कान्तिपुर वेबसाईट
AdvertisementAdvertisement

इंग्ल्यान्डको विजयी सुरुआत

एएफपी

लन्डन — इंग्ल्यान्डले २०१९ को विश्वकपमा विजयी सुरुआत गरेको छ । आयोजक इंग्ल्यान्डले दक्षिण अफ्रिकालाई १ सय ४ रनले पराजित गर्‍यो । ३ सय १२ रनको लक्ष्य पाएको दक्षिण अफ्रिका ४० औं ओभरमा २ सय ७ रनमै अलआउट भयो । 

ओपनर क्विन्टन डी ककले दक्षिण अफ्रिकाबाट सर्वाधिक ६८ रन बनाए । ७४ बल खेलेका उनले ६ चौका र २ छक्का प्रहार गरे । अर्का ओपनर हामिस अमला घाइते हुनु दक्षिण अफ्रिकालाई दूर्भाग्य बन्यो । जेफ्री आर्चरको उछाल लिइरहेको बलले उनको कुहिनामा लागेको थियो । पा“चौं विकेट खसेपछि मात्र ब्याटिङमा आएका अमलाले १३ रन बनाए ।


रस्सी भान डेर डुसेनले ५० रन बनाए । ६१ बलको इनिङ्समा उनले ४ चौका र १ छक्का प्रहार गरे । अन्यले खासै गतिलो योगदान दिन सकेनन् । हालैमात्र इंग्ल्यान्डको टोलीमा समेटिएका आर्चरले ३ विकेट लिए । उनले ७ ओभरमा १ मेडन राख्दै २७ रन खर्चे । लिम प्लुनकेट र बेन स्टोक्सले २–२ तथा अदिल रशिद र मोइन अलीले १–१ विकेट लिए ।


यसअघि दक्षिण अफ्रिकाले २०१९ विश्वकपको पहिलो खेलमा इंग्ल्यान्डलाई ३११–८ को स्कोरमा रोकेको थियो । पहिलोपल्ट विश्वकप ट्रफी जित्ने दाउमा रहेको इंग्ल्यान्डले सोचेजस्तो स्कोर बनाउन सकेन ।


स्टोक्सले सर्वाधिक ८९ रन बनाए । कप्तान इयान मोर्गनले ५७, जेसन रोयले ५४ र जोए रुटले ५१ रन बनाई इंग्ल्यान्डलाई ३ सय रनभन्दा माथि पुर्‍याए । इंग्ल्यान्डले गत वर्ष ४८१–६ को स्कोर बनाउँदै एकदिवसीय क्रिकेटमा उच्च स्कोरको कीर्तिमान बनाए जस्तो खेल प्रदर्शन गर्न सकेन । दक्षिण अफ्रिकाका बलरहरूले फालेको स्लो बल प्रभावकारी बन्दा इंग्ल्यान्ड ठूलो स्कोरमा पुग्न असफल भयो ।


‘बल मजाले ब्याटमा आइरहेको थिएन,’ इनिङ्स ब्रेकका क्रममा रुटले यो स्विकारेका थिए, ‘हामी पनि अझ रन बनाउन चाहान्थ्यौं । पहिला ब्याटिङ गर्दा अझ ठूलो लक्ष्य दिन सक्नुपर्छ । तर इंग्ल्यान्डमा यो परम्परागत पिच होइन । केही ग्रिप त हुन्थ्यो, बलरलाई भने पिचमा धेरै मौका थियो,’ रुटले भने ।


बेलायती राजकुमार ह्यारीले प्रतियोगिताको समुद्घाटन गरेपछि इंग्ल्यान्डको विकेट जान धेरै समय लागेन । इनिङ्सको दोस्रो बलमै जोनी बेरिस्टो आउट भएपछि रोय र रुटले १ सय ६ रनको साझेदारी गरे । मोर्गन र स्टोक्सले चौथो विकेटमा त्यति नै साझेदारी गरे ।


घाइते तीव्र गतिका बलर डेल स्टेयनबिना खेलिरहेको दक्षिण अफ्रिकाका कप्तान फाफ डु प्लेसिसले टस जितेपछि फिल्डिङ गर्ने निर्णयले तुरुन्तै सफलता दिलायो, जब इमरान ताहिरले दोस्रो बलमै बेरिस्टोलाई गोल्डेन डकआउट गरे । प्रायः तीव्र बलरले पहिलो स्पेल लिएर बलिङमा आउने गर्छन् । डु प्लेसिसले प्रतियोगिताका सबैभन्दा पाका खेलाडी ४० वर्षे लेग स्पिनर ताहिरबाट बलिङको सुरुआत गराए । उनको दोस्रो बलमै बेरिस्टोले विकेटकिपर क्विन्टन डी ककलाई क्याच दिन पुगे । पाकिस्तानमा जन्मिएका ताहिरले त्यसको जवाफमा आफ्नो परम्परागत खुसी मनाएका थिए ।


रोय र रुट दुवै उत्कृष्ट लयमा थिए । यस्तो अवस्थामा इंग्ल्यान्ड ठूलो स्कोरतर्फ देखिएको थियो । १०७–१ को स्थितिमा रहेको इंग्ल्यान्डले चार बल अन्तरमा ४ रन बनाउँदा २ विकेट गुमाएको थियो । एन्डिल फेहलुकवायोको बलमा पुल गरेका रोयले मिडअफमा डु प्लेसिस र रुटले कागिसो राबाडाको बलमा ब्याकवार्ड प्वाइन्टमा जेपी डुमिनीलाई क्याच दिन पुगे । ५३ बल खेलेका रोयले ८ चौका र ५९ बल खेलेका राबाडाले ५ चौका प्रहार गरे ।


मोर्गनले तीव्र बलर लुंगी एनगिडीको बलमा लगातार दुई छक्का प्रहार गरेका थिए । तर अर्धशतक पूरा गरेपछि देव्रेहाते मोर्गनले ताहिरको बलमा ड्राइभ गर्दा लङअनमा क्याच दिए । जोस बटलर १८, मोइन अली ३ र क्रिस वोक्स १३ रनमा आउट भए । ४९ औं ओभरमा आउट भएका स्टोक्सले ९ चौका प्रहार गरे । प्रकाशित : जेष्ठ १७, २०७६ ०७:०१

प्रतिक्रिया
पठाउनुहोस्

सामान्यले भन्यो- समायोजनका कर्मचारी नफर्काऊ

राजधानीका नगरपालिकाले सबैभन्दा बढी कर्मचारी फर्काएका छन् । 
कान्तिपुर संवाददाता

काठमाडौँ — संघीय मामिला तथा सामान्य प्रशासन मन्त्रालयले समायोजनपछि कार्यक्षेत्रमा खटिएका कर्मचारीलाई हाजिर गराउन स्थानीय तह र प्रदेशलाई पत्राचार गरेको छ । समायोजन गरेर पठाएका कर्मचारीलाई काममा लगाउन नसक्ने भन्दै हाजिरै नगराउने प्रवृत्ति बढेपछि मन्त्रालयले यस्तो निर्देशन दिएको हो ।

समायोजनपछि पठाइएका कर्मचारी फिर्ता हुन थालेपछि संघीय मामिला तथा सामान्य प्रशासनमन्त्री लालबाबु पण्डितले राजधानी आसपासका नगरपालिकाका मेयरसँग केही दिनअघि छलफलसमेत गरेका थिए ।

समायोजनपछि संघले स्थानीय तहमा पठाएका ८० भन्दा बढी कर्मचारीलाई हाजिरै नगराई फिर्ता पठाएपछि यो समस्या बढै जाने चिन्ताले पत्र लेखिएको मन्त्रालय स्रोतको भनाइ छ । सबैभन्दा बढी राजधानीका नगरपालिकाले कर्मचारी फर्काएका छन् । अर्को व्यवस्था नभएसम्म काममा लगाउन अनुरोध गरेको मन्त्रालयका प्रवक्ता भूपाल बरालले जानकारी दिए । 'काममा बाधा नपुगोस् भन्ने हाम्रो चाहना हो,' उनले भने ।

मन्त्री पण्डितसँगको छलफलमा मेयरहरूले आफूलाई आवश्यक नपर्ने कर्मचारी केन्द्रबाट पठाइएकाले फिर्ता गर्नुपरेको प्रतिक्रिया दिएका थिए । समायोजनका नाममा आफूहरूसँग सल्लाहै नगरी कर्मचारी थुपारिएको उनीहरूको गुनासो थियो । काठमाडौं महानगरपलिकाका मेयर विद्यासुन्दर शाक्यले समेत कर्मचारी पठाएकामा असहमति जनाएका थिए ।

'काठमाडौं, ललितपुर महानगर र मध्यपुरठिमी, सूर्यविनायकलगायत नगरपालिकाले समेत केही कर्मचारीलाई काम लगाउन मानेका छैनन्, 'स्रोतले भन्यो, 'यो उनीहरूको आफैं कर्मचारी राख्ने सोच पनि हुन सक्छ ।' कतिपय स्थानीय तहले आफैंले कर्मचारी राख्न पाउनुपर्ने भन्दै भर्ना गर्नसमेत थालेका थिए । राजधानीबाहिरका केही स्थानीय तहले पनि कर्मचारी फर्काएका छन् ।

यसअघि प्रतिनिधिसभाको सुशासन एवं राज्यव्यवस्था समितिले सबै प्रदेश तथा ७ सय ५३ स्थानीय तहमा कार्यरत लेखा समूहका कर्मचारीलाई चालु आर्थिक वर्ष अन्त्य नभएसम्म संघमा नर्फकने व्यवस्था मिलाउन मन्त्रालयलाई निर्देशन दिएको थियो । 'प्रदेश र स्थानीय तहका विभिन्न आयोजनामा कार्यरत लेखाका कर्मचारी र्फकन थालेपछि काममा असर पर्ने देखियो,' मन्त्रालय स्रोतले भन्यो, 'त्यसलाई रोक्न राज्यव्यवस्था समितिको निर्देशनबमोजिम हामीले काम गरेका हौं ।' सरकारले प्रदेश तथा स्थानीय तहमा करिब ५० हजार कर्मचारी समायोजन गरिसकेको छ । समायोजन भए पनि मन्त्रालयमा गुनासो लिएर आउने कर्मचारी बढेको बढ्यै छन् ।



प्रकाशित : जेष्ठ १६, २०७६ २१:५४
पूरा पढ्नुहोस्
प्रतिक्रिया
पठाउनुहोस्
×