राबाडाले सिकेको पाठ

एएफपी

लन्डन — विश्वकपमा आफ्नो चुनौती समाप्त भएको पीडाबाट गुज्रिरहेको दक्षिण अफ्रिकी बलर कागिसो राबाडाले टिमको खराब प्रदर्शनबाट पाठ सिक्नुपर्ने बताएका छन् ।

फाफ डु प्लेसिसको टिम दुई खेल खेल्नु अगाडि नै लर्ड्समा पाकिस्तानको हातबाट पराजित भएपछि प्रतियोगिताबाट बाहिरिएको थियो । विश्वकप इतिहासमा दक्षिण अफ्रिका नकआउट चरण पुग्न असफल यो दोस्रोपल्ट मात्र हो ।

तीव्र गतिका बलर राबाडा टिमले बेहोरेको खराब प्रदर्शनबाट पनि सिक्ने धेरै अवसर हुने मान्छन् । उनले भने, ‘खेलमा केही यस्ता मोड पनि आए, जसमा हामी निकै भाग्यमानी रह्यौं । तर केहीमा हाम्रो प्रदर्शन निकै फितलो रह्यो । यी सबैमा पनि हामीले सिक्ने धेरै अवसर पाएका छौं । त्यसैले पनि हामी क्रिकेट खेल्छौं । क्रिकेटमा केही पनि सजिलो छैन । मैदानमा प्रवेश गरेर खेल्नु निकै कठिन छ । खेलमा खुसी पनि हुन्छ, दुःख पनि ।’

घर फर्कनु अगाडि दक्षिण अफ्रिकाले श्रीलंका र अस्ट्रेलियाको सामना गर्नेछ । दक्षिण अफ्रिकाको खराब प्रदर्शनलाई लिएर टिमका पुराना स्टार खेलाडी ज्याक कालिसले इंग्ल्यान्डबाट सिक्नुपर्ने बताएका छन् । कालिसका अनुसार चार वर्षअगाडि इंग्ल्यान्डको प्रदर्शन पनि खराब रहेपछि टिमले सही दिशा तय गर्न कठिन मिहिनेत गरेको थियो । त्यसैलाई इंगित गर्दै राबाडाले भने, ‘अबको लक्ष्य भनेको सकारात्मक रहने र राम्रो प्रदर्शन गरेर पुनरागमन गर्ने नै हो ।’

राबाडा आफैं पनि यसपल्टको विश्वकपमा सबैभन्दा निराशाजनक प्रदर्शन गर्ने खेलाडीमा रहेका छन् । उनले ५०.८३ को औसतमा ६ विकेटमात्र लिएका छन् । इन्डियन प्रिमियर लिगमा प्रभावशाली प्रदर्शन गरेयता उनले आफ्नो टिमका लागि विश्वकपमा त्यस्तै खेल दोहोर्‍याउन सकेनन् । यसलाई लिएर उनले भने, ‘आईपीएलमा मैले अपेक्षाअनुसार प्रदर्शन गर्न सकें तर विश्वकपमा मेरो प्रदर्शन त्यस्तो रहेन । मैले योभन्दा राम्रो प्रदर्शन गर्नुपर्ने थियो ।’

प्रकाशित : असार ११, २०७६ ०८:०८
प्रतिक्रिया
पठाउनुहोस्
ADVERTISEMENT

सकिबको सपना

एएफपी

साउथह्याम्पटन — विश्वकपमा राम्रो खेलिरहेको बंगलादेशका सकिब अल हसनले सेमिफाइनल प्रवेश निश्चित गर्न भारतको सामना गर्दा त्यसमा प्रख्यात जित निकाल्ने सपना बुनेका छन् ।

बंगलादेशले सोमबार अफगानिस्तानमाथि ६२ रनको जित निकाल्दै १० टिमसम्मिलित प्रतियोगिता अंकतालिकाको पाँचौं स्थानमा उक्लेको छ । प्रतियोगिताको लिग चरण अन्त्यतिर पुग्दा सेमिफाइनल पुग्न टिमबीचको होड चर्को रहेको छ ।

मासरफी मोर्टजाको बंगलादेशले लिग चरणको आफ्नो अन्तिम दुई खेलमा भारत र पाकिस्तानको सामना गर्नेछ । सन् २००७ को विश्वकपमा बंगलादेशले भारतलाई हराएको थियो । यसपल्ट जुलाई २ मा हुने खेलमा पनि आफूहरूले विराट कोहलीको टिममाथि विजयी रहनेमा आत्मविश्वासी छन् सकिब । ‘भारत शीर्षस्थानमा टिम हो र यो उपाधिको अभियानमा पनि छ । यही टिमको सामना गर्दा सजिलो पनि हुन्न । तर हामीले राम्रो गर्ने प्रयास गर्नेछौं ।’

मिडियासँगको कुराकानीमा आत्मविश्वासी देखिएका उनले भने, ‘अनभुवले यस्तो ठूलो खेलमा काम गर्छ । भारतको सामना गर्दा हामीले अहिलेसम्मकै उच्च खेल प्रदर्शन गर्नुपर्ने निश्चित छ । भारतीय टिममा विश्वस्तरीय खेलाडी छन् । कसैले पनि एक्लै खेल आफ्नो पक्षमा मोड्न सक्षम छन् । म फेरि भन्छु, भारतलाई पराजित गर्न हामीले उत्कृष्ट प्रदर्शन गर्नुपर्नेछ । मलाई के पनि विश्वास छ भने हाम्रो टिम यसका लागि सक्षम छ ।’

बंगलादेशले अफगानिस्तानलाई पराजित गर्दा सकिबले ५१ रन बनाएका थिए । त्यसकै मदतले टिमले ७ विकेट गुमाई २ सय ६२ रन बनाएको थियो । उनी यसपल्टको विश्वकपमा ४ सय ७६ रन बनाएर सर्वाधिक सफल ब्याट्सम्यान सूचीमा छन् । उनको बलिङले धारिलो आक्रमण पनि बुनेको छ । ३२ वर्षीय अलराउन्डरले अफगानविरुद्ध १० ओभरमा २९ रन खर्चेर ५ विकेट लिएका थिए ।

सन् २०११ मा आयरल्यान्डविरुद्ध ५० रन र ५ विकेटको प्रदर्शन गरेका भारतका युवराज सिंहपछि यो उपलब्धि दोहोर्‍याउने सकिब एकमात्र खेलाडी हुन् । सकिबले आफ्नो प्रदर्शनमा खुसी व्यक्त गरेका छन् । उनले भनेका छन्, ‘म वास्तवमै खुसी छु । मेरो प्रदर्शनले टिममा सकारात्मक प्रभाव पर्नु पर्छ ।

प्रकाशित : असार ११, २०७६ ०८:०७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT