ऋषभलाई टोलीमा बोलावट

एएफपी

नटिङघम — चोटग्रस्त शिखर धवनको विकल्पको रूपमा भारतीय टोलीमा ऋषभ पन्तको आगमन सम्भावना बढेको छ । उनलाई धवनको स्थान लिनलाई तयार रहन भनिएको टिम प्रमुखले प्रस्ट पारेका छन् । आइतबार अस्ट्रेलियाविरुद्ध ३६ रनको जित पाएको खेलका क्रममा औंलामा चोट लागेका धवनको विश्वकपका बाँकी खेल खेल्न नसक्ने सम्भावना बढेको छ । 

बायाँहाते ओपनिङ ब्याट्सम्यानलाई चिकित्सकीय निगरानीमा राखिएको छ । पन्तलाई इंग्ल्यान्ड र वेल्समा जारी विश्वकप टोलीका लागि तयार रहन भनिएको छ । भारतीय सहायक प्रशिक्षक सञ्जय बैंगरले ट्रेन्ट ब्रिजमा बिहीबार न्युजिल्यान्डविरुद्ध हुने खेलअघि संवाददातासँग भने, ‘हामीले धवनको चोटको मात्रा कुरिरहेका छौं । उनी रहने वा नरहने भन्ने बारे प्रस्ट हुन १० देखि १२ दिन कुर्नुपर्छ ।’
‘धवनजस्ता अनमोल खेलाडीलाई हामी गुमाउन चाहन्नौं,’ बैंगरले भने, ‘यदि प्रतिस्थापन गर्न आवश्यक पर्‍यो भने तयारी अवस्थामा राखिएका खेलाडीलाई अभ्याससत्रमा समेट्नु हितकर हुनेछ ।’

ऋषभ १५ सदस्यीय भारतीय टोलीमा समावेश नभएकोमा छनोटकर्ताप्रति आलोचना बढेको थियो । भारतीय टोलीका मिडिया म्यानेजरका अनुसार आइतबार हुने चिरप्रतिद्वन्द्वी पाकिस्तानविरुद्ध म्यानचेस्टरमा हुने खेलअघि पन्त भारतीय टोलीमा सामेल हुनेछन् ।

२१ वर्षीेय विष्फोटक ब्याट्सम्यान/विकेटकिपर पन्तले गत वर्ष इंग्ल्यान्डविरुद्धको टेस्ट शृंखलामा भारतीय टोलीका लागि डेब्यू गर्दै पहिलो खेलमै शतक बनाएका थिए । यसै वर्ष सिड्नीमा अस्ट्रेलियाविरुद्ध नटआउट १ सय ५९ रनको सानदार इनिङ्स खेलेपछि पन्तलाई भारतीय टोलीमा महेन्द्रसिंह धोनीको उत्तराधिकारीका रूपमा समावेश गर्न गृहकार्य सुरु भएको थियो ।

भारतको लगातार दोस्रो जितका लागि धवनले अस्ट्रेलियाविरुद्ध १ सय १७ रनको शतकीय इनिङ्स खेलेका थिए । ब्याटिङका क्रममा प्याट कमिन्सको बाउन्सर बलले हातमा लागेपछि उनी चोटग्रस्त बनेका हुन् । चोट खेपेरै उनले करिअरको १७ औं शतक पूरा गरेका थिए ।

प्रकाशित : जेष्ठ ३०, २०७६ ०७:५३
प्रतिक्रिया
पठाउनुहोस्

अमिरको प्रदर्शन कोसेढुंगा हुन सक्ने

एएफपी

टाउन्टन — पाकिस्तानले विश्वकपमा बुधबार अस्ट्रेलियाको सामना गर्दै छ । त्यसमा मोहम्मद अमिरको उद्देश्य अर्को कोसेढुंगा प्रदर्शनको हुनेछ । अमिरले समरसेट काउन्टीको मैदानमा तीन वर्षअगाडि प्रथम श्रेणी क्रिकेटमा पुनरागमन गरेका थिए । 

सन् २०१० को लर्ड्सकाण्डपछि अमिरको खेलजीवनमा ठूलो झट्का लागेको थियो । जति बेला उनलाई विश्व क्रिकेटकै उदीयमान खेलाडी मानिएको थियो । लर्ड्स टेस्टमा उनले आफ्नो प्रारम्भिक बलिङ पार्टनर मोहम्मद आसिफसँग मिलेर जानाजान नो–बल गरेका थिए ।
पत्रिकाले गरेको स्टिङ अपरेसनका क्रममा पाकिस्तानी कप्तान सलमान बट पनि त्यसमा मुछिए ।

स्पट फिक्सिङकै कारण तीनै खेलाडीमाथि ५ वर्षको प्रतिबन्ध लागेको थियो । उनीहरूले केही समय जेलमा पनि बिताए । त्यही सन् २०१० को वर्षमा अमिरले स्वीङ बलिङको उत्कृष्ट नमुना पेस गर्दै अस्ट्रेलियाविरुद्ध तटस्थ भूमिका रूपमा हेडिङ्लेमा भएको टेस्टमा २० रन खर्चेर ३ विकेट लिए र अस्ट्रेलिया ८८ रनमा पहिलो दिनमै अलआउट भएको थियो ।

सन् २०१६ मा अमिरले फेरि खेल्न सुरु गरे । उनको बलिङ कला भने ज्युँदै थियो । टाउन्टनमा भएको प्रथम श्रेणी क्रिकेटमा अमिरले समरसेटविरुद्ध ३६ रनमा ३ विकेट लिए । अमिरले लिएका ती विकेटमध्येएक इंग्ल्यान्डका तत्कालीन प्रारम्भिक ब्याट्सम्यान मार्कस ट्रेस्कोथिकविरुद्ध थियो । त्यस क्रममा बलले अन्त्यतिर स्वीङ लिएको थियो । पछिल्लो समय अमिरका लागि खेल सजिलो भने रहेको छैन । उनले विश्वकप अगाडिका १४ एकदिवसीयमा मात्र ५ विकेट मात्र लिएका छन् ।

उनले इंग्ल्यान्डविरुद्ध वर्षाले प्रभावित खेलमा बलिङ अवसर पाएनन् भने बिरामीकै कारण इंग्ल्यान्डविरुद्धको एकदिवसीय शृंखला पनि गुमाएका थिए । सुरुमा विश्वकपमा सहभागी हुने पाकिस्तानी टिममा नरहेका २७ वर्षीय अमिरलाई पछि अन्तिम १५ सदस्यीय टिममा भने राखिएको थियो । वेस्ट इन्डिजविरुद्ध १ सय ५ रनमा अलआउट भएको खेलमा पाकिस्तानका लागि केही राम्रो खेल्ने एकमात्र खेलाडी अमिर नै थिए । उनले त्यस खेलमा २६ रनमा ३ विकेट लिए । तर पाकिस्तान ७ विकेटले पराजित रह्यो ।

अस्ट्रेलियाविरुद्ध पाकिस्तानको प्रदर्शन भने कमजोर छ । पाकिस्तानले पाँचपल्टको विश्वकप विजेताविरुद्धका पछिल्ला १४ खेलमध्ये एउटामै मात्र जित निकालेको छ । सन् २०१७ को जनवरीमा भएको त्यस खेलमा मोहम्मद हफिजले ७२ रन बनाएका थिए ।

इंग्ल्यान्डविरुद्ध प्राप्त जितमा ८ विकेट गुमाएर ३ सय ४८ रन बनाउँदा पनि हफिजले ८४ रनको योगदान दिएका थिए । ‘पक्कै पनि हामीले अस्ट्रेलियामाथि धेरै जित निकालेका थिएनौं, इंग्ल्यान्डविरुद्ध पनि यस्तै थियो तर हामी विजयी रह्यौ,’ कप्तान सरफराज अहमदले भने ।

डिफेन्डिङ च्याम्पियन अस्ट्रेलियाका लागि भने प्रारम्भिक ब्याट्सम्यान डेविड वार्नरको लय निर्णायक हुनेछ । वार्नरले यसपल्टको विश्वकपमा दुई अर्धशतक बनाइसकेका छन् । भारतविरुद्ध उनले ८४ बलमा ५६ रनबनाएका थिए, तर त्यसमा निकै सुस्त देखिए ।

उनको बचाउ गर्दै कप्तान आरोन फिन्चले भनेका छन्, ‘उनी आक्रामक सुरुआत लिन सक्षम छन् ।’ वार्नरसँगै अन्तर्राष्ट्रिय क्रिकेटमा फर्केका स्टिभ स्मिथको प्रदर्शन पनि उत्तिकै निर्णायक हुन सक्नेछ ।

प्रकाशित : जेष्ठ २९, २०७६ ०९:१२
पूरा पढ्नुहोस्
प्रतिक्रिया
पठाउनुहोस्