पाकिस्तानको रोमाञ्चक जित

एएफपी

नटिङघम — जो रुट र जोस बटलरको शतक पन्छाउँदै पाकिस्तानले विश्वकप क्रिकेटमा सोमबार आयोजक इंग्ल्यान्डमाथि १४ रनको जित हात पारेको छ । रुटले १ सय ७ र बटलरले १ सय ३ रन बनाए पनि ३ सय ४९ रनको लक्ष्य पाएको इंग्ल्यान्डले ९ विकेट गुमाई ३ सय ३४ रनमात्र बनाउन सक्यो । 

गत महिना ट्रेन्ट ब्रिजमा पाकिस्तान एकदिवसीय क्रिकेटको शीर्षस्थानको इंग्ल्यान्डविरुद्ध ३ सय ४० रन बनाए पनि त्यो रक्षा गर्न असफल रहेको थियो । जारी विश्वकपको पाँचौं दिनमा आएर ब्याट्सम्यानको शतक सम्भव भयो । रुट र बटलरको त्यस प्रयासले पनि इंग्ल्यान्डलाई जित दिलाउन सकेन । पाकिस्तानले लगातार १२ खेलको हार टुंग्याएको छ ।

रुटले १ सय ४ बलको इनिङ्समा १० चौका र १ छक्का प्रहार गरे । बटलरले ७५ बलमै शतक पूरा गरी विश्वकपमा सबैभन्दा छिटो शतक बनाउने नवौं खेलाडीमा आफूलाई उभ्याए । त्यसको अर्को बलमा आउट भएका उनले ९ चौका र २ छक्का प्रहार गरे । जोनी बेरिस्टो ३२, क्रिस वोक्स २१ र मोइन अली १९ रनमा आउट भए । पाकिस्तानका वाहब रियाजले ३ तथा सादब खान र मोहम्मद अमिरले २–२ विकेट लिए ।

यसअघि मोहम्मद हफिजको ८४ रनमा पाकिस्तानले ३४८–८ को स्कोर बनाएको थियो । अदिल रसिदको बलमा मिड अफमा जेसन रोयले १४ रनमा क्याच छाड्नु हफिजका लागि फलदायी भयो । बाबर आजमले ६३ र कप्तान सरफराज अहमदले पनि ५५ रन बनाउँदै पाकिस्तानलाई राम्रो स्थितिमा उभ्याए ।

शुक्रबार विश्वकपको आफ्नो पहिलो खेल खेल्नेक्रममा पाकिस्तान यही मैदानमा १ सय ५ रनमै अलआउट भएपछि वेस्ट इन्डिजसँग लज्जाजनक ७विकेटको हार भोगेको थियो । ‘मलाई लाग्छ आफैप्रतिको विश्वास महत्त्वपूर्ण छ,’ हफिजले भने, ‘जुनसुकै स्थितिको सामना गर्न पनि हामी तयार छौं । तर वेस्ट इन्डिजसँग हामीले केही खराब शट खेलेका थियौं ।’

वेस्ट इन्डिजसँग पाकिस्तान बाउन्सर बल खेल्न असमर्थ रहेको थियो । इंग्ल्यान्डका कप्तान इयान मोर्गनले टस जितेपछि पाकिस्तानलाई ब्याटिङमा बोलाउँदा पनि यही रणनीति अपनाउँदा कुनै आश्चर्य भएको थिएन । तीव्र बलर मार्क उडलाई टिममा फिर्ता बोलाउनुको कारण पनि यही नै थियो । तर इंग्ल्यान्डले दुई पटक विश्व कीर्तिमान बनाएको यही मैदानमा पाकिस्तानले बाउन्सर बललाई राम्रोसँग झेल्यो । इंग्ल्यान्डले २०१६ मा पाकिस्तानसँग ४४४–३ र गत वर्ष अस्ट्रेलियाविरुद्ध ४८१–६ को स्कोर बनाएको थियो ।

इंग्ल्यान्डका तीव्र बलरको चर्चाबीच स्पिनर मोइन अलीले ३ विकेट लिए । सोक्रममा उनले ५० रन खर्चे । तीव्र बलरद्वय क्रिस वोक्सले ८ ओभरमा ७१ रन खर्चेर ३ र उडले १० ओभरमा ५३ रन खर्चेर २ विकेट लिए । त्यस विपरीत जोफ्रा आर्चरले १० ओभरमा ७९ रन खर्चन पुगे । वोक्सले ४ क्याच लिए । विश्वकपमा फिल्डरले चार क्याच लिएको कीर्तिमान उनले बराबरी गरे ।

फखर जमान र इमाम उल हकले १४ ओभरमा ८२ रन जोड्दै पाकिस्तानलाई राम्रो सुरुआत दिलाए । अलीले फखरलाई स्टम्पआउट गराई यो साझेदारी तोडे । इमाम ४४ रन बनाई अलीकै सिकार भए । आजमले ६६ बलमा ४ चौका र १ छक्का प्रहार गरी ६३ रन बनाए । उनले ३९ बलमा अर्धशतक पुरा गरेका थिए । कप्तान सरफराजले त्यसलाई निरन्तरता दिँदै ४० बलमा अर्धशतक पूरा गरे । म्यान अफ द म्याच हफिजले ६२ बलको इनिङ्समा ८ चौका र २ छक्का प्रहार गरे ।

स्कोर कार्ड
पाकिस्तान
१४ रनले विजयी

पाकिस्तान
५० ओभर ३४८/८
मोहमद हफिज–८४
बाबर आजम–६३
सरफराज अहमद–५५

मोइन अली ३/५०
क्रिस वोक्स ३/७१

इंग्ल्यान्ड
५० ओभर ३३४/९
जो रुट–१०७
जोस बटलर–१०३

वहाब रियाज–३/८२
मोहमद अमिर–२/६७
सादब खान–२/६३

प्रकाशित : जेष्ठ २१, २०७६ ०७:५५
प्रतिक्रिया
पठाउनुहोस्

'तीव्र गतिका बलर’ निर्णायक

एएफपी

कार्डिफ — न्युजिल्यान्डका तीव्र गतिका बलर लोकी फर्गुसनले विश्वकपमा लेग स्पिनजस्तै तीव्र बलिङको पनि मुख्य भूमिका हुने दाबी गरेका छन् । फर्गुसनले अर्का तीव्र गतिका बलर म्याट हेनरीसँग मिलेर शनिबार विश्वकपको आफ्नो पहिलो खेलमा श्रीलंकाविरुद्ध १० विकेटको जित हासिल गरेका थिए । 

हेनरीले श्रीलंकाका शीर्षक्रम कमजोर बनाइदिएका थिए । अकल्यान्डमा जन्मिएका २७ वर्षे फर्गुसनले मध्यक्रमका महत्त्वपूर्ण विकेट लिएपछि श्रीलंका १ सय ३६ रनमै समेटिएको थियो । फर्गुसनले १५४ किलोमिटर प्रतिघण्टाको गतिमा बल फालेर वर्तमान विश्वकै सबैभन्दा तीव्र गतिको बलर बनेका छन् ।

‘स्पिन बलरले जस्तै फास्ट बलरले पनि बललाई दुवैतर्फ घुमाउन सक्छन् । फास्ट बलिङ पनि खेलको महत्त्वपूण हिस्सा हो । निश्चित रूपमा फास्ट बलिङ गरेको हेर्न रमाइलो हुन्छ,’ फर्गुसनले हाँस्दै भने, ‘वास्तवमा यहाँ प्रतिद्वन्द्वीको पनि कुरा आउला । तर यस्तो पनि होइन कि म हरेक बलरको खेल हेर्छु र आफ्नोसँग तुलना गर्छु ।’

वेस्ट इन्डिजका ओसमन थोमसले प्रतियोगिताको दोस्रो खेलमा पाकिस्तानलाई १ सय ५ रनमै अलआउट गरिदिएपछि तीव्र गतिका बलरका लागि इंग्लिस पिचको अनुकूलता पनि प्रमाणित भइसकेको छ । इंग्ल्यान्डका तीव्र गति बलर जोफ्रा आर्चरले पनि विश्वकपको ओपनिङ बलरको जिम्मेवारीसहित २७ रन खर्चेर ३ विकेट लिएका थिए । त्यस खेलमा इंग्ल्यान्डले दक्षिण अफ्रिकाविरुद्ध १ सय ४ रनको जित दर्ता गरेको थियो ।

सन् २०१६ मा अस्ट्रेलियाविरुद्ध सिड्नीमा एकदिवसीय अन्तर्राष्ट्रियमा डेब्यू गरेका फर्गुसन यस कुरामा पनि खुसी छन् कि इंग्ल्यान्ड र वेल्सको पिचको व्यवहारले बलर र ब्याट्सम्याचबीच सन्तुलन पाइरहेको छ । ‘मेरो विचारमा यहाँको पिचमा धेरै रन बन्नेछ, केही खेलहरूमा बलरलाई निकै दबाब पर्नसक्छ,’ उनले भने, ‘यो निकै राम्रो किन पनि हो भने यसले प्रतियोगिताको स्तर चित्रित गर्नेछ, खासगरी हाम्रा बलरका लागि ।’

प्रकाशित : जेष्ठ २१, २०७६ ०७:५४
पूरा पढ्नुहोस्
प्रतिक्रिया
पठाउनुहोस्