भविष्यप्रति आशावादी रोच

एएफपी

म्यानचेस्टर — तीव्र गतिका बलर केमर रोचले वेस्ट इन्डिज बिहीबार भारतसँग पराजित हुँदै विश्वकपबाट बाहिरिए पनि टिमको भविष्यलाई लिएर आशावादी रहेको बताएका छन् । 

जेसन होल्डरको नेतृत्वमा रहेको वेस्ट इन्डिजले लिगका ७ खेलमध्ये पाँचौं हार बेहोरेको छ । बाँकी दुई खेलमध्ये एक वर्षाले रद्द भएको थियो भने अर्कोमा पाकिस्तानलाई हराएको हो । भारतसँगको हारपछि वेस्ट इन्डिजको सेमिफाइनल पुग्ने झिनो सम्भावनामा पूर्णविराम लागेको थियो ।

वेस्ट इन्डिजले अझै लिग चरणमा दुई खेल खेल्न बाँकी रहे पनि टिम त्यस्तो स्थितिमा पुगेको हो । सन् १९७५ र १९७९ को विश्वकप विजेता वेस्ट इन्डिज त्यो समय विश्व क्रिकेटमा अजेय टिमजस्तै थियो । पछिल्लो समय वेस्ट इन्डिज क्रिकेटको स्तरमा ओरालो लागेको छ । बलर रोच राम्रो दिन फर्कने विश्वासमा छन् । ‘मलाई अझै पनि लाग्छ, हाम्रो भविष्य राम्रो छ । हामीसँग अहिले पनि केही विश्वस्तरीय खेलाडी छन्,’ उनले भने ।

उनले थपे, ‘सिमरन हेट्मेर र ओसन थोमस निकै प्रतिभाशाली खेलाडी हुन् । उनीहरूले राम्रो सल्लाह र निर्देशन पाउने हो भने दुवैले वेस्ट इन्डिज क्रिकेटका लागि धेरै गर्नेछन् । म सधैं वेस्ट इन्डिज क्रिकेटको प्रशंसक र समर्थक हुँ । क्यारेबियनतिर पनि अझै केही राम्रा खेलाडी छन् र उनीहरूले राम्रो गरिरहेका छन् । भविष्यमा यिनै खेलाडीले वेस्ट इन्डिज क्रिकेटको भविष्यका लागि राम्रो गर्नेछन् ।’

प्रतियोगितामा हेट्मेर र साइ होप दुवैले २–२ अर्धशतक बनाइसकेका छन् । त्यस्तै तीव्र गतिका बलर थोमसले ७ विकेट लिइसकेका छन् । रोचले भारतजस्तो माथिल्लो स्तरको टिमसँग खेल्दा वेस्ट इन्डिजले प्राप्त गर्ने भनेकै शिक्षा रहेको बताए । उनले भने, ‘भारत टिमजस्तो टिमविरुद्ध खेल्नु भनेको आफू कहाँ र कुन स्थितिमा छ भनेर बुझ्नु पनि हो ।’

सन् २००९ मा डेब्यू गरेयता ८८ एकदिवसीयमा १ सय २० विकेट लिइसकेका भेट्रान रोचले थपे, ‘प्रतियोगिताका बाँकी खेलमा हाम्रो उद्देश्य सकारात्मक रहनु हुनेछ ।’ सोमबारचेल्टर–ली–स्ट्रिटमा हुने खेलमा वेस्ट इन्डिजले श्रीलंकाको सामना गर्नेछ ।

प्रकाशित : असार १४, २०७६ ०७:३६
प्रतिक्रिया
पठाउनुहोस्
ADVERTISEMENT
ADVERTISEMENT

क्रिकेट सिक्दै दृष्टिविहीन

सुवास बिडारी

मकवानपुर — मकवानपुर जिल्लामा रहेका दृष्टिविहीन दैनिक क्रिकेट प्रशिक्षणमा जुटिरहेका छन् । हेटौंडा–४ स्थित लोकतान्त्रिक मैदान हुप्रचौरमा रहेको क्रिकेट पिचमा उनीहरू दैनिक क्रिकेट प्रशिक्षण गरिरहेका छन् ।

पछिल्लो समय देशभर नेत्रहीन क्रिकेट खेल्नेको संख्या बढेसँगै मकवानपुर नेत्रहीन संघले नेत्रहीन पुनर्स्थापना कार्यक्रमअन्तर्गत उनीहरूलाई क्रिकेट खेल्ने वातावरण तयार गरिदिएको हो ।

लोकतान्त्रिक मैदानमा हाल दैनिक १७ दृष्टिविहीनलाई तीन प्रशिक्षकले प्रशिक्षण दिइरहेका छन् । नेत्रहीन क्रिकेटमा अन्तर्राष्ट्रिय तथा राष्ट्रिय अनुभव समेत बटुलिसकेका रामप्रसाद पौडेल, गीता पौडेल र भूपराज पाठकले प्रशिक्षण दिइरहेका हुन् । प्रशिक्षणमा सहभागीमध्ये आठ महिला छन् ।

‘हामीले अब हुने राष्ट्रिय प्रतियोगिताका लागि महिला र पुरुष टोली नै तयार पार्ने गरी अगाडि बढिरहेका छौं,’ नेत्रहीन संघका क्षेत्रीय कार्यक्रम अधिकृत प्रेम महर्जनले भने, ‘त्यसका लागि आवश्यक सहयोग जुटाउने गरी अगाडि बढिरहेका छौं ।’ उनले प्रशिक्षणमा अझै खेलाडी थपिने र त्यसका लागि आवश्यक सामग्रीसमेत व्यवस्था गर्न तयार रहेको बताए । उनले हेटौंडा उपमहानगरपालिकको सहयोगमा पाँचदिने प्रशिक्षणसिविर सञ्चालन गरेर प्रशिक्षणको सुरुआत गरेको बताए ।मकवानपुर जिल्लामा करिब एक हजार नेत्रहीन छन् ।

हेटौंडा–५, पिल्लेका सुजन घिमिरेले ब्याटिङ गर्न सजिलो भए पनि बलिङ गर्न केही गाह्रो भएको अनुभव सुनाए । उनले दैनिक प्रशिक्षण भए अझै खेल्न सहज हुने बताए । राक्सिराङ गाउँपालिका काँकडाकी विनिता चेपाङले दैनिक क्रिकेट प्रशिक्षणमा सहभागी हुँदा बेग्लै आनन्द मिलेको बताइन् । उनले क्रिकेट खेलाडी बन्छु भन्ने नसोचेको र अहिले बलिङ, ब्याटिङ र फिल्डिङ गर्दा नौलो अनुभव भएको बताइन् । ‘सुरुमा नियम नबुझेर गाह्रो भएको थियो तर अहिले सहज भइरहेको छ,’ उनले भनिन् ।

प्रशिक्षण गराइरहेका रामप्रसाद पौडेलले सुरुमा सिकाउन धेरै समस्या भए पनि अहिले भने रमाइलो अनुभव भइरहेको बताए । उनले दिनप्रतिदिन खेलाडी खेलमा रमाउन थालेको र त्यसले गर्दा प्रशिक्षण गराउन समेत सहजता भएको बताए ।

प्रकाशित : असार १४, २०७६ ०७:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×