इंग्ल्यान्डले अस्ट्रेलियाको चुनौती झेल्नुपर्ने

एएफपी

लन्डन — इंग्ल्यान्ड माथिल्लो दर्जाका टिमलाई हराउन असफल खेलाडीको समूह हो त ? विश्वकपमा अस्ट्रेलियाविरुद्धको महत्त्वपूर्ण खेलअघि कप्तान इयान मोर्गनलाई सोधिएको अप्ठ्यारो प्रश्न हो यो । लर्ड्समा मंगलबार हुने खेल प्रतियोगिताकै एक निर्णायक खेल हुन सक्नेछ ।

इंग्ल्यान्डविरुद्ध खेल्नु अघिल्लो दिन लड्स क्रिकेट मैदानमा टिम फोटोका लागि कुर्सी बोक्दै अस्ट्रेलियाका डेविड वार्नर र उस्मान ख्वाजा । तस्बिर : एपी

इंग्ल्यान्ड यसअघि श्रीलंकासँग पराजित रहेको हुनाले पनि यो खेलले थप चर्चा पाएको हो । हेडिङ्लेमा श्रीलंकाले तेर्स्याएको २ सय ३३ रनको लक्ष्यसामु इंग्ल्यान्ड २ सय १२ रनमै अलआउट भएको थियो ।

सुरुतिरका खेलमा पाकिस्तानको हातबाट पराजित इंग्ल्यान्ड शीर्ष चारमै छ । टोली सेमिफाइनलका लागि बलियो प्रत्याशी हो । पहिलोपल्ट विश्वकप जित्ने अभियानमा रहेको इंग्ल्यान्ड थप हार बेहोर्न सक्ने स्थिति छैन । उसको अस्ट्रेलिया पछिको प्रतिद्वन्द्वी छन् भारत र न्युजिल्यान्ड । यी सबै टिमविरुद्ध सन् १९९२ यता विश्वकपमा इंग्ल्यान्डले जित निकाल्न सकेको छैन । २०१५ को विश्वकपबाट सुरुमै बाहिरिएयता फेरिएको इंग्ल्यान्ड अहिले एकदिवसीय क्रिकेटमा नम्बर एक टिम हो ।

पछिल्लो चार वर्षमा इंग्ल्यान्डले दुईपल्ट विश्व कीर्तिमान स्कोर खडा गरिसकेको छ । एक वर्षअघि मात्र इंग्ल्यान्डले अस्ट्रेलियाविरुद्ध ट्रेन्ट ब्रिजमा ६ विकेट गुमाएर कीर्तिमान ४ सय ८१ रन बनाएको थियो । तर बलरलाई मदत गर्ने पिचमा भने इंग्ल्यान्डले रन बटुल्न संघर्ष गर्ने गर्छ । श्रीलंकाविरुद्धको खेल मोइन अलीको एक सय एकदिवसीय थियो । त्यसमा एक छक्का प्रहार गरेपछि अलीले लगत्तै अर्को त्यस्तै प्रयास गरे र आउट भए ।

उनको विकेटसँग इंग्ल्यान्ड ६ विकेट गुमाएर १ सय ७० रनको खराब स्थितिमा पुगेको थियो । अलकिो त्यस प्रदर्शनबाट इंग्ल्यान्डका पूर्व कप्तान माइकल भोन खुसी छैनन् । उनले लेखेका छन्, ‘अली त्यस दिन खेल जित्न मैदानमा उत्रेका थिए तर एक छक्का प्रहार गरेपछि उनले सस्तोमा विकेट गुमाए ।’ तथ्यांकअनुसार २०१७ मा च्याम्पियन्स ट्रफीको सेमिफाइनलयता इंग्ल्यान्ड बलरलाई मदत गर्ने पिचमा ११ मध्ये ५ खेलमा पराजित रहेको छ ।

ब्याट्सम्यानलाई मदत गर्ने पिचमा भने इंग्ल्यान्ड ९ खेलमा विजयी छ । पछिल्लो दुई खेलमा जेसन रोयको अनुपस्थिति पनि इंग्ल्यान्डका लागि महँगो साबित भएको छ । चोटग्रस्त यी प्रारम्भिक ब्याट्सम्यान रोयले अस्ट्रेलियाविरुद्ध पनि खेल्न सक्ने छैनन् । भोनले अगाडि लेखेका छन्, ‘इंग्ल्यान्डका ब्याट्म्यान यसपल्ट अलि कम नै आक्रामक भए कि ?’ त्यसको ठीक विपरीत अस्ट्रेलिया भने प्रतियोगिता अगाडि बढेयता थप आक्रमक देखिन थालेको छ ।

टोलीका कप्तान आरोन फिन्च र डेविड वार्नरको प्रारम्भिक ब्याटिङ जोडीले आक्रामक ढंगले रन बनाइरहेका छन् । बलरमध्ये पनि माइकल स्टार्कले १५ विकेट लिएर सर्वाधिक सफल बलरको सूचीमा संयुक्त अगाडि छन् । १९८७ को विश्वकप विजेता अस्ट्रेलियाली टिमका कप्तान एलान बोर्डर के मान्छन् भने मंगलबारको खेलको निर्णय बलरको हातमा हुनेछ । ‘मेरो विश्लेषणमा बलर नै निर्णायक हुनेछन् इंग्ल्यान्ड र अस्ट्रेलियाबीचको खेलमा,’ उनले भनेका छन् ।

प्लेयर्स टु वाच
जोस बटलर (इंग्ल्यान्ड)
अस्ट्रेलियाली प्रशिक्षक जस्टिन ल्याङ्गरले कुनै समय समरसेटबाट खेले । उनकै अगाडि हुर्केका खेलाडी हुन् बटलर । अहिले बटलर इंग्लिस टिमका उपकप्तान छन् । उनलाई आधुनिक एकदिवसीय क्रिकेटमा सबैभन्दा नयाँ नयाँ प्रयोग गर्न रूचाउने खेलाडीका रूपमा लिइन्छ । ल्याङ्गर के मान्छन् भने बटलरको खेल व्यक्तित्व त्यसरी विकास भइरहेको छ, जुन भारतका पूर्व कप्तान महेन्द्रसिंह धोनीको छ । बटलर पनि धोनीजस्तै विकेटकिपर/ब्याट्म्यान हुन् । तय छ इंग्ल्यान्डलाई उनको गतिलो योगदान चाहिने छ अस्ट्रेलियाविरुद्ध ।

डेविड वार्नर (अस्ट्रेलिया)
यसपल्टको विश्वकपमा सबैभन्दा लयमा रहेका कुनै ब्याट्सम्यान छन् भने ती हुन्, अस्ट्रेलियाली प्रारम्भिक ब्याट्सम्यान डेविड वार्नर । एकवर्षे प्रतिबन्धपछि मैदान फर्केका वार्नरले अहिले तहल्का मच्चाइरहेका छन् । इंग्ल्यान्डको सामना गर्दा यी खेलाडी सबैको नजरमा हुनेछन् । हुनसक्छ इंग्लिस दर्शकले उनको खिल्ली उडाउन कुनै कसर छाड्ने छैनन् । वार्नरले यसलाई कसरी लिनेछन् त्यो हेर्नलायक हुनेछ । प्रशिक्षक जस्टिन ल्याङगरकै शब्दमा वार्नरको काम ब्याटिङ गर्नु हो, समर्थकले के गरे त्यसमा चासो राख्ने होइन ।

प्रकाशित : असार १०, २०७६ ०९:१३
प्रतिक्रिया
पठाउनुहोस्

तीन मुख्य प्रतिस्पर्धा

एएफपी

लण्डन — विश्वकपकाे बहुप्रतीक्षित खेलमध्ये एक इंग्ल्यान्ड र अष्ट्रेलियाले मंगलबार प्रतिष्पर्धा गर्दै छन् । आयाेजक टाेली इंग्ल्यान्डले अहिलसम्म पािकस्तान र श्रीलंकासँग दुई हार बेहाेरेकाे छ । समान ६ खेल खेलेकाे अष्ट्रेलियाले ५ खेल जितेकाे छ भने भारतसँग हारेकाे छ । यस खेलमा हुने मुख्य ती प्रतिष्पर्धा यस्ताे छ :

वार्नरविरुद्ध आर्चर : शीर्षक्रममा टक्कर
तीव्र गति र कलासाथ जोफ्रा आर्चरले इंग्ल्यान्डको बलिङ आक्रमणलाई नयाँ आयाम दिएका छन् । अस्ट्रेलियाका मिचेल स्टार्क र पाकिस्तानका मोहम्मद अमिरसँगै सर्वाधिक १५ विकेट लिएका उनी उत्कृष्ट बलरको शीर्ष तीनभित्र छन् । बार्बाडोसमा जन्मिएका यी बलरले क्रिस वोक्स र मार्क उडसँगको समन्वयमा इंग्ल्यान्डको तर्फबाट प्रभावशाली बलिङ क्षमताको विकास गरेका छन् । जसले विपक्षीको शीर्षक्रम ध्वस्त पार्ने क्षमता राख्छ ।

बल टेम्परिङ प्रकरणमा एकवर्षे प्रतिबन्ध बेहोरेपछि पहिलो ठूलो अन्तर्राष्ट्रिय प्रतियोगिता खेलिरहेका वार्नरले अस्ट्रेलियाली शीर्ष क्रममा आफूलाई पुनः प्रमाणित गरिसकेका छन् । उनले अफगानिस्तानविरुद्ध पहिलो खेलमा १ सय १४ बलमा ८९ रनको निर्णायक विजयी इनिङ्स खेलेका थिए । त्यसयता पाकिस्तानविरुद्ध शतक प्रहार गरे भने बंगलादेशविरुद्ध १ सय ४७ बलमा १ सय ६६ रन बनाए । यो विश्वकपमा अहिलेसम्मकै सर्वाधिक व्यक्तिगत स्कोर हो ।

म्याक्सवेलविरुद्ध बटलर : फिनिसर
इंग्ल्यान्डका जोस बटलर विश्वकपकै सबैभन्दा खतरनाक ब्याट्सम्यानमध्ये एक हुन् । उनको ब्याट चलेको दिन जस्तोसुकै खेलको नतिजा परिवर्तन गर्न सक्छन् । बटलरको शतकका बाबजुद इंग्ल्यान्डले पाकिस्तानसँग पराजय बेहोरेको थियो । उनले अफगानिस्तानविरुद्ध धेरै ओभर ब्याटिङ गर्न पाएनन् भने श्रीलंकाविरुद्ध सस्तैमा आउट भए । बटलरको स्ट्राइक रेट १ सय बलमा १ सय २० भन्दा धेरै छ । अस्ट्रेलियाका ग्लेन म्याक्सवेलको स्ट्राइकर रेट १ सय २४ भन्दा अधिक छ ।

म्याक्सवेलले इंग्ल्यान्ड र वेल्समा जारी सबैभन्दा ठूलो क्रिकेट प्रतियोगितामा आफ्नो क्षमताको झलक देखाइसकेका छन् । उनले श्रीलंकाविरुद्ध २५ बलमा ४६ रनको विष्फोटक इनिङ्स खेले र बंगलादेशबिरुद्धको खेलमा पनि त्यस्तै गरे । ४५ औं ओभरमा आएका उनले १० बलमा ३२ रन बनाएर दुर्भाग्यवश रनआउट सिकार बने । एकदिवसीय क्रिकेटमा एबी डी भिलियर्सले राखेको १६ बलमा अर्धशतकको कीर्तिमान तोड्न असफल बने ।

जाम्पाविरुद्ध रसिद : स्पिन आक्रमण
अनुकूल कन्डिसनको फाइदा उठाउँदै विश्वकपमा अहिलेसम्म तुलनात्मक रूपमा तीव्र बलरहरू हाबी भइरहेका छन् । प्रतियोगितामा १० विकेट लिएर दक्षिण अफ्रिकाका इमरान ताहिरले स्पिनरको नेतृत्व गरिरहेका छन् ।

इंग्ल्यान्डका अदिल रसिदले यस विश्वकपको सुरुआत सुस्त गरेका थिए । पछिल्लो २ खेलमा ५ विकेट लिनुमात्र होइन विपक्षी ब्याट्सम्यानलाई तर्साएर उनले आफ्नो क्षमता देखाइरहेका छन् । यी लेग स्पिनरले सन् २०१६ मा डेब्यू गरेयता अन्तर्राष्ट्रिय एकदिवसीयमा १ सय ३६ विकेट लिइसकेका छन् ।

अस्ट्रेलियाका लेग स्पिनर एडम जाम्पाले अस्ट्रेलियाका लागि ४ खेलमात्र खेलेका छन् । उनको प्रदर्शन ५–२३६ को आँकडामा निराशाजनक देखिन्छ । अस्ट्रेलियाका पूर्व कप्तान एलन बोर्डरले विश्वकपमा अहिलेसम्म अवसर नपाएका अफ स्पिनर नाथान लियोनलाई टिममा ल्याउनुपर्ने सुझाव दिएका छन् । तर जाम्पा विश्व क्रिकेटको ठूलो प्रतियोगितामा आफूलाई प्रमाणित गर्न उत्सुक हुनेछन् ।

प्रकाशित : असार १०, २०७६ ०९:१३
पूरा पढ्नुहोस्
प्रतिक्रिया
पठाउनुहोस्