गोक्योतिर बरालिँदा [तस्बिरहरू]

यात्राको पहिलो दिन त्रिभुवन अन्तरराष्ट्रिय विमानस्थलदेखि झन्डै २५ मिनेटको उडानबाट २८४० मिटर उचाइमा रहेको तेन्जिङ हिलारी विमानस्थल लुक्लामा पुगियो । लुक्लाबाट आसपासका वनस्पतिहरुलाई नियाल्दै तीन घण्टामा फक्दिन पुग्यौं ।

हिमाली बाटोको खानामा रमाउँदै त्यो रात त्यही बिताउँदै अर्को दिन सबेरै खाजा खाएर नाम्चे पुग्ने लक्ष्यसहित हाम्रो यात्रा सुरु भयो । दूधकोसी नदीको तिरैतिर हिमालका चाँदी झै टल्किएका टाकुराको फेदको बाटो हुँदै जोर्सल्लेमा माध्यान्न १२ बजेतिर पग्यौं । खाना खाएपछि झन्डै ५ घण्टाको उकालो हिडेँपछि ३४५० मिटर उचाइमा रहेको नाम्चे बजार पुगियो ।

नाम्चे बजार सुन्दर तर चिसो थियो । होटेलको एकरातको बसाइपछि अर्को दिन सबेरै हाम्रो अर्को लक्ष्य खुम्जुङतिर लागियो । खुम्जुङमा उसिनेको आलु र टमाटरको चटनीको लन्च गरी स्थानीयहरूसँग कुट्कीको स्थानीय प्रयोगको बारेमा जानकारी लिएपछि हामी फोर्से थांगातिर गयौं ।

दिउँसो २ बजेतिर सुरु गरेको फोर्से थांगा तिरको यात्रा साँझ ६:३० बजे पुगियो । होटेल गुणस्तरीय थिएन तर हामीसँग विकल्प पनि थिएन । जसोतसो रात काटेर अर्को दिन बिहानै ४ घण्टाको उकालो चढेपछि डोले पुगियो । हामीले अनुमान गरेको र खुम्बुका स्थानीयहरुले भने जस्तो कुट्की डोलेदेखि गोक्योसम्म पाइन्छ भन्ने तथ्य सत्य सावित भयो । डोलेका स्थानीय महिलाले देखाएको उत्तरतर्फ फर्केको ओसिलो पाखामा कुट्की प्रसश्त भेटेपछि हाम्रो खुशीको सीमा रहेन । त्यहाँ कुट्कीको अध्ययन गरेपछि हामीलाई आवश्यक पर्ने तथ्यांकहरु संकलन गर्‍यौं । त्यसपछि हाम्रो यात्रा लुजातर्फ अगाडि बढ्यो । साँझतिर हामी लुजा पुग्यौं । अर्को दिन बिहानतिर हाम्रो यात्रा गोक्योतिर सोजियो । लुजादेखि डेढ घण्टाको यात्रापछि मछेर्मो पुग्यौं । उच्च ठाउँ, चिसो हावा र उकालो बाटोले गर्दा हाम्रो गति कछुवाको जस्तो थियो ।

भोलिपल्ट बिहान हामी गोक्यो ताल, गोक्यो रि र हिमालको काखमा रमणीय स्थानहरुको अवलोकन गर्‍यौं । मध्यान्न १२ बजेतिर खाना खाएपछि हामी त्यहाँबाट मछेर्मो फर्कियौं । बाटोमा कुट्कीको अवलोकन अध्ययन गर्दै मछेर्मो पुगियो । अर्को दिन डोले हुँदै २ दिनमा नाम्चे हुँदै लुक्ला फर्कियौं । लुक्लाबाट तारा एयरको विमानबाट यात्रा सुरु गरेको १० औं दिनमा हाम्रो टोली काठमाडौं फर्कियो ।

प्रस्तुति : मुक्तिराम पौडेल ।