'सोचेजस्तो भएन’

(एएफपी)

लन्डन — विश्वकप लिग चरणको अन्तिम खेलमा बंगलादेशमाथि ९४ रनको जित बावजुद सेमिफाइनल छनोट हुन नसक्नुले मिश्रित अनुभव दिएको पाकिस्तानी प्रशिक्षक मिकी आर्थरले स्विकारेका छन् । सेमिफाइनलमा स्थान बनाउन पाकिस्तानलाई एकदिवसीय क्रिकेट इतिहासकै सर्वाधिक रन अन्तरको कीर्तिमान आवश्यक थियो । '

तर उनीहरूले पहिले व्याटिङ गरी ३१५–९ को योगफल खडा गरेका थिए । यसको मतलब बंगलादेश ७ रनमा अलआउट हुनुपर्ने थियो । जुन असम्भव थियो । बंगलादेशले दोस्रो ओभरमै ८ रन प्रहार गरी पाकिस्तानको घर फिर्ती निश्चित गर्‍यो । र, सेमिफाइनलमा अस्ट्रेलिया, भारत र इंग्ल्यान्डसँगै न्युजिल्यान्डको स्थान सुरक्षित गरिदियो । समान ९ खेलबाट पाकिस्तान र न्युजिल्यान्डको ११ अंक रह्यो । नेट रनरेटका आधारमा न्युजिल्यान्ड भाग्यमानी बन्यो ।
यस विश्वकपसँगै आर्थरको सम्झौता पनि सकिएको छ । यस विश्वकपमा पाकिस्तान टिमका लागि यी दक्षिण अफ्रिकी प्रशिक्षकको अनुभव उतारचढाव र निरासाजनक अन्त्य रह्यो । ‘हामीले जसरी अन्त्य गर्न चाहन्थ्यौं त्यस्तो भएन । हाम्रो विश्वकप अभियान ‘यदि र तर’ मै बित्यो,’ उनले संवाददातासँग भने, ‘यदि हामीले पछिल्ला ५ खेलमा जस्तै प्रदर्शन सुरुआती ५ खेलमा गर्न सकेको भए परिणाम अर्कै हुन्थ्यो । तर यो लामो प्रतियोगितामा हाम्रो अनुभव निरासाजनक रह्यो ।’

पाकिस्तानले विश्वकपको सुरुआती ५ मध्ये इंग्ल्यान्डलाई मात्र पराजित गरेको थियो । चिरप्रतिद्वन्द्वी भारतसँग समेत गरी ३ हार र एक खेल वर्षाले रद्द भएको थियो । उनीहरूले त्यसपछि चार खेल जितेर उत्कृष्ट पुनरागमन गरे तर सेमिफाइनल छनोट हुन असफल रहे ।

आर्थरका अनुसार पाकिस्तानले बंगलादेशविरुद्ध ठूलो जित हासिल गर्ने लक्ष्य राखेको थियो । तर स्लो पिचका कारण असम्भव भयो । ‘ठूलो स्कोरबारे हामीबीच छलफल भएको थिएन भनेर म झुटो बोल्न चाहन्न । ४ सय रनबारे नै हामीले छलफल गरेका हौं । तर फखर (जमान) आउट भएर ड्रेसिङ रूममा आएपछि हामीलाई थाहा भयो कि पिच स्लो छ रन बनाउन मुस्किल छ,’ प्रशिक्षक आर्थरले भने ।

उनले वेस्ट इन्डिजविरुद्धको पहिलो खेलमा ७ विकेटको हार नै आफ्नो टिमका लागि सबैभन्दा ठूलो चोट बनेको स्विकारे । उनले थपे, ‘पछाडि फर्केर हेर्दा वेस्ट इन्डिजविरुद्ध प्रतियोगिताकै पहिले खेलमा हामीले जस्तो हार बेहोर्‍यौं, त्यसबाट पुनरागमन गर्न नै असम्भवजस्तै थियो । रनरेटमा हामी पहिलो खेलबाटै माथि उठ्न सकेनौं, जुन निरासाजनक थियो ।’

आर्थरले सेमिफाइनल पुगेका न्युजिल्यान्ड र इंग्ल्यान्डविरुद्ध आफ्नो टिमको जित विश्वकपकै मुख्य आकर्षण रहेको व्याख्या गरे । उनले भने, ‘यहाँ बसेर सोच्दा एउटा खुसीको कुरा के भने हामीले दुई सेमिफाइनलिस्ट टिमलाई हरायौं । यसको अर्थ हामी एक क्रिकेट टिमको रूपमा उनीहरूभन्दा धेरै पछाडि छैनौं ।’

आर्थरले भारतसँगको हारपछि कडा आलोचना खेपेका कप्तान सरफराज अहमदले पुनरागमनका लागि गरेको प्रयास र सहयोगका कारण प्रशंसा व्यक्त गरे । ‘भारतसँगको हारपछि उनले जस्तो आलोचना खेप्नुपरेको थियो ।
त्यसबाट माथि उठेर उनले जसरी पुनरागमनको नेतृत्व लिए सबै क्षेत्र सरफराजलाई दिन चाहन्छु,’ आर्थरले भने, ‘जसरी उनले आफ्नो रचनात्मकता देखाए, जसरी उनले नेतृत्व लिए र जसरी आफ्नो नैतिकतामा अडिग रहे । मेरो विचारमा उनी ड्रेसिङ रूमका प्रेरणा हुन् र यो सबै श्रेयका हकदार हुन् उनी ।’

प्रकाशित : असार २२, २०७६ १०:११
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कश्मीरको पक्षमा ब्यानर

(एएफपी)

लिड्स — एकदिवसीय विश्वकपअन्तर्गत शनिबार हेडिङ्ले रंगशालामा भारत र श्रीलंकाबीचको खेल भइरहेको समयमा ‘कश्मीरका लागि न्याय’ र ‘भारत नरसंहार अन्त्य गर र कश्मीरलाई स्वतन्त्र गर’ लेखिएको ब्यानर उडाइएको छ । गत साता यही रंगशालामा पाकिस्तान र अफगानिस्तानबीचको खेलमा पनि यस्तै खाले ब्यानर प्रदर्शन गरिएपछि इंग्ल्यान्ड र वेल्समा जारी एकदिवसीय विश्वकपमा भएको यो दोस्रो घटना हो ।

सन् १९४७ मा बेलायती उपनिवेश अन्त्य भएपछि कश्मीरलाई भारत र पाकिस्तानबीच विभाजन गरिएको छ । तर दुवैले यो हिमालय क्षेत्रमा पूर्ण रूपमा आफ्नो अधिकार दाबी गरिरहेका छन् । पछिल्लो दुई दशकमा यस क्षेत्रमा भएको सशस्त्र युद्धमा ७० हजारभन्दा बढीको ज्यान गइसकेको छ । मारिनेमा अधिकांस निहत्था सर्वसाधारण छन् ।

‘हामी यो कुरामा निरास छौं किनकि यस्तो घटना दोहोरिएको छ,’ अन्तर्राष्ट्रिय क्रिकेट परिषद् (आईसीसी) को वक्तव्यमा भनिएको छ, ‘हामी आईसीसी पुरुष एकदिवसीय विश्वकपमा कुनै पनि प्रकारको राजनीतिक सन्देश दिँदैनौं ।’

‘पूरा प्रतियोगिताक्रममा हामीले यस्ताखाले विरोध प्रदर्शन रोक्नका लागि देशभरका पुलिससँग मिलेर काम गरिरहेका छौं । पछिल्लो घटनापछि हामीलाई वेस्ट योर्कसायरका प्रहरीले यस्ता घटना दोहोरिन नदिने प्रतिवद्धता व्यक्त गरेका थिए । तर पुन: दोहोरिएकोमा हामी निकै असन्तुष्ट छौं,’ आईसीसीले भनेको छ ।

गत साता पाकिस्तान र अफगानबीचको लिग चरणको खेलमा समर्थकबीच झडप भएको थियो । त्यस घटनाबारे प्रहरीले अनुसन्धान गरिरहेको छ । खेलमा मैदानबाट देखिने गरी ‘बलोचिस्तानका लागि न्याय’ उल्लेखित ब्यानर प्रदर्शन गरिएको थियो ।

बलोचिस्तान पाकिस्तानको सबैभन्दा ठूलो र गरिब राज्य हो, जुन अफगानिस्तान र इरानको सीमाक्षेत्रमा अवस्थित छ । यहाँ इस्लामवादी र साम्प्रदायिक विद्रोहीका लागि सुरक्षित क्षेत्र मानिन्छ । सन् २००४ यता पाकिस्तानी सेनाले आतंकवादीविरुद्ध युद्ध गरिरहेका छन् । आतंकवादीले अक्सर सुरक्षाकर्मीलाई निसाना बनाउँदै आएका छन् ।

प्रकाशित : असार २२, २०७६ १०:०५
पूरा पढ्नुहोस्
प्रतिक्रिया
पठाउनुहोस्
ADVERTISEMENT