२०२३ मा विश्वका अर्बपतिहरूको सम्पत्ति मूल्य ५ खर्ब डलर घट्यो 

एलन मस्कसहित आधा संख्याका अर्बपतिको सम्पत्ति पहिलेको तुलनामा घटेको छ । अर्बपतिको सूचीमा पहिलो नम्बरमा बेर्नार्ड अर्नौल्ट परेका छन् । लुइस भ्यूटन तथा सेफोसहित विभिन्न ७५ कस्मेटिक ब्राण्डका मालिक बेर्नार्ड फ्रान्सेली हुन् । उनको सम्पत्ति २ खर्ब २८ अर्ब डलर बराबर छ । अर्बपतिको दोस्रो स्थानमा एलन मस्क छन् । टेस्ला तथा स्पेसएक्सका मालिक उनको सम्पत्ति गत वर्षभन्दा घटेको छ । गत वर्ष पहिलो नम्बरमा रहेका उनको सम्पत्ति अहिले घटेर १ खर्ब ९२ अर्ब डलर हाराहारीमा झरेको छ ।

त्यस्तै जेफ बेजोस, लरी इलिसन, वारेन बफेट, बिल गेट्स, माइकल ब्लुमबर्ग, कार्लोस स्लिम हेलू, मुकेस अम्बानी, स्टेभ बल्मेर अर्बपतिको सूचीमा शिर्ष १० नम्बरमा छन् । यीमध्ये मस्क, बेजोस, बफेट, गेट्स, अम्बानी र बल्मेरको सम्पत्ति मूल्य गत वर्षको तुलनामा घटेको छ । सूचना प्रविधि तथा टेलिकम क्षेत्रका लगानीकर्ता अर्बपतिको सूचीमा अगाडि देखिएका छन् । नेपालका विनोद चौधरी पनि अर्बपतिको १६४१ औं स्थानमा परेका छन् । उनको सम्पत्ति १ अर्ब ८० करोड डलर बराबर रहेको फोर्ब्सको सूचीमा उल्लेख छ ।