प्रधानमन्त्रीलाई जुट उद्योगीको आग्रह : भारतले लगाएको एन्टी डम्पिङ शुल्क हटाउन पहल गर्नुस्

भारतमा नेपाल र बंगलादेशले जुटका तयारी वस्तु निकासी गर्दै आएका छन् । तर बंगलादेशी उत्पादनमा एन्टी डम्पिङ शुल्क छैन । नेपाल जुट उद्योग संघका अध्यक्ष राजकुमार गोल्छाले नेपाली उत्पादनमा मात्र सात वर्षदेखि एन्टी डम्पिङ शुल्क लाग्दा बजारमा प्रतिस्पर्धा गर्न नसकी उद्योग नै संकटमा परेको बताए ।

गत वर्ष सात अर्ब मूल्य बराबरको नेपाली तयारी जुटका सामाग्री भारत निकासी भएको थियो । चालु वर्ष आठ अर्ब मूल्य बराबरका सामाग्री निकासी गर्ने लक्ष्य उद्योगीको छ । ‘भारतले एन्टी डम्पिङ महशुल हटाउने हो भने नेपालबाट वार्षिक सरदर आठ अर्ब मूल्यका जुटका तयारी वस्तु सहज निकासी हुने स्थिति बनाउँछौं’ गोल्छाले भने ।

जुट उद्योगीले सरकारसँग पटक पटक तयारी वस्तुमा भारतले लगाउँदै आएको एन्टी डम्पिङ महशुल हटाउन पहल गर्न आग्रह गर्दै आएपनि अहिलेसम्म प्रभावकारी प्रयास नै भएको छैन । ‘भारत भ्रमणको तयारीमा रहेका प्रधानमन्त्री दाहाललाई भेटेर नै एन्टी डम्पिङ शुल्क हटाउन पहल गर्न आग्रह गरेका छौं’ गोल्छाले भने ‘प्रधानमन्त्रीले यसपालिको आफ्नो भ्रमणका क्रममा उक्त शुल्क हटाएर छाड्ने आश्वासन दिनुभएको छ ।’

नेपालबाट हेसियन, सुतली, ब्याग लगायतका जुटका तयारी वस्तु भारत निकासी हुँदै आएको छ । ती वस्तुमा भारतले सन् २०१६ देखि कम्तीमा दुईदेखि चार प्रतिशतसम्म एन्टी डम्पिङ शुल्क लगाउँदा नेपाली उद्योगले उक्त शुल्कका नाममा वार्षिक सरदर ३० करोड भारतलाई तिर्दै आएका छन् ।

भारतले यसअघि नेपाली जुटका तयारी वस्तु निकासीमा साढे १२ प्रतिशत काउन्टर भ्यालु ड्यूटी (सीभीडी) लगाएको थियो । त्यसवापत उद्योगीले करिव २० करोड रुपैयाँ भारतबाट फिर्ता पाउनुपर्नेमा त्यो पनि पाएका छैनन् । सुनसरी मोरङ औद्योगिक क्षेत्रमा सबैभन्दा बढी मजदुरलाई रोजगारी दिने जुट उद्योगले आवश्यक पर्नेमध्ये ७० प्रतिशत कच्चा जुट भारत र बंगलादेशबाट आयात गरेर तयारी वस्तु भारत निकासी गर्दै आएका छन् । तिनै वस्तुमा नेपाली जुट उद्योगले भारतलाई एन्टी डम्पिङ शुल्क तिर्दा बंगलादेशका उत्पादनलाई छुट छ ।

सुनसरी मोरङ औद्योगिक क्षेत्रमा स्थापना भएका ११ मध्ये हाल अरिहन्त, रघुपति, स्वस्तिक, बाबा र नेपाल जुट उद्योग सञ्चालनमा छन् । ती उद्योगमा १२ हजार ५ सय मजदूर कार्यरत छन् । नेपालबाट ६ उद्योगले आफ्नो उत्पादन भारत निकासी गर्दै आएका छन् । ‘बंगलादेशका १६ वटा जुट उद्योगको उत्पादन भारत निकासी हुन्छ’ स्वस्तिक जुट उद्योगका सञ्चालक रमेश राठीले भने ‘तर बंगलादेशका उद्योगको उत्पादनमा भारतले एन्टी डम्पिङ शुल्कमा छुट दिएर विभेदकारी नीति लागू गरेको छ ।’