चिनियाँ सगरमाथा आरोही सम्मानित

कान्तिपुर संवाददाता

बेइजिङ — नेपाली दूतावासले सगरमाथा दिवसका अवसरमा बुधबार ६ चिनियाँ पर्वतारोहीलाई सम्मान गरेको छ । सम्मानित हुनेमा सुन यिछ्वान, सोङ छियाङ, मा च्यानक्वो, वाङ स्वेफङ, ह युलोङ र लु हाइछ्वान छन् । सन् २०१७ यता उनीहरुले फरक-फरक समयमा नेपाली मोहडाबाट सगरमाथा आरोहण गरेका थिए । 

सम्मानित पर्वतारोहीहरूलाई नेपाली चिनो र नेपाली खादा प्रदान गरिएको छ । कार्यक्रममा चीनका लागि नेपाली राजदूत लीलामणि पौड्यालले सगरमाथा नेपाल र चीनबीच मित्रताको प्रतीक भएको बताए । पर्वतारोहीहरूका कारण जनस्तरीय सम्बन्ध अझ गहन हुन मद्दत पुगेकोले उनीहरू नेपाल-चीन सांस्कृतिक दूत भएको समेत उनले सुनाए । राजदूत पौड्यालले भने, 'नेपाल र चीनबीच जनस्तरीय सम्बन्ध अभिवृद्धि गर्न पर्वतारोहीले गरेको योगदान ठूलो छ ।'


बेइजिङस्थित नेपाली दूतावास प्रांगणमा आयोजित कार्यक्रममा आरोहीहरूले आफ्ना अनुभवहरु साटेका थिए । उनीहरूले सगरमाथा आरोहणका क्रममा यसपालि देखिएको भीडभाड, मौसम पूर्वानुमान सुधारका लागि सुझाव दिए । 'नेपाली शेर्पाहरूको पारिश्रमिक एकदमै थोरै रहेछ ' उनीहरुले भने, 'जीवन बिमा पनि नभएकाले शेर्पाहरुको सेवा कष्टप्रद रहेको थाहा पायौं । यसतर्फ नेपालका सम्बन्धित निकायले केही पहल गर्न सक्ने अपेक्षा गरेका छौँ । '

प्रकाशित : जेष्ठ १५, २०७६ २२:०६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

कर्मचारी कसको तलब कति पुग्यो ? [तालिकासहित]

कान्तिपुर संवाददाता

काठमाडौँ — सरकारले राष्ट्रसेवक कर्मचारीको तलब १८ देखि २० प्रतिशतसम्म वृद्धि गरेको छ । आर्थिक वर्ष २०७६/७७ को बजेटमार्फत सरकारले करिब साढे ५ लाख हाराहारी संख्यामा रहेका कर्मचारीको तलब साउन १ देखि लागू हुने गरी बढाएको हो । कार्यालय सहयोगीदेखि नायब सुब्बासम्मको तलबमा २० प्रतिशत र शाखा अधिकृतदेखि मुख्यसचिवसम्मको तलब १८ प्रतिशतले वृद्धि गरिएको छ । 

झन्डै साढे दुई लाख हाराहारी रहेका सेवानिवृत्त राष्ट्रसेवकहरूको पेन्सनसमेत वृद्धि भएको छ । पूर्वराष्ट्रसेवकहरूको पेन्सनमा जुन पदबाट सेवानिवृत्त भएको हो, त्यही पदको बहालवाला कर्मचारीको बढेको तलबको ६६ प्रतिशतका दरले वृद्धि हुनेछ ।

सबभन्दा तल्लो तहको कर्मचारी कार्यालय सहयोगीको तलब १६ हजार २ सय ३० बाट ३ हजार २ सय ४६ बढेर १९ हजार ४ सय ७६ रुपैयाँ पुगेको छ । सबभन्दा माथिल्लो तह मुख्यसचिवको तलब ५५ हजार २ सयबाट ९ हजार ९ सय ३६ बढेर ६५ हजार १ सय ३५ रुपैयाँ पुगेको छ । खरिदारको तलब २२ हजार १ सय ७० बाट ४ हजार ४ सय ३४ बढेर २६ हजार ६ सय ४ रुपैयाँ पुगेको छ ।

सबै तहका कर्मचारीलाई दिइँदै आएको मासिक २ हजार रुपैयाँ महँगी भत्ता, वाषिर्क ७ हजार ५ सय कपडा भत्ता बजेटमा यथावत् राखिएको छ । दुई दर्जनभन्दा बढी कार्यालयका कर्मचारीलाई दिइँदै आएको सय प्रतिशतसम्मको प्रोत्साहन भत्तासमेत यथावत् छ ।

प्रकाशित : जेष्ठ १५, २०७६ २१:००
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×