भारतको ७ मा ७

एएफपी

म्यानचेस्टर — रोहित शर्माको शतकमा भारतले विश्वकप क्रिकेटमा चिरप्रतिद्वन्द्वी पाकिस्तानलाई डकवर्थ लुइस पद्धतिमा ८९ रनले पराजित गरेको छ । विश्वकपमा भारतले पाकिस्तानमाथि सात खेल खेलेकोमा सबैमा विजय हात पारेको छ । यस विजयपछि भारत अंकतालिकाको तेस्रो स्थानमा उक्लेको छ । 

भारतका रोहित शर्मा पाकिस्तानसँग स्टोक प्रहार गर्दै ।तस्बिर : एपी

शर्माले तीन इनिङ्समा आफ्नो दोस्रो शतक बनाउने क्रममा १ सय ४० रन जोडेपछि टस हारेर ब्याटिङमा आएको भारतले ओल्ड ट्राफोर्डमा ३३६–५ को स्कोर बनायो । पाकिस्तानले ३५ ओभरमा ६ विकेट गुमाई १ सय ६६ रन बनाएको समयमा खेल वर्षाले बिथोलिन पुग्यो । त्यसपछि ४० ओभरमा झारिएको खेलमा पाकिस्तानलाई ३ सय २ रनको लक्ष्य दिइयो । पाकिस्तानले बाँकी ५ ओभरमा १ सय ३६ रन बनाउनुपर्ने भयो । पूरा ४० ओभर खेलेको पाकिस्तानले ६ विकेट गुमाई २ सय १२ रनमात्र बनाउन सक्यो ।
इमाद वासिम ३९ बलमा ४६ र सदाब खान १४ बलमा २० रन बनाई अविजित रहे । ओपनर इमाम उल हक ७ रनमै आउट भएका थिए । फखर जमानले ६२ र बाबर आजमले ४८ रन बनाउँदा पाकिस्तानको केही आशा देखिएको थियो । कुलदीप यादवले दुवैलाई आउट गरे । कुलदीपसँगै विजय शंकर र हार्दिक पाण्ड्याले २–२ विकेट लिए ।

यसअघि १ सय १३ बल खेलेका भारतका ओपनर शर्माले १४ चौका र ३ छक्का प्रहार गरे । शर्माले केएल राहुल (५७) सँग पहिलो विकेटमा १ सय ३६ रन जोडेका थिए । ७८ बल खेलेका राहुलले ३ चौका र २ छक्का प्रहार गरे ।

शर्मालाई कप्तान विराट कोहलीले ७७ रन बनाउँदै राम्रो साथ दिए । आफ्नो इनिङ्सका क्रममा कोहली एकदिवसीय अन्तर्राष्ट्रियमा सबैभन्दा चाँडो ११ हजार रन बनाउने खेलाडी बने । कोहलीले २ सय २२ इनिङ्समा यो उपलब्धि पूरा गर्दै आफ्नै देशका सचिन तेन्दुलकरले २ सय ७६ इनिङ्समा ११ हजार रन बनाएको कीर्तिमानलाई उछिनेका हुन् ।

पाण्ड्याले १९ बलमा २६ रन बनाए । पाकिस्तानको मोहम्मद आमिरले ४७ रन खर्चेर ३ विकेट लिए । उनलाई पिचमा दौडिएको कारण दुई पटक चेतावनी दिइएको थियो ।

स्कोर कार्ड
भारत डकवर्थ लुइस पद्धतिमा ८९ रनले विजयी

भारत
५० ओभर ३३६/५
रोहित शर्मा–१४०
विराट कोहली–७७
केएल राहुल–५७

मोहम्मद अमिर–३/४७
वाहब रियाज–१/७१


पाकिस्तान
४० ओभर २१२/६
फखर जमान–६२
बाबर आजम–४८

विजय शंकर–२/२२
कुलदिप यादव–२/३२
हार्दिक पाण्ड्या–२/४४

प्रकाशित : असार २, २०७६ ०७:४३
प्रतिक्रिया
पठाउनुहोस्

दक्षिण अफ्रिकालाई सबै खेल जित्ने चुनौती

एएफपी

कार्डिफ — फाफ डु प्लेसिसले विश्वकपको सेमिफाइनलमा स्थान बनाउने हो भने प्रतियोगिताका सबै बाँकी खेल जित्नुपर्ने बताएका छन् । दक्षिण अफ्रिकाले शनिबार आफ्नो पहिलो जितका लागि अफगानिस्तानलाई नौ विकेटले हराएको थियो ।

प्रोटियसले प्रतियोगितामा खराब सुरुआत गर्दै सुरुआती तीन खेल गुमाएको थियो । वेस्ट इन्डिजविरुद्धको चौथो खेल पनि वर्षाले रद्द भएको थियो । पाँचौं खेलमा भने दक्षिण अफ्रिका जितका लागि पूर्ण हकदार देखियो ।

‘म्यान अफ द म्याच’ इमरान ताहिरले चार विकेट लिएपछि दक्षिण अफ्रिकाले सुरुमा अफगानिस्तानलाई १ सय २५ रनमा रोकेको थियो । त्यसयता एक विकेट मात्र गुमाएर टिम सजिलै जितसम्म पुग्यो । खेल भने वर्षाले प्रभावित भएपछि ४८ वर्षमा छोट्याएको थियो, तर दक्षिण अफ्रिका जितसम्म पुग्दा २८.४ ओभर मात्र उपयोग भयो । यो जितपछि दक्षिण अफ्रिकी खेलाडीको आत्मविश्वास बढने पनि कप्तान प्लेसिसले दाबी गरे ।

‘यो जितपछि हाम्रो स्थिति केही सुध्रिएको छ । अब सबैलाई के पनि थाहा छ भने प्रतियोगितामा कायम रहने हो भने हामीले आफ्ना बाँकी सबै खेल जित्नुपर्छ । हाम्रो अबको चुनौती के हो प्रस्ट छ । उनले भने, ‘अबदेखि हामीले जति खेल बाँकी छन्, सबै जित्नुपर्छ । आजको जितपछि हामी सही दिशातर्फ अग्रसर भयौं ।’ इंग्ल्यान्ड, बंगलादेश र भारतविरुद्धका सुरुआती तीनै खेलमा दक्षिण अफ्रिका पराजित भएको थियो । अफगानिस्तानलाई हराएयता १० टिम सम्मिलित प्रतियोगिताको अंकतालिकामा दक्षिण अफ्रिका सातौं स्थानमा उक्लेको छ ।

लिगका बाँकी खेलमा दक्षिण अफ्रिकाले अझै अस्ट्रेलिया र न्युजिल्यान्डको सामना गर्न बाँकी रहेको हुँदा उसको यात्रा भने सजिलो हुने छैन । अफगानिस्तान स्वयं भने खेलका सबै चार खेल गुमाएर अन्तिम स्थानमा छ र उसले दक्षिण अफ्रिकाविरुद्ध कुनै प्रकारको चुनौती पेस गर्न सकेन । दक्षिण अफ्रिकालाई जितसम्म पुर्‍याउन हसिम अमलाले ४१ रन बनाएर नटआउट रहे । यस्तै क्विन्टेन डी ककले ६८ रन बनाए । उनीहरूले पहिलो विकेटमा १ सय ४ रनको साझेदारी गरे ।

प्रकाशित : असार २, २०७६ ०७:४२
पूरा पढ्नुहोस्
प्रतिक्रिया
पठाउनुहोस्