१७ अंक घट्यो नेप्से, सबै सूचकमा गिरावट

काठमाडौँ — मंगलबार सेयर बजारको परिसूचक नेप्से १७.५६ अंक घटेको छ । सो अंकको कमीपछि नेप्से १९५८ अंकमा कायम भएको छ । परिसूचकसँगै कारोबार रकम पनि घटेको छ । कुल १ अर्ब १९ करोड रुपैयाँको धितोपत्र कारोबार भयो । हिजो १ अर्ब ७३ करोडको कारोबार भएको थियो । 

बैंकिङ ७, विकास बैंक ४६, फाइनान्स २२, होटल तथा पर्यटन ६४, जलविद्युत् २९, जीवन बीमा ८७, उत्पादन ३७, माइक्रोफाइनान्स ३१, निर्जीवन बीमा ७१, अन्य १५ र ब्यापार उपसमूह ४२ अंक घटे । कुल ४४ कम्पनीको मूल्य बढ्दा १८७ को घट्यो भने २ को स्थिर रहृयो । समता घरेलु लघुवित्त, घलेम्दी हाइड्रोपावरको करिब ८ प्रतिशत बढ्यो । सामुदायिक लघुवित्तको मूल्य भने साढे ७ प्रतिशत घट्यो ।

कारोबार रकमका आधारमा सिटिजन लाइफ इन्स्योरेन्स, एनआईसी एसिया बैंक, रिलायबल नेपाल लाइफ इन्स्योरेन्स, शिवम् सिमेन्ट र सन नेपाल लाइफ इन्स्योरेन्स क्रमशः अगाडि रहे । बजारको पुँजीकरण २९ खर्ब ८६ अर्बमा झरेको छ ।