नेपाललाई दुख दिने भारतकाे कुनै मनसाय हुँदैन : याेगी आदित्यनाथ

नेपाल फाउन्डेसनको संयोजनमा मुख्यमन्त्री निवासमा बुधबार साँझ भएको नेपाली पत्रकारहरुसँगको भेटमा उनले नेपालीहरुलाई भारत आवत-जावत गर्ने वातावरण तथा भन्सारको झन्झटलाई अझै सहज बनाउनेतर्फ आफूले भारतको केन्द्र सरकारसँग आग्रह गरेको समेत जानकारी दिए । 'सिमानाका नेपालीहरुले भारतीय पक्षबाट कहिलेकाहीँ दुःख पाउने गरेको मैले सुनेको छु । अब त्यसो हुनु हुँदैन, हाम्रो सदियाै देखिको सम्बन्ध अझै सुमधुर हुनु जरुरी छ,' उनले भने।

फाउण्डेसनका संयोजक विकास ठाकुरले नेपाली पक्षलाई चेकजाँचका नाममा दुःख नदिन मुख्यमन्त्री योगीसँग आग्रह गरे । जवाफमा त्यसकालागि भारतीय सुरक्षाकर्मीलाई आफूले निर्देशन दिइसकेको योगीले जानकारी दिए । यस्तै आफै समेत भारततर्फ सिमाको अनुगमन गर्न जाने तयारिमा रहेको उनले बताए ।

केही व्यक्तिहरुले नेपाल-भारत खुला सिमानाको फाइदा उठाउन भने खोजेको बताउँदै उनले त्यसतर्फ भने दुवै पक्ष सजग हुनुपर्नेमा जोड दिए । उनले भने, 'लागूऔषध र अवैध मुद्रा ओसारपसार तथा आपराधिक क्रियाकलाप गर्नेहरु सीमा क्षेत्रमा सक्रिय छन्, त्यतातर्फ दुवै मुलुकले निगरानी गर्नु पर्छ ।'

आफूहरुले सधैं नेपालको समृद्धि र नेपालीहरुको सुख चाहेको भन्दै मुख्यमन्त्री आदित्यनाथले नेपाल सरकारको 'समृद्ध नेपाल, सुखी नेपाली’ को नारामा भारत सहयोगी बन्ने समेत बताए ।

नेपालीको स्वाभिमान विश्वमा नै उच्च रहेको, नेपाल एक स्वाधीन र सम्प्रभुसत्ता सम्पन्न मुलुक भएको भन्दै उनले प्रशंसा समेत गरे । यस्तै नेपालीको धर्म संस्कृति समेत वैश्विक पहिचान भएको उनले बताए ।

उनले नेपालको पशुपतिनाथ र मुक्तिनाथको दर्शन गर्न भारतको दक्षिणतर्फका नागरिक समेत नेपाल जाने गरेको आफूलाई जानकारीमा आएको बताउँदै धार्मिक पर्यटनमा विश्वलाई नेपालले तान्न सक्नु पर्नेमा जोड दिए ।

विवाह पञ्चमीको अवसरमा जनकपुरको भ्रमण गरेको स्मरण गर्दै उनले न्यानो आतिथ्यताको लागि नेपाल सरकार र नेपालीहरुप्रति कृतज्ञता समेत व्यक्त गरे । मुख्यमन्त्री योगीले छिटै भारतको गोरखपुरबाट नेपालका लागि बस सेवा संचालनको तयारी भएको समेत जानकारी दिए ।