इटहरी — एमालेका नेतालाई सात करोड रुपैया बाँडेको सार्वजनिक गरेपछि एकाएक विवादमा तानिएकी सांसद् राज्यलक्ष्मी गोल्छालाई सोमबार एमालेले सम्मानित गरेको छ । पार्टीको सुनसरी जिल्ला परिषद् उद्घाटनमा पार्टी अध्यक्ष तथा प्रधानमन्त्री केपी शर्मा ओली र महासचिव ईश्वर पोखरेलबाट उनी सम्मानित भएकी हुन् ।

एमालेले मधेसी महिलाको कोटामा उनलाई समानुपातिकमा सभासद् बनाएको थियो । तर, संविधान निर्माण प्रकृयामा सहभागी नभएको र प्रधानमन्त्रीका लागि भएको मतदानमा अनुपस्थित रहेको भन्दै एमालले सभासदबाट राजीनामा दिन दबाब दिएपछि उनले एमालेलाई सात करोड रुपैयाँ सहयोग गरेको खुलासा गरेकी थिइन् । इकान्तिपुरसँगको अन्तर्वार्तामा सहयोगको खुलासा गरेकी उनले केही दिनपछि विराटनगरस्थित गोल्छा हाउसमा पत्रकार सम्मेलन गरी सात करोड दिएको दोहोर्‍याएकी थिइन् ।

गोल्छाले कुनै पनि हालतमा राजीनामा नगर्ने बताएकी थिइन् । स्पष्टीकरणको मौका समेत नदिइ अनावश्यक रुपमा पार्टीका नेता गोकर्ण विष्ट, योगेश भट्टराई, प्रदिप ज्ञवालीलगायतले पटक–पटक फोन गरेर राजीनामा दिन ‘र्टचर’ गरेको उनले आरोप लगाएकी थिइन् । सभासद् बन्न ५ करोड दिएको र भूकम्पका बेला पनि पार्टीलाई सहयोग गरेको उनले बताएकी थिइन् । उनले एमाले केन्द्रिय नेताहरुको नामै किटेर रकम दिएको खुलासा गरेकी थिइन् । उनको भनाईको एमाले र युवा संघले खण्डनसमेत गरेको थियो ।

एमालेले सोमबार समाजका विभिन्न क्षेत्र र पार्टी भित्र योगदान गर्नेलाई योगदानको कदर गर्दै गोल्छासहित करिब ८० जनाभन्दा बढीलाई सम्मान गरेको हो ।

ओलीले नसकेपछि महासचिवले बाँडे सम्मान
सम्मान लिनेको संख्या धेरै भएकाले केहीलाई सम्मान बाँडेपछि अध्यक्ष ओली बसे, महासचिव ईश्वर पोख्रेलले सम्मान बाँड्न थाले । उद्योगी मोती दुगडले महासचिवले मात्र दिएको सम्मान थाप्न आनाकानी गरेपछि ओली फेरि उठेर उनलाई प्रमाणपत्र दिए, टिका लगाई दिए ।
सम्मान कार्यक्रममा केही विवादास्पद व्यक्ति पनि परेको विषयमा एमाले भित्र नै विवाद भए पनि कावा अध्यक्ष द्वारिकलाल चौधरीले प्रतिक्रिया दिन मानेनन् ।