वर्षा फेरि बाधक
साउथह्याम्पटन — दक्षिण अफ्रिका र वेस्ट इन्डिजबीचको विश्वकप क्रिकेट खेल सोमबार भारी वर्षाका कारण रद्द भएको छ । दुवै टोलीलाई १–१ अंक बाँडिएको छ । टस हारेर ब्याटिङ गरेको दक्षिण अफ्रिकाले ७.३ ओभरमा २ विकेट गुमाई २९ रन बनाएको समयमा खेललाई वर्षाले बिथोलेको थियो ।
वर्षा सुरु हुनुअघि सेल्डोन कोट्रेलले दक्षिण अफ्रिकालाई अप्ठ्यारोमा पारेका थिए । उनले हसिम अमलालाई ६ रनमै स्लिपमा क्रिस गेलबाट क्याच गराएका थिए । उनले विकेट लिएपछि परम्परागत हिसाबमा छोटो मार्चमा स्यालुट गर्दै खुसी मनाएका थिए ।
अमलाको स्थानमा आएका एडेन मारक्रमले पनि ५ रनमात्र बनाउन सके । उनले कोट्रेलको बलमा विकेटकिपर साई होपलाई क्याच
दिन पुगे । खेल रोकिँदा क्विन्टन डी कक १७ रन बनाई क्रिजमा थिए भने कप्तान फाफ डु प्लेसिसले खाता खोल्न बाँकी थियो ।
पहिलो तीन खेल हारेको दक्षिण अफ्रिका जितनिम्ति तडपएको थियो ।
तर यस नतिजाले टोलीको सेमिफाइनल पुग्ने सम्भावना झन कमजोर बनाइदिएको छ । ३ खेल खेलेको वेस्ट इन्डिज ३ अंकसहित पाँचौं स्थानमा छ । दक्षिण अफ्रिका १ अंकमात्र बोकी पुछारबाट दोस्रो स्थानमा छ । पुछारको अफगानिस्तानसँग कुनै अंक छ । सहभागी १० टोलीले एकापसमा खेलेपछि शीर्ष चार टोलीले सेमिफाइनल खेल्ने छन् ।
प्रकाशित : जेष्ठ २८, २०७६ ०७:४८