भारतविरुद्ध न्युजिल्यान्डको आत्मविश्वास

एजेन्सी

ट्रेन्ट ब्रिज — भारत र न्युजिल्यान्ड दुवै जारी विश्वकपमा अपराजित टोली हुन् । बिहीबार ट्रेन्ट ब्रिजमा हुने खेलमा दुवै टोली आफ्नो लगातार सफलता कायम राख्न चाहन्छ । 

अभ्याससत्रमा भारतका लोकेश राहुल ।तस्बिर : एपी


साबिक विजेता अस्ट्रेलियाविरुद्ध ३६ रनको सानदार जित पाएको भारतीय टोलीलाई न्युजिल्यान्डसँगको खेलअघि आफ्ना सुरुआती ब्याट्सम्यान शिखर धवनको औंलाको चोटले ठूलो झट्का दिएको छ । धवनले यो खेल गुमाउने सम्भावना छ ।

कप्तान विराट कोहलीले चौथो नम्बरमा ब्याटिङ गरिरहेका लोकेश राहुललाई रोहित शर्मासँगै ओपनिङ पठाउने सम्भावना छ । यसको अर्थ राहुलले न्युजिल्यान्डको शक्तिलाली तीव्र बलिङ आक्रमणको सामना गर्नेछन् ।

भारतीय टोलीका दुई स्पिनर युजभेन्द्र चहल र कुलदीप यादवले यसअघिका दुई खेलमा निर्णायक क्षणमा सफलता दिलाएका थिए । कोहलीले ट्रेन्ट ब्रिजको छोटो बाउन्ड्री र बदलीयुक्त मौसममा स्पिनरको सन्तुलन कसरी मिलाउने छन् त्यो हेर्नलायक हुनेछ ।
न्युजिल्यान्ड अंकतालिकामा ३ खेलबाट शतप्रतिशत जितसाथ शीर्षस्थानमा छ । लोकी फर्गुसन र म्याट हेनरीले १५ विकेट लिएका छन् । उनीहरू धेरै विकेट लिने बलरमा अगाडि छन् । जिम्मी निसम र कोलिन डी ग्रान्डहोमले उनीहरूलाई राम्रो साथ दिइरहेका छन् । कप्तान केन विलियम्सनसँग बलिङका लागि पर्याप्त विकल्प छ ।

तीन खेलमा न्युजिल्यान्डको सुरुआती ब्याटिङ सानदार देखिएको छ । उनीहरूको मध्यक्रमको परीक्षण अहिलेसम्म हुन सकेको छैन । सम्भवतः न्युजिल्यान्डको मध्यक्रमले भारतीय बलरको सामना गर्नुपर्नेछ ।

न्युजिल्यान्डका अनुभवी ब्याट्सम्यान रस टेलरले भारतविरुद्धको हालैको सफलता तथा भारतीय स्पिनरसँगको सामीप्यताले आफूहरू जितको हकदार भएको दाबी गरेका छन् । विश्वकपअघिको अभ्यास खेलमा भारतीय टिम न्युजिल्यान्डसँग ६ विकेटले पराजित भएको थियो ।

बंगलादेशविरुद्धको खेलमा ८२ रन जोडेका टेलरले भने, ‘हामीले हालै भारतको सामना गरेका थियौं र सफलता निकालेका थियौं । निश्चित रूपमा दुई विश्वस्तरीय स्पिनरले आफ्नो करिअरको सुखद दिन मनाइरहेका छन् । मेरो विचारमा हामीलाई अलग–अलग चरणमा सफलता मिलेको छ । यो हेर्न बाँकी छ ट्रेन्ट ब्रिजको विकेटले कस्तो व्यवहार गर्नेछ ।’

टेलरका अनुसार शिखर धवनको चोटका कारण भारतले ओपनिङमा रोहित शर्मासँग लेफ्ट/राइट सन्तुलन मिलाउने अवसर गुमाउने छ । त्यसको फाइला न्युजिल्यान्डले उठाउने छ ।

प्रकाशित : जेष्ठ ३०, २०७६ ०७:५७
प्रतिक्रिया
पठाउनुहोस्

वार्नरको शतक, अस्ट्रेलियाको पुनरागमन

एएफपी

टाउन्टन — विश्वकपको साबिक विजेता अस्ट्रेलियाले बुधबार पाकिस्तानमाथि ४१ रनको जित दर्ता गरेको छ । यसअघि भारतसँग पराजित अस्ट्रेलियाले पुनरागमन गरेको हो । तीव्र बलरहरूले विकेट लिएको खेलमा पाकिस्तानलाई ४५.४ ओभरमा २ सय ६६ रनमै अलआउट गरेपछि अस्ट्रेलियाको जित निश्चित भएको हो । 

पाकिस्तानविरुद्ध बुधबार शतक बनाएपछि अस्ट्रेलियाका डेविड वार्नर ।तस्बिर : एपी

पाकिस्तानका मोहम्मद अमिरले एकदिवसीय क्रिकेटमा करिअरकै उत्कृष्ट बलिङ प्रदर्शन गरी ३० रन खर्चेर ५ विकेट लिए पनि अस्ट्रेलियाले ३ सय ७ रनको स्कोर खडा गरेको थियो । बल टेम्परिङ प्रकरणपछि एकवर्षे प्रतिबन्धपछि राष्ट्रिय टोलीमा फर्किएका डेविड वार्नरले पहिलो शतक प्रहार गरे ।

वार्नरले कप्तान आरोन फिन्च (८२) सँग मिलेर पहिलो विकेटमा १ सय ४६ रनको साझेदारी गरेपछि टाउन्टनमा अस्ट्रेलिया विशाल योगफलतर्फ अघि बढेको थियो । जारी विश्वकपमा यो अहिलेसम्मकै सर्वाधिक साझेदारी हो । तर बायाँहाते तीव्र बलर अमिरले व्यक्तिगत प्रदर्शन सुधार गरी पाकिस्तानलाई खेलमा फर्काए । अमिरको यसअघि ४/२८ को उत्कृष्ट प्रदर्शन थियो । उनको यो स्पेल जारी विश्वकपमा अहिलेसम्मकै उत्कृष्ट हो ।

‘मेरो विचारमा मैले केही रन छाड्नुपर्‍यो,’ शतक बनाएका वार्नरले इनिङ्स ब्रेकमा भने, ‘मोहम्मद अमिरको दोस्रो स्पेल सानदार थियो ।’ वार्नर र स्टिभ स्मिथ बल टेम्परिङ प्रकरणका कारण प्रतिबन्ध झेलेर हालै फिर्ता भएका हुन् । पछिल्लो खेलमा समर्थकले उनीहरूमाथि व्यंग्य गरेका थिए ।

तर पाकिस्तानका कप्तान सरफराज अहमदको आग्रहलाई स्वीकार गरी समर्थकले उनीहरूप्रति व्यंग्य गरेनन् । बरु इनिङ्सभर ‘अमिर.. अमिर..’ मात्र भनिरहे । दक्षिण पश्चिम काउन्टी समरसेटको मुख्यालयमा सरफराजले बिहानै टस जितेका थिए । त्यसपछि अमिरको निशाना सुरु भयो । उनले मेडन ओभरसाथ आफ्नो स्पेल सुरु गरे । सुरुआती ४ ओभरमा उनले ११ रन खर्चंदा २ मेडन राखेका थिए । २६ रनको स्कोरमा फिन्चको क्याच छुटेको थियो । वाहब रियाजको बलमा एज लागेर उठेको बल स्लिप क्षेत्रमा असिफ अलीले समाउन सकेनन् ।

विकेटकिपर कप्तान सरफराजले मोहम्मद हफिजको बलमा अर्को कठिन मौका खेर फाले । त्यति बेला फिन्च ४४ रनमा खेलिरहेका थिए । त्यसपछि उनले हफिजलाई नै लगातार दुई चौका प्रहार गरेर ६३ बलमा अर्धशतक पूरा गरे । त्यसपछि फिन्चले हफिजलाई नै अफसाइडमा २ छक्का प्रहार गरे । तर, अमिरको पुनरामगनसँगै अस्वाभाविक ठूलो शट खेल्न खोज्दा उनी हफिजकै हातबाट कभरमा क्याचआउट हुन पुगे ।

हफिजको बलमा स्टिभ स्मिथ (१०) र ब्याटिङक्रम सुधार्दै चौथो नम्बरमा आएका ग्लेन म्याक्सवेल (२०) शाहिन शाह अफ्रिदीको बलमा क्लिन बोल्ड भएपछि अस्ट्रेलियाले ३ विकेट क्षतिमा २ सय २३ रन जोडेको थियो । शाहिनकै बलमा अफसाइडमा रन लिँदै १ सय २ बलमा ११ चौकाको साथ वार्नरले आफ्नो १५ औं एकदिवसीय शतक पूरा गरे । त्यसलगत्तै उनी आउट भए । ब्याट्सम्यानहरू शन मार्स, उस्मान ख्वाजा र एलेक्स केरी सबै अमिरको बलमा आउट भए । अन्तिम ब्याट्सम्यान मिचेल स्टार्कलाई आउट गरी अमिरले एक ओभरअगावै अस्ट्रेलियालाई अलआउट गराए ।

जवाफमा पाकिस्तानले ११ ओभरमा ५६ रन जोड्दा २ विकेट गुमाइसकेको थियो । प्याट कमिन्सको बलमा थर्डम्यान क्षेत्रमा केन रिचर्डसनले सहज क्याच लिएपछि फखर जमानले खाता खोल्नै पाएनन् । बाबर आजमले उत्कृष्ट शट खेलिरहेका थिए । २८ बलमा ३० रन बनाएको अवस्थामा उनी नथान कल्टर नाइलको बाउन्सर सामना गर्न असफल भए र रिचर्डसनद्वारा नै क्याचआउट भए ।

यसपल्ट उनले डिप स्क्वायर लेगमा क्याच लिएका थिए । अर्का ओपनर इमाम उल(हकले तेस्रो विकेटको रुपमा आउट हुनुअघि ७५ बलमा ७ चौकासहित ५३ रन बनाएका थिए । मोहम्मद हफिज (४६) लाई मिचेल स्टार्कले कप्तान फिन्चको हातबाट क्याचआउट गरेपछि आएका सोएब मलिक (०) र असिफ अली (५)ले रन बनाउनै सकेनन् । हसन अलीले १५ बलमा ३ चौका र ३ छक्का प्रहार गरी पाकिस्तानलाई खेलमा फर्काउने प्रयास गरेका थिए ।

त्यसपछि आएका वाहब रियाजले कप्तान सरफरजसँग मिलेर आठौं विकेटमा ६४ रनको साझेदारी गरेपछि पाकिस्तानले खेल नियन्त्रणमा लिएको थियो । ४५ औं ओभरमा स्टार्कले २ विकेट झारे र खेल तुरुन्तै अस्ट्रेलियाको पक्षमा पारे । ४४.२ ओभरमा ३९ बलमा ४५ रन बनाएर खेलिरहेका रियाजको कट बिहाइन्ड विकेट अस्ट्रेलियाले रिभ्यू लिएर पाएको थियो । दुई बलपछि मोहम्मद अमिरलाई स्टार्कले बोल्ड गरे । अर्को ओभरमा कप्तान सरफराज ग्लेन म्याक्सवेलबाट रनआउटको सिकार बने । उनले ४८ बलमा ४० रन बनाए ।

स्कोर कार्ड
अस्ट्रेलिया
४१ रनले विजयी

अस्ट्रेलिया
४९ ओभर ३०७
डेविड वार्नर–१०७
आरोन फिन्च–८२

मोहम्मद अमिर ५/३०
शहीन अफ्रिदी २/७०

पाकिस्तान
४५.४ ओभर २६६
इमाम उल–हक–५३
मोहम्मद हफिज –४६

प्याट कमिन्स–३/३३
मिचेल स्टार्क–२/४३
केन रिचर्डसन–२/६२

प्रकाशित : जेष्ठ ३०, २०७६ ०७:५६
पूरा पढ्नुहोस्
प्रतिक्रिया
पठाउनुहोस्