मधेस प्रदेशमा ससर्त अनुदानको १ अर्ब २५ करोड रकम आफूखुसी वितरण

चुनावमा व्यस्त भएकाले समन्वय गर्न सकिएन :  मुख्यमन्त्री
अजित तिवारी

जनकपुर — मधेस प्रदेश अर्थमन्त्रालयले स्थानीय तहलाई वितरण गरिने ससर्त अनुदानको १ अर्ब २५ करोड रुपैयाँ आफूखुसी वितरण गरेको पाइएको छ । सबै पालिकालाई बराबरी ससर्त अनुदानको रकम वितरण गर्ने कार्यविधिलाई अवज्ञा गर्दै अर्थमन्त्री संजय यादवले १० प्रतिशत कमिसन लिएर मनमौजी गरेको प्रदेशका सांसदहरुले आरोप लगाएका छन् । 

आर्थिक वर्षको अन्त्यतिर विधि–प्रक्रिया नपुर्‍याएर दलीय झुकाव र कमिसन लिएर ससर्त अनुदानको रकम अर्थ मन्त्रालयले स्थानीय तहलाई दिएकोमा प्रमुख प्रतिपक्षी दल एमालेले बिहीबार प्रदेशसभाको बैठक अवरोध गर्‍यो । ससर्त अनुदान वितरणमा गरिएको बेइमानीबारे सरकारको जवाफ माग्दै एमालेका सांसदहरुले प्रदेश सभाको बैठक चल्न दिएनन् । मधेस प्रदेशको अर्थमन्त्रालयले पालिकाले माग गरेको योजनालाई हटाएर आफूखुसी योजना थपेर ससर्त अनुदानको रकम पठाएको छ ।

सिराहाको सखुवानन्कारकट्टी गाउँपालिकाले गत चैत १३ गते २ करोड रुपैयाँको चारवटा योजना समावेश गरेर अर्थ मन्त्रालयलाई पत्र पठाएको थियो । तर, अर्थ मन्त्रालयले गाउँपालिकाले समावेश गरेको सबै योजना हटाएर १ करोड रुपैयाँको चारवटा अरु योजना हालेर ससर्त अनुदानको रकम पठाएको छ । सखुवानन्कारकट्टी गाउँपालिकाका प्रमुख प्रशासकीय अधिकृत राजिवकुमार झाका अनुसार पालिकाले नमागेको योजना पनि हालेर अर्थले ससर्त अनुदानको रकम पठाएकोमा आश्चर्य जनाए । ‘पालिकालाई बाइपास गरेर ससर्त अनुदानमा अर्थ मन्त्रालयले आफूखुसी योजना समावेश गरेर रकम पठाएको छ,’ झाले भने, ‘अरु योजना कसरी समावेश भयो । कसले गर्‍यो ? हामी चकित छौं ।’

अर्थ मन्त्रालयले जेठको पहिलो साता मात्रै मधेस प्रदेशका १ सय ३६ स्थानीय तहलाई आफूखुसी ससर्त अनुदानको रकम वितरण गरेको छ । ससर्त अनुदान कार्यविधिमा नगरपालिका र गाउँपालिकालाई एकैनासको रकम पठाउनुपर्ने प्रावधान रहेपनि बढीमा ९ करोडदेखि घटीमा २५ लाख रुपैयाँ पठाइएको सांसदहरुको आरोप छ । अर्थले ससर्त अनुदानको रकम लैजानका लागि चैतमा प्रकाशन गरेको सूचना स्थगन गर्दै वैशाखमा फेरि अर्को सूचना निकालेको थियो । ससर्त अनुदानको योजना र रकम मागका लागि सम्बन्धित पालिकाको इमेलबाट अर्थ मन्त्रालयको आधिकारिक इमेलमा पठाउनुपर्ने प्रावधान छ । तर, अर्थले इमेलमा प्राप्त भएको योजनालाई बाइपास गरेर अरु माध्यमबाट आएको योजनामा ससर्त अनुदानको रकम हालेर पठाएकोमा स्थानीय तहका जनप्रतिनिधिले आपत्ती जनाएका छन् ।

प्रदेश सांसद नागेन्द्रप्रसाद साहले आफू जितेको क्षेत्रमा पर्ने दुर्गाभगवती गाउँपालिकाको लेटर हेडमा माग गरिएको योजना ससर्त अनुदानमा नसमेटिएकोमा प्रदेशसभा बैठकमै आपत्ति जनाए । ‘माननीयज्यू तपाई्रले लग्नुभएको योजना किन परेन भनेर मेरो मजाक उडाइँदैछ,’ साहले सभामुखतिर हेर्दै भने, ‘म के जवाफ दिउँ ?, आफ्नै बेइज्जती के सुनाउनु भनेर चुप छु ।’ अर्थ मन्त्रालयले कमिसन लिएर पालिकामा ससर्त अनुदानको रकम पठाएको उनले आरोप लगाए । ‘मेरै वडाको कुरा गर्छु । मैले मागेकै योजना अर्को लेटर हेडमा आएकोलाई अर्थ मन्त्रालयले स्वीकृत गरेर रकम पठायो,’ सांसद साहले भने, ‘वडाध्यक्षलाई मुख देखाउन लाज भयो ।’

प्रमुख प्रतिपक्षी एमाले संसदीय दलका नेता सरोजकुमार यादवले ससर्त अनुदानको रकम वितरणमा अर्थ मन्त्रालयले मनोमानी गरेको आरोप लगाए । ससर्त अनुदान रकम कुन दलको जनप्रतिनिधि जितेको छ, त्यसको आधारमा जाने हो कि ? भनेर प्रदेशसभा बैठकमा उनले प्रश्न गरे । ‘ससर्त अनुदानको रकम वितरणमा गज्याङगुजुङ भएकै हो । केही अदृष्य विषयवस्तु छ,’ विपक्षी नेता यादवले भने, ‘मेरै क्षेत्रको एउटा पालिकामा ससर्त अनुदान गएको छ, अर्को पालिकामा छैन ।’ उनले ससर्त अनुदानको रकम वितरणमा बदमासी भएको भन्दै संसदीय छानविन समिति गठनको माग गरे । माओवादी(केन्द्र)का संसदीय दलका नेता भरतप्रसाद साहले अर्थ मन्त्रालयमा चरम बेथिति रहेको बताए । ‘हाकाहाकी १० प्रतिशत रकम (कमसिन) लिएर अनुदान पठाइएको छ, बारा उपनिर्वाचनको खर्च उठाउन थालेछ कि क्या हो’ उनले भने ।

ससर्त अनुदान वितरणमा मनोमानी भएको सम्बन्धमा सरकारको जवाफ माग्दै एमालेले प्रदेशसभाको बैठक अबरोध गरेपछि प्रदेशसभा पुगेका मुख्यमन्त्री सरोजकुमार यादवले राष्ट्रपति, उपराष्ट्रपति र बारा उपनिर्वाचनमा व्यस्त भएकाले ससर्त अनुदान वितरणमा समन्वय गर्न नसकिएको बताए । ‘चुनावमा व्यस्त भएकाले सांसदहरुसँग समन्वय हुन सकेन । अब बजेट र नीति तथा कार्यक्रममा सांसदहरुको भावनाको कदर गरिनेछ,’ मुख्यमन्त्री यादवले प्रदेशसभा बैठकमा भने, ‘ससर्त अनुदानमा चलखेल र बिचौलियालाई हाबी हुन दिन्नौं ।’


प्रकाशित : जेष्ठ ११, २०८० १९:३३
प्रतिक्रिया
पठाउनुहोस्

६१ लाख बराबरको सुनचाँदी चोरीको आरोपमा ३ जना पक्राउ

कान्तिपुर संवाददाता

विराटनगर — साताअघि विराटनगरको एक घरबाट ६१ लाख रुपैयाँ बराबरको सुनचाँदी चोरी गरेको आरोपमा तीन जना पक्राउ परेका छन् । विराटनगर–१२ स्थित कोशी प्रोजेक्टको सडक खण्डमा स्थानीय २१ वर्षीय राजकुमार कामत, १९ वर्षीय विवेक कामत र २२ वर्षीय श्रीकान्त दासलाई बुधबार राति मोरङ प्रहरीले पक्राउ गरेको हो ।

प्रहरीका अनुसार उनीहरुको साथबाट दुई झोलामा ३५ किलो चाँदी, ८ ग्राम सुन, २ हजार ५ सय भारु, १ हजार ७ सय ३० नेरु र २ वटा मोबाइल बरामद भएको छ ।

विवेक यसअघि पनि चोरी मुद्दामा २०७९ साउन २२ देखि ९ महिना कारागार बसेर छुटेका थिए । अर्का आरोपी दास पनि डाँका चोरी मुद्दामा २०७७ को २९ पुसदेखि करिब २० महिनाको सजाय भुक्तान गरेर छुटेको प्रहरीले जनाएको छ । उनीहरुले पुनः ३ जेठको राति विराटनगर–३ पिपलचोकस्थित सुनचाँदी व्यवसायी जयकिशोर चौधरीको घरबाट करिब २० लाख रुपैयाँको २० तोला सुन र झन्डै ४१ लाख रुपैयाँ बराबरको ३६ किलो चाँदी चोरी गरेको प्रहरीले जनाएको छ । उनीहरुले चोरी गरेको सुन भारतको जोगवनीमा ७ लाख भारुमा बेचेको प्रहरी अनुसन्धानमा खुलेको छ ।

चोरीका सामग्रीसहित उनीहरु तीन दिन विराटनगरको एक होटेलमा बसेपछि भारततिर लागेका थिए । पक्राउ परेका विवेकले स्थानीय अन्य घरमा समेत चोरी गरेको स्वीकारेकाले अनुसन्धान भइरहेको प्रहरीले बताएको छ । प्रहरीका अनुसार उनीहरुले बाटामा भिडभाड नहुने र छरछिमेक व्यस्त हुने समयमा घरभित्र छिरी चोरी गर्थे । चोरीका आरोपितहरुले घरको सम्पूर्ण कोठा खानतलासी गरी सुनचाँदी तथा गरगहनामात्र लिएर जाने गरेको प्रहरीले अनुसन्धानबाट पत्ता लगाएको छ ।

यस्तै चोरीको सामान व्यवस्थापनका लागि उनीहरुले कोठा वा होटेलमा बस्ने गरेको र घटना सामसुम भएपछि भारततिर लाग्ने गरेको देखिएको छ । उक्त घटना अनुसन्धानमा संलग्न ७ प्रहरी अधिकृतसहितको टोलीलाई मोरङ प्रहरीले पुरस्कृतसमेत गरेको छ ।

प्रकाशित : जेष्ठ ११, २०८० १९:०९
पूरा पढ्नुहोस्
प्रतिक्रिया
पठाउनुहोस्
×