लन्डनमा नेपाली चिया महोत्सव

कान्तिपुर संवाददाता

लन्डन — नेपाली दूतावास लन्डनमा 'नेपाल विकास सम्मेलन-८ तथा नेपाली चिया महोत्सव" आयोजना गरिएको छ । ‘ब्रिटेन इन नेपाल एनजीओज’ (ब्रांगो) सँगको सहकार्यमा नेपाली दूतावासले बिहीबार सो कार्यक्रम गरेको हो ।

कार्यक्रममा नेपालको विकासका लागि बेलायती कल्याणकारी संस्थाहरुलाई प्रोत्साहन विषयमा विभिन्न प्रस्तुतिहरु गरिएका थिए । सम्मेलनमा सम्बोधन गर्दै कार्यक्रमका प्रमुख अतिथि तथा सत्तारुढ कन्जरभेटिभ पार्टीका सांसद मार्कस जोन्सले नेपालमा शिक्षा, स्वास्थ्य जस्ता क्षेत्रहरुमा कार्यरत ब्रिटिस संस्थाहरुको प्रशंसा गरे । उनले नेपाल ब्रिटेनको भरपर्दो मित्र भएको बताउँदै नेपालको विकासमा सघाउन बेलायत प्रतिबद्ध रहेको बताए। उनले हालै बाढीबाट नेपालमा धनजनको क्षति भएकोप्रति दु:ख व्यक्त गर्दै समवेदना पनि व्यक्त गरे ।

ब्राङ्गोका संयोजक डेविड थोमसले नेपालमा काम गरिरहेका ब्रिटिस कल्याणकारी संस्थाहरु तथा अन्य संगठनहरुबीच सञ्चार, सहकार्य र आपसी सहयोग बढाउने उद्देश्यले सञ्जाल स्थापना गरिएको बताए । उनले १०० भन्दा बढी ब्रिटिस कल्याणकारी संस्थाहरु नेपालमा कार्यरत रहेकोमा ४२ वटा आफ्नो संस्थामा आबद्ध भइसकेको जनाए ।

नेपालका लागि पूर्व बेलायती राजदूत तथा ब्रिटेन-नेपाल सोसाइटीका अध्यक्ष एन्ड्रयु स्पर्क्सले नेपालमा कार्यरत ब्रिटिस कल्याणकारी संस्थाहरुलाई बेलायती राजदूतावाससँग समन्वय गरी काम गर्न सुझाव दिए । उनले चेभनिंग स्कलरसिपजस्ता छात्रवृत्तिका लागि थप रकम छुट्याउन बेलायत सरकारलाई आग्रह पनि गरे ।

सहभागीहरुलाई स्वागत गर्दै बेलायतका लागि नेपालका राजदूत डा. दुर्गाबहादुर सुवेदीले नेपाल तथा बेलायतबीच जनस्तरको सम्बन्ध बलियो बनाउन बेलायत गैरसरकारी संस्थाहरुले निर्वाह गरिरहेको भूमिकाको प्रशंसा गरे । उनले गत महिना प्रधानमन्त्री केपी ओलीको बेलायत भ्रमण निकै सफल र उपलब्धिपूर्ण रहेको दाबी गरे । उनले नेपाल भ्रमण वर्ष २०२० लाई सफल पार्न ब्रिटिस कल्याणकारी संस्थाहरुलाई आग्रह पनि गरे ।

गैरआवासीय नेपाली संघका केन्द्रीय उपाध्यक्ष कुल आचार्यले नेपालमा कार्यरत बेलायती गैरसरकारी संस्थाहरुसँग सहकार्य गर्न गैरआवासीय नेपाली संघ तयार रहेको बताए ।

ब्रिटेन-नेपाल च्याम्बरका अध्यक्ष तथा पूर्वसांसद राजेन्द्र खेतानले गैरसरकारी तथा निजी क्षेत्रलाई मिलेर काम गर्न सुझाव दिए ।

कार्यक्रमको दोस्रो चरणमा लन्डनस्थित नेपाली दूतावासका उपनियोग प्रमुख शरदराज आरणले नेपाली चियाका बारेमा प्रस्तुति गरेका थिए । उनले नेपाली चियाको गुणस्तर विश्वस्तरको रहेको भन्दै नेपाली चिया पीउन सबैलाई आग्रह पनि गरेका थिए ।

प्रकाशित : श्रावण ३, २०७६ १५:४५
ADVERTISEMENT
प्रतिक्रिया
पठाउनुहोस्
ADVERTISEMENT

मनसुनको सक्रियता सामान्य हुँदै

कान्तिपुर संवाददाता

काठमाडौँ — मनसुनी न्यूनचापीय रेखा नेपालको दक्षिणतिर रहेकाले मनसुनी गतिविधि देशैभरि सामान्य सक्रिय रहेको छ । मनसुनी न्यूनचापीय रेखा नेपालको दक्षिणबाट केही तल रहेकाले मनसुन पूर्ण सक्रिय हुन् अझै केही समय लाग्ने जल तथा मौसम पूर्वानुमान महाशाखाका मौसमविद् गंगा नगरकोटीले बताइन् । अहिले मनसुन देशभरि नै सामान्य सक्रिय रहेको बताउँदै उनले पूर्वी र मध्य क्षेत्रमा सामान्यदेखि पूर्ण बदली हुने पश्चिम क्षेत्रमा आंशिक तथा सामान्य बदली हुने जानकारी दिइन् । 

महाशाखाको पछिल्लो विवरणअनुसार आज काठमाडौँ उपत्यकामा १५ .० मिलिमिटर वर्षा भएको छ । त्यस्तै पोखरामा ६०.०, सिमरामा ७.०, नेपालगञ्जमा ५४.० र जुम्लामा ०.३ मिलिमिटर वर्षा मापन गरिएको छ । राति देशभर सामान्य बदली रही केही स्थानमा हल्कादेखि मध्यम वर्षाको सम्भावना रहेको बताइएको छ ।

शनिबार देशभर आंशिक बदली रही देशको पूर्वी र मध्य क्षेत्रका एक/दुई स्थानमा भारी वर्षाको सम्भावना रहेको बताइएको छ । आइतबार पनि देशभर आंशिकदेखि सामान्य बदली हुनाका साथै पूर्वी र मध्य क्षेत्रका एक दुई स्थानमा भारी वर्षाको सम्भावना रहेको उक्त महाशाखाको भनाइ छ ।

त्यस्तै उक्त महाशाखाले आगामी २४ घण्टाको मौसम पूर्वानुमान जारी गर्दै देशका मध्य र पूर्वी क्षेत्रका एक/दुई स्थानमा भारी वर्षाको सम्भावना रहेकाले ती क्षेत्रका पहाडी भू-भागमा पहिरो जान सक्ने र पहाड तथा चुरेबाट बहने खोलामा जल सहत बढ्न सक्ने भएकाले सामान्य सतर्कता अपनाउन आग्रह गरेको छ ।

प्रकाशित : श्रावण ३, २०७६ १५:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT