ।’

प्रकाशित : श्रावण २१, २०७६ १२:२०
पूरा पढ्नुहोस्
प्रतिक्रिया
पठाउनुहोस्