मलिकले लिए संन्यास

(एएफपी)

लन्डन — लर्ड्समा बंगलादेशविरुद्धको जितपछि पाकिस्तानी ब्याट्सम्यान सोएब मलिकले आफ्नो बिदाई खेलबिना नै एकदिवसीय अन्तर्राष्ट्रिय क्रिकेटबाट संन्यास घोषणा गरेका छन् । मलिकले गत वर्ष नै विश्वकपपछि एकदिवसीय क्रिकेटबाट संन्यास लिने बताइसकेका थिए । विश्वकपमा पाकिस्तानको अन्तिम खेलमा बंगलादेशलाई ९४ रनले हराएपछि उनले योजना कार्यान्वयन गरेका हुन् । 

३७ वर्षीय मलिकले टान्टी–२० भने खेल्नेछन् । तर एकदिवसीय करिअरबाट विश्राम लिनु आफ्नो जीवनकै भावुक क्षणको रूपमा उनले परिभाषित गरे । सुरुआती ३ मध्ये २ खेलमा शून्यमै आउट भएपछि टिमबाट निकालिएका मलिकले भने, ‘म एकदिवसीय क्रिकेटबाट संन्यास लिँदै छु,’ भारतीय टेनिस स्टार सानिया मिर्जाका श्रीमान मलिकले थपे, ‘म यस कुरामा निकै दु:खी छु कि मैले यस फर्म्याट छोडिरहेको छु, जुन मलाई सबैभन्दा मनपर्छ । म आफ्नो परिवारसँग अधिक समय बिताउन र अर्को वर्ष हुने ट्वान्टी–२० विश्वकपमा अधिक ध्यान केन्द्रित गर्न यसो गरिरहेको छु ।’

सन् १९९२ को उपाधि विजेता पाकिस्तानले यस संस्करणको सेमिफाइनलमा स्थान बनाउन असफल भएपछि मलिकको यो निर्णय आएको हो । पाकिस्तान ९ खेलबाट न्युजिल्यान्डसँग समान ११ अंक बनाए पनि नेट रनरेटका आधारमा पछि परेको हो । मलिकले २ सय ८७ एकदिवसीय अन्तर्राष्ट्रियमा ९ शतकसहित जम्मा ७ हजार ५ सय ३४ रन प्रहार गरेका छन् । उनको अन्तिम खेल जुन १६ मा म्यानचेस्टरमा भएको चिरप्रतिद्वन्द्वी भारतविरुद्धको खेल रह्यो । अफ स्पिनरका रूपमा उनले १ सय ५८ अन्तर्राष्ट्रिय विकेट पनि लिएका छन् । उनले ४१ एकदिवसीय अन्तर्राष्ट्रियमा पाकिस्तानको कप्तानी सम्हालेका थिए । मलिकले कमजोर लयबीच करिअर सिध्याउनुपर्दा निरास बनेको प्रतिक्रिया दिएका छन् । ‘टिमको सिनियर खेलाडी हुनुका नाताले मैले धेरैभन्दा धेरै सहयोग गर्न चाहन्थें तर सधैं सबै कुरा तपाईले सोचेजस्तो हुँदैन । यो क्रिकेटको एउटा हिस्सा पनि हो,’ उनले भने ।

‘तपाईले दुई वा तीन खेलमा कुनै पनि खेलाडीको मूल्यांकन गर्न सक्नुहुन्न तर म यो कुरामा खुसी छु कि मलाई प्रतिस्थापन गरेका खेलाडीले उत्कृष्ट प्रदर्शन गरे,’ दक्षिण अफ्रिका र न्युजिल्यान्डविरुद्ध अर्धशतक बनाएका
ह्यारिस सोहेलबारे मलिकले भने । ‘यदि तपाई कडा मिहिनेत र इमानदारीसाथ खेल्नुहुन्छ भने सर्वोत्कृष्ट सफलता हासिल गर्नु हुनेछ, मेरो हकमा पनि त्यही भएको हो । मैले कहिल्यै पाकिस्तानका लागि २० वर्षसम्म खेल्न सक्छु भन्ने सोचेको थिइनँ,’ मलिकले थपे ।

प्रकाशित : असार २२, २०७६ १०:१३
ADVERTISEMENT
प्रतिक्रिया
पठाउनुहोस्

'सोचेजस्तो भएन’

(एएफपी)

लन्डन — विश्वकप लिग चरणको अन्तिम खेलमा बंगलादेशमाथि ९४ रनको जित बावजुद सेमिफाइनल छनोट हुन नसक्नुले मिश्रित अनुभव दिएको पाकिस्तानी प्रशिक्षक मिकी आर्थरले स्विकारेका छन् । सेमिफाइनलमा स्थान बनाउन पाकिस्तानलाई एकदिवसीय क्रिकेट इतिहासकै सर्वाधिक रन अन्तरको कीर्तिमान आवश्यक थियो । '

तर उनीहरूले पहिले व्याटिङ गरी ३१५–९ को योगफल खडा गरेका थिए । यसको मतलब बंगलादेश ७ रनमा अलआउट हुनुपर्ने थियो । जुन असम्भव थियो । बंगलादेशले दोस्रो ओभरमै ८ रन प्रहार गरी पाकिस्तानको घर फिर्ती निश्चित गर्‍यो । र, सेमिफाइनलमा अस्ट्रेलिया, भारत र इंग्ल्यान्डसँगै न्युजिल्यान्डको स्थान सुरक्षित गरिदियो । समान ९ खेलबाट पाकिस्तान र न्युजिल्यान्डको ११ अंक रह्यो । नेट रनरेटका आधारमा न्युजिल्यान्ड भाग्यमानी बन्यो ।
यस विश्वकपसँगै आर्थरको सम्झौता पनि सकिएको छ । यस विश्वकपमा पाकिस्तान टिमका लागि यी दक्षिण अफ्रिकी प्रशिक्षकको अनुभव उतारचढाव र निरासाजनक अन्त्य रह्यो । ‘हामीले जसरी अन्त्य गर्न चाहन्थ्यौं त्यस्तो भएन । हाम्रो विश्वकप अभियान ‘यदि र तर’ मै बित्यो,’ उनले संवाददातासँग भने, ‘यदि हामीले पछिल्ला ५ खेलमा जस्तै प्रदर्शन सुरुआती ५ खेलमा गर्न सकेको भए परिणाम अर्कै हुन्थ्यो । तर यो लामो प्रतियोगितामा हाम्रो अनुभव निरासाजनक रह्यो ।’

पाकिस्तानले विश्वकपको सुरुआती ५ मध्ये इंग्ल्यान्डलाई मात्र पराजित गरेको थियो । चिरप्रतिद्वन्द्वी भारतसँग समेत गरी ३ हार र एक खेल वर्षाले रद्द भएको थियो । उनीहरूले त्यसपछि चार खेल जितेर उत्कृष्ट पुनरागमन गरे तर सेमिफाइनल छनोट हुन असफल रहे ।

आर्थरका अनुसार पाकिस्तानले बंगलादेशविरुद्ध ठूलो जित हासिल गर्ने लक्ष्य राखेको थियो । तर स्लो पिचका कारण असम्भव भयो । ‘ठूलो स्कोरबारे हामीबीच छलफल भएको थिएन भनेर म झुटो बोल्न चाहन्न । ४ सय रनबारे नै हामीले छलफल गरेका हौं । तर फखर (जमान) आउट भएर ड्रेसिङ रूममा आएपछि हामीलाई थाहा भयो कि पिच स्लो छ रन बनाउन मुस्किल छ,’ प्रशिक्षक आर्थरले भने ।

उनले वेस्ट इन्डिजविरुद्धको पहिलो खेलमा ७ विकेटको हार नै आफ्नो टिमका लागि सबैभन्दा ठूलो चोट बनेको स्विकारे । उनले थपे, ‘पछाडि फर्केर हेर्दा वेस्ट इन्डिजविरुद्ध प्रतियोगिताकै पहिले खेलमा हामीले जस्तो हार बेहोर्‍यौं, त्यसबाट पुनरागमन गर्न नै असम्भवजस्तै थियो । रनरेटमा हामी पहिलो खेलबाटै माथि उठ्न सकेनौं, जुन निरासाजनक थियो ।’

आर्थरले सेमिफाइनल पुगेका न्युजिल्यान्ड र इंग्ल्यान्डविरुद्ध आफ्नो टिमको जित विश्वकपकै मुख्य आकर्षण रहेको व्याख्या गरे । उनले भने, ‘यहाँ बसेर सोच्दा एउटा खुसीको कुरा के भने हामीले दुई सेमिफाइनलिस्ट टिमलाई हरायौं । यसको अर्थ हामी एक क्रिकेट टिमको रूपमा उनीहरूभन्दा धेरै पछाडि छैनौं ।’

आर्थरले भारतसँगको हारपछि कडा आलोचना खेपेका कप्तान सरफराज अहमदले पुनरागमनका लागि गरेको प्रयास र सहयोगका कारण प्रशंसा व्यक्त गरे । ‘भारतसँगको हारपछि उनले जस्तो आलोचना खेप्नुपरेको थियो ।
त्यसबाट माथि उठेर उनले जसरी पुनरागमनको नेतृत्व लिए सबै क्षेत्र सरफराजलाई दिन चाहन्छु,’ आर्थरले भने, ‘जसरी उनले आफ्नो रचनात्मकता देखाए, जसरी उनले नेतृत्व लिए र जसरी आफ्नो नैतिकतामा अडिग रहे । मेरो विचारमा उनी ड्रेसिङ रूमका प्रेरणा हुन् र यो सबै श्रेयका हकदार हुन् उनी ।’

प्रकाशित : असार २२, २०७६ १०:११
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT