जोन्सनलाई बधाईसँगै गोर्खाले माग तेर्स्याए

कान्तिपुर संवाददाता

लन्डन — ब्रिटिस गोर्खा सत्याग्रह संयुक्त संघर्ष समितिले बेलायतका नवनियुक्त प्रधानमन्त्री बोरिस जोन्सनलाई बधाई दिँदै आफ्ना माग अघि सारेको छ । समितिका पदाधिकारीले बिहीबार प्रधानमन्त्री कार्यालय पुगेर शुभकामना तथा ज्ञापनपत्र बुझाएका हुन् ।

ज्ञापनपत्रमा १९९३ को सेप्टेम्बर ३० भन्दा पहिले ब्रिटिस सेनामा भर्ती भएका गोर्खा सैनिक मारमा परेको उल्लेख छ। समितिले ब्रिटेनमा भएका कयौं भूतपूर्व गोर्खा नेपाल फर्कन इच्छुक रहेको तर नाम मात्रको पेन्सनले गर्दा त्यसो गर्न नसकेको जनाइएको छ।

सत्याग्रहले भूतपूर्व गोर्खा सैनिकलाई बेलायतमा पेन्सन क्रेडिट र हाउजिङ बेनिफिट दिएर राख्नुभन्दा पेन्सनवृद्धि गर्नु उपयुक्त हुने सुझाव पनि दिएको छ।

गोर्खा सत्याग्रह समितिका प्रमुख संयोजक कृष्णबहादुर राईद्वारा हस्ताक्षरित ज्ञापनमा आफ्ना समस्याबारे अवगत गराउन प्रधानमन्त्रीसँग समय पनि मागिएको छ। त्यस्तै नेपाल तथा ब्रिटेनबीच वार्ताद्वारा ऐतिहासिक अन्यायको समस्या समाधान गर्न पनि माग गरिएको छ।

जोन्सनले लन्डन मेयर हुँदा भूपू गोर्खाहरुका गुनासा सुनेको स्मरण गराउँदै सत्याग्रह समितिले प्रधानमन्त्री भएपछि पनि उनले सकारात्मक कदम चाल्ने अपेक्षा व्यक्त गरेको छ।

भूपू गोर्खाहरुले प्रधानमन्त्री जोन्सनले ब्रेक्जिट मुद्दा चाँडै टुंगोमा पुर्‍याएर बेलायती जनताको हितका लागि काम गर्ने विश्वास पनि व्यक्त गरेका छन्।

प्रधानमन्त्री केपी ओली बेलायत भ्रमणमा आउँदा जुन दोस्रो साता निवर्तमान प्रधानमन्त्री टेरेजा मेसँग भेटघाट गरी नेपाल, भारत र बेलायतबीच सन् १९४७ नोभेम्बरमा भएको सन्धि पुनरावलोकन गर्न ध्यानाकर्षण गराएका बताइएको थियो।

ओलीले उक्त सन्धि त्रिपक्षीय होइन, द्विपक्षीय र परिमार्जित गरिनुपर्नेबारे ध्यानाकर्षण गराएको लन्डनस्थित दूतावासले जानकारी दिएको थियो। नवनियुक्त प्रधानमन्त्रीले भूपू गोर्खाहरुका गुनासा कसरी हेर्ने हुन् चासोको विषय छ।

सन् १९४७ मा भारत स्वतन्त्र हुने बेला ब्रिटेन, भारत तथा नेपालबीच भएको त्रिपक्षीय सन्धिको एनेक्स ३ मा सम्बन्धित मुलुकहरुले गोर्खा सैनिकहरुलाई आफ्ना सैनिकसरह व्यवहार गर्नु पर्ने उल्लेख छ। साथै गोर्खा सैनिकहरुमाथि भाडाका सिपाही भएको भन्ने आरोप नलागोस् भन्नका लागि उनीहरुको पदोन्नतिलगायत विषयमा हरेक सुविधा दिनुपर्ने पनि उल्लेख छ।

प्रकाशित : श्रावण १७, २०७६ २०:२८
प्रतिक्रिया
पठाउनुहोस्

लिम्बुको ‘भावनाका फूलहरु’

कान्तिपुर संवाददाता

काठमाडौँ — गीतकार किरण टी लिम्बुको तेस्रो गीति एल्बम ‘भावनाका फूलहरु–३’ सार्वजनिक भएको छ । गीतकार संघ नेपालले शुक्रबार काठमाडौंमा गरेको समारोहमा उक्त एल्बम सार्वजनिक गरिएको हो । वरिष्ठ गीतकार राजेन्द्र थापा, गायक तथा संगीतकार गणेश रसिक, गीतकार विश्व बल्लभ, संघका अध्यक्ष चुडामणि देवकोटा र मेजर काजीमान लिम्बुले संयुक्त रुपमा विमोचन गरेका हुन् । विमोचित एल्बममा ६ वटा गीत रहेका छन् ।

‘अलि अलि हसाउँदै’, ‘सम्झना साथमा’, ‘छोएर गयो’, ‘यो आँखाले’, ‘दुईलाई गुना गर्दा’ र ‘छोएर गयो’ बोलको गीत छन्। ती गीतलाई क्रमश: अनु चौधरी, राजेश पायल राई, बलराम समाल, दिपक लिम्बु, उत्तमजंग लिम्बु लाओती र दिपा लामाले गाएका छन्। ‘छोएर गयो’ बोलको गीतलाई बलराम समाल र दिपा लामाले अलग अलग गाएका छन्। ती गीतमा उत्तमजंग लिम्बु लाओती र बलराम समालको संगत रहेको छ। गीति एल्बमको उत्पादन लक्ष्मी मादेन थेबे तथा ताराप्रसाद लिम्बुको संगीत संयोजन रहेको छ।

गीतकार किरणको यसअघि ‘भावनाका फूलहरु’ भाग १ र २ तथा ‘भावनाका कुरा’ गजलसंग्रह पुस्तक प्रकाशित छन्। २०१८ चैतमा जन्मिएका गीतकार लिम्बुको पुर्ख्यौली थलो ताप्लेजुङ हो। उनी पेसाले अवकासप्राप्त ब्रिटिस सेना हुन्। विमोचित एल्बमका गीतबारेमा संघका उपाध्यक्ष शुभ मुकारुङ, महासचिव वसन्त वित्यासी थापा, संगीतकार रसिक लगायतले चर्चा गरेका थिए।

प्रकाशित : श्रावण १७, २०७६ २०:०८
पूरा पढ्नुहोस्
प्रतिक्रिया
पठाउनुहोस्